អេមីរ៉ាតអារ៉ាប់រួមនឹងដកខ្លួនចេញពី OPEC នៅថ្ងៃទី១ ខែឧសភា ខណៈប្រមុខថាមពលបញ្ជាក់ថានៅតែប្តេជ្ញាចិត្តរក្សាស្ថិរភាពតម្លៃប្រេង

អេមីរ៉ាតអារ៉ាប់រួមនឹងដកខ្លួនចេញពី OPEC នៅថ្ងៃទី១ ខែឧសភា ខណៈប្រមុខថាមពលបញ្ជាក់ថានៅតែប្តេជ្ញាចិត្តរក្សាស្ថិរភាពតម្លៃប្រេង

វ៉ាស៊ីនតោន៖ ប្រទេសអេមីរ៉ាតអារ៉ាប់រួម (UAE) នឹងដកខ្លួនចេញពីអង្គការ OPEC នៅថ្ងៃទី១ ខែឧសភា ដែលត្រូវបានចាត់ទុកថា ជាការប៉ះពាល់ដល់ក្រុមប្រទេសផលិតប្រេង និងកម្រិតផលិតកម្មរវាងប្រទេសផលិតប្រេងធំៗជាច្រើននៅលើពិភពលោក ជាពិសេសនៅតំបន់មជ្ឈិមបូព៌ា។

សេចក្ដីប្រកាសដ៏គួរឲ្យភ្ញាក់ផ្អើលនេះ ត្រូវបានប្រកាសកាលពីថ្ងៃអង្គារ បន្ទាប់ពីអេមីរ៉ាតអារ៉ាប់រួមក្លាយជាគោលដៅនៃការវាយប្រហារដោយមីស៊ីល និងយន្តហោះដ្រូនអស់រយៈពេលជាច្រើនសប្ដាហ៍ ពីប្រទេសអ៊ីរ៉ង់ ដែលជាសមាជិក OPEC ដូចគ្នា។ ការវាយប្រហាររបស់ទីក្រុងតេហេរ៉ង់លើការដឹកជញ្ជូននៅច្រកសមុទ្រ Hormuz ក៏បានរំខានយ៉ាងខ្លាំងដល់សមត្ថភាពនាំចេញប្រេងរបស់ UAE ដែលគំរាមកំហែងដល់មូលដ្ឋានសេដ្ឋកិច្ចរបស់ប្រទេសនេះ។

អេមីរ៉ាតអារ៉ាប់រួមបានដើរតួនាទីយ៉ាងសំខាន់ក្នុងការសម្រេចចិត្តរបស់ OPEC អស់រយៈពេលជិត៦ទសវត្សរ៍។ ប្រទេសនេះគឺជាអ្នកផលិតប្រេងធំជាងគេទី៣ក្នុងក្រុម កាលពីខែកុម្ភៈ បន្ទាប់ពីអារ៉ាប៊ីសាអូឌីត និងអ៊ីរ៉ាក់។ សមាជិកភាពរបស់ UAE ក្នុង OPEC មានប្រភពចាប់តាំងពីឆ្នាំ១៩៦៧ តាមរយៈអាប៊ូដាប៊ី ដែលបានចូលរួមជាមួយអង្គការនេះ៧ឆ្នាំបន្ទាប់ពីការបង្កើត។

ក្រសួងថាមពលបាននិយាយនៅក្នុងសេចក្ដីថ្លែងការណ៍ជាលាយលក្ខណ៍អក្សរថា UAE បានឈានដល់ការសន្និដ្ឋានថា ការចាកចេញពីអង្គការ OPEC គឺស្ថិតក្នុងផលប្រយោជន៍ជាតិ បន្ទាប់ពីការពិនិត្យឡើងវិញយ៉ាងទូលំទូលាយលើគោលនយោបាយផលិតកម្ម និងសមត្ថភាពរបស់ខ្លួន។

រដ្ឋមន្ត្រីថាមពល លោក Suhail Al Mazrouei បានប្រាប់ទូរទស្សន៍ CNBC ថា UAE បានសម្រេចចិត្តចាកចេញពី OPEC នៅពេលដែលវានឹងបង្កផលប៉ះពាល់តិចបំផុតដល់អ្នកផលិតផ្សេងទៀតក្នុងក្រុម។
លោកបាននិយាយថា «ការចាកចេញរបស់យើងនៅពេលនេះ គឺជាពេលវេលាដ៏សមស្រប ព្រោះវានឹងមានផលប៉ះពាល់អប្បបរមាលើតម្លៃប្រេង និងលើមិត្តភក្តិរបស់យើងនៅក្នុង OPEC និង OPEC+»។

លោកបានបន្ថែមថា UAE មានគោលដៅបង្កើនសមត្ថភាពផលិតប្រេងឲ្យដល់ ៥ លានបារ៉ែលក្នុងមួយថ្ងៃនៅឆ្នាំ២០២៧ ហើយចង់បានភាពបត់បែនបន្ថែមក្នុងការសម្រេចគោលដៅនេះ។ លោកបានបញ្ជាក់ថា ការសម្រេចចិត្តចាកចេញនេះ មិនមែនជាការឆ្លើយតបទៅនឹងការកាត់បន្ថយផលិតកម្មអស់រយៈពេលជាច្រើនឆ្នាំដែលដឹកនាំដោយអារ៉ាប៊ីសាអូឌីតនោះទេ។

លោក Al Mazrouei បាននិយាយថា «ការសម្រេចចិត្តនេះ មិនពាក់ព័ន្ធនឹងបងប្អូន ឬមិត្តភក្តិណាមួយក្នុងក្រុមឡើយ។ យើងបានសហការជាមួយគ្នាអស់រយៈពេលយូរ ហើយយើងមានការគោរពខ្ពស់ចំពោះអារ៉ាប៊ីសាអូឌីត សម្រាប់ការដឹកនាំ OPEC»។

ក្រសួងថាមពលបានបញ្ជាក់ថា UAE នៅតែប្តេជ្ញាចិត្តក្នុងការរក្សាស្ថិរភាពទីផ្សារ និងនឹងបន្តសហការជាមួយទាំងអ្នកផលិត និងអ្នកប្រើប្រាស់ ដើម្បីសម្រេចគោលដៅនោះ។ ក្រសួងបានបន្ថែមថា ការចាកចេញពី OPEC នឹងផ្តល់ឱ្យប្រទេសនេះនូវភាពបត់បែនបន្ថែមក្នុងការឆ្លើយតបទៅនឹងស្ថានភាពទីផ្សារ។

នៅចុងក្រោយ ក្រសួងបានបញ្ជាក់ថា «យើងបញ្ជាក់ឡើងវិញនូវការកោតសរសើររបស់យើងចំពោះកិច្ចខិតខំប្រឹងប្រែងរបស់ OPEC និងសម្ព័ន្ធ OPEC+ ហើយសូមជូនពរឱ្យពួកគេទទួលបានជោគជ័យ»៕