លោក Trump ទិញរថយន្ត Tesla ថ្មី ដើម្បីគាំទ្រក្រុមហ៊ុនរបស់ លោក Musk
លោក Trump ទិញរថយន្ត Tesla ថ្មី ដើម្បីគាំទ្រក្រុមហ៊ុនរបស់ លោក Musk
អាមេរិក៖ លោកប្រធានាធិបតីសហរដ្ឋអាមេរិក លោក Donald Trump បានទិញរថយន្ត Tesla ថ្មី កាលពីថ្ងៃអង្គារដោយជ្រើសរើសយករថយន្តពណ៌ក្រហមភ្លឺចាំង ដើម្បីបង្ហាញពីការគាំទ្ររបស់លោកចំពោះក្រុមហ៊ុនរថយន្តអគ្គិសនីរបស់ លោក Elon Musk និង ជាការដឹកគុណដែលលោក Musk បានជួយលោកឱ្យក្លាយជាប្រធានាធិបតីសារជាថ្មី។
តាមការចុះផ្សាយរបស់សារព័ត៌មាន AP នៅថ្ងៃទី ១២ ខែមីនា នេះ ឱ្យដឹងថា ការបញ្ជាទិញរថយន្ត Tesla ថ្មីនេះ ស្របពេលដែលការលក់របស់ក្រុមហ៊ុនមានការធ្លាក់ចុះយ៉ាងខ្លាំង ក្រោយមានការវាយប្រហារលើ លោក Elon Musk ពីពលរដ្ឋអាមេរិកចំពោះការខកចិត្តលើការងាររបស់លោកក្នុងការជំរុញរបៀបវារៈនយោបាយរបស់ប្រធានាធិបតី និងកាត់បន្ថយការចំណាយរដ្ឋាភិបាលសហព័ន្ធ។
នាឱកាសនោះ លោក Trump បានប្រាប់អ្នកសារព័ត៌មានថា លោកនឹងសរសេរមូលប្បទានប័ត្រសម្រាប់ទិញរថយន្តនេះ ដែលមានតម្លៃប្រហែល 80,000 ដុល្លារ ហើយទុកវានៅសេតវិមាន ដើម្បីឲ្យបុគ្គលិករបស់លោកជិះ។
ជាមួយគ្នានេះ លោកប្រធានាធិបតីក៏បាននិយាយថាលោកសង្ឃឹមថាការទិញរបស់លោកនឹងជំរុញក្រុមហ៊ុន Tesla មានសន្ទុះឡើងវិញ ស្របពេល ដែលក្រុមហ៊ុន កំពុងមានការលក់ធ្លាក់ចុះ និងការធ្លាក់ចុះនៃតម្លៃភាគហ៊ុន។
លោក Trump បាននិយាយថា «វាជាផលិតផលដ៏អស្ចារ្យ» ។ ដោយសំដៅលើ លោក Musk លោក Trump បាននិយាយថា «យើងត្រូវតែអបអរសាទរគាត់» ។
ការបញ្ជាទិញរថយន្ត Tesla នៅពេលនេះ លោក Trump ត្រូវបានគេមើលឃើញថា បានបង្ហាញភាពស្មោះត្រង់ចំពោះ លោក Musk ដែលបានចំណាយលុយរាប់លានដុល្លារក្នុងយុទ្ធនាការឃោសនាបោះឆ្នោត កាលពីឆ្នាំមុន ដើម្បីធ្វើយ៉ាងណា ឱ្យលោក Trump បានវិលត្រឡប់មកកាន់សេតវិមាន វិញ ។
សូមបញ្ជាក់ថា តម្លៃភាគហ៊ុនរបស់ក្រុមហ៊ុន Tesla បានកើនឡើងជិត ៤% កាលពីថ្ងៃអង្គារ បន្ទាប់ពីបានធ្លាក់ចុះជិត ៤៨% ចាប់តាំងពីលោក Trump ចូលកាន់តំណែងក្នុងខែមករា៕
