ការចាត់តាំងមន្ត្រីតាមឃុំ នឹងក្លាយជាកត្តាជំរុញដ៏សំខាន់សម្រាប់កសិកម្មលក្ខណៈគ្រួសារ
ការចាត់តាំងមន្ត្រីតាមឃុំ នឹងក្លាយជាកត្តាជំរុញដ៏សំខាន់សម្រាប់កសិកម្មលក្ខណៈគ្រួសារ
ក្រសួងកសិកម្មកាលពីដើមឆ្នាំ ២០២៣ បានចាប់ដំណើរការក្នុងការជ្រើសរើសមន្ត្រីកសិកម្មឃុំ ចំនួន ១០រូប សម្រាប់ធ្វើការជិតស្និទ្ធជាមួយកសិករនៅតាមមូលដ្ឋាន។ ការចាត់តាំងបែបនេះ នឹងធ្វើឡើង ដោយយកស្រុកមួយជាគំរូក្នុងការអនុវត្តន៍។
ដោយឡែក ជាគម្រោងរបស់រាជរដ្ឋាភិបាល គឺចង់ពង្រីកការបណ្ដុះបណ្ដាលនេះឱ្យទៅគ្រប់ឃុំនៅទូទាំងប្រទេស ធ្វើយ៉ាងណាឱ្យចាប់ពីអាណត្តិទី៧នេះទៅ ប្រជាកសិករគ្រប់ភូមិ គ្រប់ឃុំទទួលបានមន្ត្រីកសិកម្មល្អសម្រាប់ធ្វើការជាមួយពួកគេជាប្រចាំ។
បើតាមឯកឧត្តម យ៉ង សាំងកុមារ រដ្ឋលេខាធិការក្រសួងបរិស្ថាន
បានឱ្យដឹងថា បើសិនជាការងារនេះជោគជ័យ ការងារពង្រីកតទៅទៀតនឹងមានល្បឿនលឿន ម្យ៉ាងទៀតការរៀបចំនៅស្រុកជើងព្រៃនេះ វាជាបទពិសោធន៍ ជាមេរៀនក្នុងការរៀបចំការពង្រីកទៅឆ្នាំ ២០២៤ ២០២៥ បានងាយជាងមុន។
ដោយឡែក សម្រាប់ពេលនេះ ក្រសួងកសិកម្មកំពុងធ្វើការងារដោយផ្ដោតលើការបណ្ដុះបណ្ដាលមន្ត្រីកសិកម្មទាំង១០រូប សម្រាប់ចុះជួយប្រជាជនទាំង១០ឃុំ នៅក្នុងស្រុកជើងព្រៃ។ នៅក្រោយការបណ្ដុះបណ្ដាលនេះ មន្ត្រីទាំង១០រូបនឹងមានតួនាទីដូចជា៖
ត្រូវមានទំនាក់ទំនងជាមួយអាជ្ញាធរមូលដ្ឋាន ដើម្បីប្រមូលព័ត៌មាន និងធ្វើរបាយការណ៍ពីស្ថានភាពកសិកម្មរបស់ឃុំ ត្រូវធ្វើការជាមួយអាជ្ញាធរមូលដ្ឋានដើម្បីផ្សព្វផ្សាយឱ្យកសិករយល់ដឹង និងចូលរួមសហការ។ បន្ទាប់មកទៀតគឺ ត្រូវជ្រើសរើសកសិករដែលស្ម័គ្រចិត្តចូលរួមសហការ និងធ្វើបច្ចុប្បន្នភាពទិន្នន័យកសិករសហកា គាំទ្រដល់កសិករក្នុងការរៀបចំ និងអភិវឌ្ឍន៍ផែនការផលិត ផ្សារភ្ជាប់មកទីផ្សារ។
ជាងនេះទៅទៀត មន្ត្រីទាំង១០រូបនឹងត្រូវធ្វើការផ្សព្វផ្សាយ និងបណ្ដុះបណ្ដាលកសិករ លើប្រធានបទផ្សេងៗទាក់ទងនឹងបច្ចេកទេសកសិកម្ម និងអាហាររូបត្ថម្ភ ត្រូវសម្របសម្រួលដល់កសិករឱ្យទទួលបាននូវព័ត៌មានបច្ចេកទេស ការពិគ្រោះយោបល់និងការបណ្ដុះបណ្ដាលពីអ្នកជំនាញផ្សេងៗ។
មន្ត្រីទាំងនោះក៏នឹងត្រូវសម្របសម្រួលកសិករក្នុងការចងក្រងជាក្រុម ឬសហគមន៍ ជួយដល់ក្រុម និងសហគមន៍កសិករក្នុងការសហការជាមួយរោងម៉ាស៊ីន ក្រុមហ៊ុន អ្នកផ្គត់ផ្គង់ ធនាគារ និងអង្គការពាក់ព័ន្ធផ្សេងៗ។ ជួយរៀបចំផែនការ និងរបាយការណ៍វឌ្ឍនភាពការងារឱ្យបានទៀងទាត់ ជួយសម្របសម្រួលប្រជាកសិករចូលរួមសម្រាប់ផលិតសម្ភារៈផ្សព្វផ្សាយ និងចុងក្រោយគឺជួយសម្របសម្រួលបញ្ជ្រាបសេវាផ្សព្វផ្សាយ។
គួរបញ្ជាក់ថា រាជរដ្ឋាភិបាលបានគាំទ្រយ៉ាងខ្លាំងទៅលើវិស័យកសិកម្ម ជាពិសេសលើការធ្វើកសិកម្ម ជាលក្ខណៈគ្រួសារ ដោយធ្វើយ៉ាងណាលើកស្ទួយការដាំដុះក្នុងស្រុក និង «ការនាំចេញនៅនឹងកន្លែង» ដែលជាផ្នែកមួយក្នុងការទាញសេដ្ឋកិច្ចជាតិឱ្យរីកចម្រើន៕
