ព្រះសង្ឃស្រីលង្កា ២២ អង្គ ត្រូវបានចាប់ខ្លួន បន្ទាប់ពីរកឃើញកញ្ឆា ១១០ គីឡូក្រាម

ព្រះសង្ឃស្រីលង្កា ២២ អង្គ ត្រូវបានចាប់ខ្លួន បន្ទាប់ពីរកឃើញកញ្ឆា ១១០ គីឡូក្រាម

ស្រីលង្កា៖ ព្រះសង្ឃចំនួន ២២ អង្គ ត្រូវបានចាប់ខ្លួននៅអាកាសយានដ្ឋានមួយក្នុងប្រទេសស្រីលង្កា បន្ទាប់ពីមន្ត្រីបានរកឃើញកញ្ឆាចំនួន ១១០ គីឡូក្រាម (២៤២ ផោន) ដែលលាក់នៅក្នុងឥវ៉ាន់របស់ព្រះសង្ឃទាំងនោះ។ នេះ បើតាមការចុះផ្សាយរបស់ BCC។

មន្ត្រីគយបានឲ្យដឹងថា ព្រះសង្ឃនីមួយៗត្រូវបានរកឃើញថាមានកញ្ឆាប្រភេទ “Kush” ប្រហែល ៥ គីឡូក្រាម ដែលជាប្រភេទមានអនុភាពខ្លាំងមួយនៃគ្រឿងញៀននេះ ដោយបានលាក់នៅក្នុង “ជញ្ជាំងក្លែងក្លាយ” នៃវ៉ាលី។ ការរកឃើញនេះកើតឡើងនៅពេលពួកគេមកដល់រដ្ឋធានីកូឡុំបូ កាលពីថ្ងៃសៅរ៍។

ព្រះសង្ឃទាំងនេះ ដែលភាគច្រើនជានិស្សិត កំពុងនិមន្តត្រឡប់ពីប្រទេសថៃ បន្ទាប់ពីបានចូលរួមដំណើរកម្សាន្តរយៈពេល ៤ ថ្ងៃ ដែលចំណាយទាំងអស់ត្រូវបានអ្នកឧបត្ថម្ភមិនបញ្ចេញឈ្មោះរ៉ាប់រង។ ពួកគេត្រូវបានឃុំខ្លួននៅពេលមកដល់។

ប៉ូលីសបានប្រាប់សារព័ត៌មាន BBC Sinhala ថា ព្រះសង្ឃអង្គទី ២៣ ដែលត្រូវបានគេជឿថាជាអ្នករៀបចំដំណើរកម្សាន្តនេះ ត្រូវបានចាប់ខ្លួននៅជាយក្រុងកូឡុំបូ។

យោងតាមអ្នកនាំពាក្យនគរបាលស្តីទី បានឲ្យដឹងថា ព្រះសង្ឃមួយអង្គ ដែលមិនបានចូលរួមដំណើរកម្សាន្តនេះ បានប្រាប់ព្រះសង្ឃដទៃទៀតថា “កញ្ចប់ទាំងនេះជាអំណោយ” ហើយថានឹងមានរថយន្តមកទទួលយកកញ្ចប់ទាំងនោះ។

ការិយាល័យនគរបាលប្រឆាំងគ្រឿងញៀន (Police Narcotics Bureau) របស់ស្រីលង្កា បានរកឃើញរូបថត និងវីដេអូនៅលើទូរស័ព្ទដៃរបស់ព្រះសង្ឃមួយចំនួន ដែលមកពីវត្តនានាទូទាំងប្រទេស ដោយបង្ហាញថាពួកគេកំពុងរីករាយនឹងការកម្សាន្តរបស់ពួកគេ និងស្លៀកសម្លៀកបំពាក់ធម្មតា។

ព្រះសង្ឃទាំង ២២ អង្គ ត្រូវបានឃុំខ្លួនបណ្តោះអាសន្នរយៈពេល ៧ ថ្ងៃ ដើម្បីសាកសួរបន្ថែម បន្ទាប់ពីបានបង្ហាញខ្លួននៅតុលាការនៅថ្ងៃអាទិត្យ។

ប៉ូលីសបានបញ្ជាក់ថា ពួកគេជឿថា ព្រះសង្ឃខ្លះអាចមិនដឹងថាពួកគេកំពុងដឹកអ្វីនោះទេ។គ្រឿងញៀនត្រូវបានរកឃើញលាក់នៅក្នុងសម្ភារៈសិក្សា និងបង្អែម។

គេជឿថា នេះជាលើកដំបូងដែលក្រុមព្រះសង្ឃមួយក្រុមត្រូវបានចាប់ខ្លួន ពាក់ព័ន្ធនឹងការសង្ស័យរត់ពន្ធគ្រឿងញៀនចូលប្រទេសតាមអាកាសយានដ្ឋាន៕