មនុស្ស ២៦នាក់ បានស្លាប់ និងជិត ១៥០ នាក់រងរបួសនៅក្នុងគ្រោះរញ្ជួយដីកម្រិត ៦.៩ រិចទ័រនៅហ្វីលីពីន

មនុស្ស ២៦នាក់ បានស្លាប់ និងជិត ១៥០ នាក់រងរបួសនៅក្នុងគ្រោះរញ្ជួយដីកម្រិត ៦.៩ រិចទ័រនៅហ្វីលីពីន

ហ្វីលីពីន៖ យ៉ាងហោចណាស់មនុស្ស ២៦នាក់បានស្លាប់ និងជិត ១៥០ នាក់បានរងរបួសនៅក្នុងគ្រោះរញ្ជួយដីកម្រិត ៦.៩ រិចទ័រ ដែលបានវាយប្រហារនៅឆ្នេរសមុទ្រនៃខេត្ត Cebu ភាគកណ្តាលនៃប្រទេសហ្វីលីពីន ។ ករណីនេះ បានបណ្តាលឱ្យអគារមួយចំនួនដួលរលំ មនុស្សជាច្រើរយនាក់រត់ប្រសាចតាមផ្លូវ និង ដាច់ចរន្តអគ្គិសនីនៅតំបន់មួយចំនួន។

សេចក្តីរាយការណ៍របស់សារព័ត៌មាន aljazeera.បានឱ្យដឹងថា ការរញ្ជួយដីបានកើតឡើងនៅម៉ោង ៩:៥៩ នាទីយប់ ម៉ោងក្នុងស្រុក កាលពីថ្ងៃអង្គារ (១៣:៥៩ GMT) ចេញពីតំបន់ភាគខាងជើងនៃកោះ Cebu ក្បែរទីក្រុង Bogo ដែលជាទីក្រុងដែលមានប្រជាជនប្រមាណ ៩0,000 នាក់ រស់នៅ ហើយត្រូវបានបន្តដោយការរញ្ជួយដីចំនួន ៤ កម្រិត ៥ ឬខ្ពស់ជាងនេះនៅក្នុងតំបន់ បន្ទាប់ពីការរញ្ជួយលើកដំបូង។
យោងតាមក្រុមប្រឹក្សាកាត់បន្ថយ និងគ្រប់គ្រងហានិភ័យគ្រោះមហន្តរាយជាតិហ្វីលីពីន បានឱ្យដឹងថា មានមនុស្សស្លាប់ ២៦នាក់ និងរបួស ១៤៧ នាក់ ព្រមទាំងមានអគារ ចំនួន ២២ អគារ បានដួលរលំ និងរងការខូចខាង គិតត្រឹមព្រឹកថ្ងៃពុធ។

យោងតាមសារព័ត៌មានក្នុងស្រុកបានឱ្យដឹងថា អាជ្ញាធរក្នុងតំបន់បានប្រកាស ពី “ស្ថានភាពគ្រោះមហន្តរាយ” នៅក្នុងផ្នែកខ្លះនៃទីក្រុងសេប៊ូ។ការរញ្ជួយដីនេះបានបណ្តាលឱ្យដាច់ចរន្តអគ្គិសនីនិងបានធ្វើឱ្យអគារធ្លាក់ចុះរួមទាំងព្រះវិហារដែលមានអាយុកាលជាង ១០០ ឆ្នាំ។

ទូរទស្សន៍ក្នុងស្រុកបានបង្ហាញពីអ្នកជិះម៉ូតូត្រូវបានបង្ខំឱ្យចុះពីលើម៉ូតូរបស់ពួកគេ ខណៈដែលស្ពាន Cebu បានរញ្ជួយយ៉ាងខ្លាំង។ រដ្ឋាបាលខេត្ត Cebu បានធ្វើការអំពាវនាវនៅលើទំព័រ Facebook ផ្លូវការរបស់ខ្លួន សម្រាប់អ្នកស្ម័គ្រចិត្តផ្នែកវេជ្ជសាស្រ្ដ ដើម្បីជួយក្នុងក្រោយការរញ្ជួយដីនេះ។

វិទ្យាស្ថានបន្ទុះភ្នំភ្លើង និងរញ្ជួយដីហ្វីលីពីនបានជំរុញឱ្យអ្នកស្រុកនៅក្នុងខេត្ត Cebu, Leyte និង Biliran ស្ថិតនៅឱ្យនៅឆ្ងាយពីឆ្នេរសមុទ្រ ដោយសារ “ការរំខានកម្រិតទឹកសមុទ្រ” ហើយឱ្យ “ប្រុងប្រយ័ត្នចំពោះរលកមិនធម្មតា” ៕