សោកស្ដាយផង! កម្ពុជា ចាញ់ វៀតណាម ២-១ ក្នុងជំនួបមិត្តភាពអន្តរជាតិ

សោកស្ដាយផង! កម្ពុជា ចាញ់ វៀតណាម ២-១ ក្នុងជំនួបមិត្តភាពអន្តរជាតិ

កាលពីយប់ថ្ងៃទី១៩ ខែមីនា ឆ្នាំ២០២៥ ម្សិលមិញនេះ ក្រុមគោព្រៃកម្ពុជា ក្រោមការដឹកនាំរបស់គ្រូបង្វឹកសញ្ជាតិជប៉ុន លោក Koji Gyotoku បានប្រកួតចាញ់ ក្រុមជម្រើសជាតិវៀតណាម ក្នុងលទ្ធផល ២-១ ក្នុងជំនួបមិត្តភាពអន្តរជាតិ ។

ការប្រកួតដែលធ្វើឡើងនៅឯកីឡដ្ឋាន Gò Đậu, ខេត្ត Binh Duong ប្រទេសវៀតណាម ក្រុមម្ចាស់ផ្ទះ បានបើកការនាំមុខមុនចំនួន២គ្រាប់ ដោយកីឡាករ Nguyễn Văn Vĩ នៅនាទី៣៥ និងកីឡាករ Nguyễn Hai Long នាទី២៦។

ចំណែក កម្ពុជា តាមបានមួយគ្រាប់វិញ ដោយកីឡាករវ័យក្មេង កីឡាករ បុង សាំយូអ៊េល ទាត់បញ្ចូលទី នៅនាទីទី ៦៤ ខណៈនេះជាគ្រាប់បាល់ដំបូងរបស់គេ ក្នុងការប្រកួតជាមួយក្រុមជម្រើសជាតិឈុតធំ។ ចប់ការប្រកួត៩០នាទី វៀតណាម ២-១ កម្ពុជា។

ថ្លែងនៅក្នុងសន្និសីទសារព័ត៌ ក្រោយចប់ការប្រកួត លោក Koji Gyotoku បាននិយាយថា៖«នៅតង់ទី២ យើងលេងបានល្អ។ ប៉ុន្តែប្រសិនបើយើងប្រៀបធៀបក្រុមទាំងពីរ គឺវៀតណាមល្អជាងទាំងកម្លាំង និងបច្ចេកទេស។ ពួកគេក៏បានរៀបចំយ៉ាងប្រុងប្រយ័ត្នក្នុងទិដ្ឋភាពជាច្រើន។ ក្នុងតង់ទី១ វៀតណាមក៏លេងបានល្អជាងផងដែរ។ បើទោះជាខ្ញុំមិនពេញចិត្តនឹងលទ្ធផល ប៉ុន្តែការបង្ហាញរបស់កីឡាករកម្ពុជាមិនអន់នោះទេ»។
លោក Koji បានបន្ថែមថា៖«ក្នុងតង់ទី១ យើងមិនអាចមានបាល់លេងបានទេ ជាពិសេសនៅតំបន់បម្រើ។ នៅតង់ទី២ ខ្ញុំរកឃើញបញ្ហារបស់ក្រុមពីទីនោះ យើងគ្រប់គ្រងបាល់បានច្រើនជាង។ ក្រោយការប្រកួតនេះ ខ្ញុំនឹងត្រឡប់ទៅពិភាក្សាជាមួយកីឡាករវិញ ដើម្បីឱ្យពួកគេកែលម្អ»។

គួរបញ្ជាក់ថា បន្ទាប់ពីការប្រកួតជាមួយវៀតណាម ក្រុមគោព្រៃកម្ពុជា នឹងប្រកួតមិត្តភាពអន្តរជាតិ ជាមួយក្រុមជម្រើសជាតិអារូបា (Aruba) ដែលមកពីទ្វីបអាមេរិកខាងត្បូង នាថ្ងៃអង្គារ ទី២៥ ខែមីនា ឆ្នាំ២០២៥ ខាងមុខនេះ នៅពហុកីឡដ្ឋានជាតិ(អូឡាំពិក)៕