រុស្ស៊ី និងចិន ថ្កោលទោសសហរដ្ឋអាមេរិក ជុំវិញការចោទប្រកាន់អតីតមេដឹកនាំគុយបា

រុស្ស៊ី និងចិន ថ្កោលទោសសហរដ្ឋអាមេរិក ជុំវិញការចោទប្រកាន់អតីតមេដឹកនាំគុយបា

ចិន និងរុស្ស៊ី បានថ្កោលទោសការសម្រេចចិត្តរបស់សហរដ្ឋអាមេរិក ក្នុងការចោទប្រកាន់អតីតប្រធានាធិបតីគុយបា លោក រ៉ាអ៊ូល កាស្ត្រូ ពាក់ព័ន្ធនឹងបទឃាតកម្ម។

ក្រសួងការបរទេសចិន បានអំពាវនាវឱ្យសហរដ្ឋអាមេរិក បញ្ឈប់ការប្រើប្រាស់ «ការបង្ខិតបង្ខំ» និង «ការគំរាមកំហែង» ប្រឆាំងនឹងសម្ព័ន្ធមិត្តរបស់ខ្លួន ខណៈវិមានក្រឹមឡាំងបាននិយាយថា សម្ពាធដែលដាក់លើទីក្រុងឡាហាវ៉ា «ស្ទើរតែឈានដល់កម្រិតអំពើហិង្សា»។

សហរដ្ឋអាមេរិក បានចោទប្រកាន់លោក កាស្ត្រូ ជុំវិញការបាញ់ទម្លាក់យន្តហោះពីរគ្រឿងក្នុងឆ្នាំ១៩៩៦ ដែលបានសម្លាប់មនុស្ស៤នាក់ និងបង្កឱ្យមានភាពតានតឹងផ្នែកការទូតរវាងទីក្រុងវ៉ាស៊ីនតោន និងកោះគុយបា។

ប្រធានាធិបតីអាមេរិក លោក Donald Trump បានបន្តដាក់សម្ពាធលើប្រទេសគុយបា ហើយថែមទាំងបាននិយាយដោយបើកចំហអំពីការផ្តួលរំលំរបបកុម្មុយនិស្តរបស់ប្រទេសនេះផងដែរ។

សហរដ្ឋអាមេរិក បានដាក់ទណ្ឌកម្មថ្មីលើគុយបា និងបានអនុវត្តការបិទខ្ទប់យ៉ាងតឹងរឹងលើការដឹកជញ្ជូនប្រេងទៅកាន់ប្រទេសនេះ ដែលធ្វើឱ្យវិបត្តិប្រេងឥន្ធនៈកាន់តែធ្ងន់ធ្ងរ និងបណ្តាលឱ្យមានការដាច់ចរន្តអគ្គិសនីយូរម៉ោង និងកង្វះស្បៀងអាហារ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់ប្រព័ន្ធផ្សព្វផ្សាយរដ្ឋរុស្ស៊ីកាលពីថ្ងៃព្រហស្បតិ៍ថា យុទ្ធនាការដាក់សម្ពាធរបស់សហរដ្ឋអាមេរិកប្រឆាំងនឹងសម្ព័ន្ធមិត្តយូរអង្វែងរបស់រុស្ស៊ី រួមទាំងការចោទប្រកាន់លោក កាស្ត្រូ នោះ «មិនអាចទទួលយកបានឡើយ»។

លោកបានបន្ថែមថា៖ «យើងជឿថា មិនគួរប្រើវិធីសាស្ត្របែបនេះ ដែលមានលក្ខណៈស្ទើរតែជាអំពើហិង្សា ប្រឆាំងនឹងអតីត ឬបច្ចុប្បន្នប្រមុខរដ្ឋឡើយ»។

អ្នកនាំពាក្យក្រសួងការបរទេសចិន លោក Guo Jiakun បាននិយាយថា សហរដ្ឋអាមេរិកគួរតែ «បញ្ឈប់ការគំរាមកំហែងដោយកម្លាំងគ្រប់រូបភាព» ហើយថា ទីក្រុងប៉េកាំង «គាំទ្រគុយបាយ៉ាងរឹងមាំ»។

លោកបាននិយាយថា ចិនប្រឆាំងនឹង «ការប៉ុនប៉ងណាមួយរបស់កម្លាំងខាងក្រៅ ក្នុងការដាក់សម្ពាធលើគុយបា ក្រោមលេសណាមួយ»។

លោក Guo បានបន្តថា៖ «សហរដ្ឋអាមេរិកគួរតែបញ្ឈប់ការប្រើប្រាស់ទណ្ឌកម្ម និងប្រព័ន្ធតុលាការ ជាឧបករណ៍នៃការបង្ខិតបង្ខំប្រឆាំងនឹងគុយបា និងត្រូវចៀសវាងការគំរាមប្រើកម្លាំងគ្រប់រូបភាព»។

លោក កាស្ត្រូ ត្រូវបានចោទប្រកាន់រួមជាមួយមនុស្ស៥នាក់ទៀត កាលពីថ្ងៃពុធ ពាក់ព័ន្ធនឹងការចោទថាបានចូលរួមក្នុងការបាញ់ទម្លាក់យន្តហោះពីរគ្រឿង ដែលកំពុងហោះហើររវាងគុយបា និងរដ្ឋផ្លរីដា។

លោកត្រូវបានចោទប្រកាន់ពីបទល្មើសដែលអាចប្រឈមទោសជាប់ពន្ធនាគារអស់មួយជីវិត ឬទោសប្រហារជីវិត។

យន្តហោះទាំងនោះ ត្រូវបានប្រតិបត្តិការដោយក្រុមប្រឆាំងគុយបា-អាមេរិក ឈ្មោះ Brothers to the Rescue ហើយបានដឹកជនជាតិអាមេរិក៣នាក់ នៅពេលវាត្រូវបានបាញ់ទម្លាក់ ដោយអ្នកទាំងនោះបានស្លាប់ទាំងអស់។

នៅពេលកើតហេតុ លោក កាស្ត្រូ ដែលបានចុះចេញពីតំណែងប្រធានាធិបតីនៅឆ្នាំ២០១៨ គឺជាមេបញ្ជាការកងកម្លាំងប្រដាប់អាវុធរបស់គុយបា។

ឧប្បត្តិហេតុនេះ បានបង្កឱ្យមានកំហឹងក្នុងចំណោមជនភៀសខ្លួនគុយបា ដែលរស់នៅសហរដ្ឋអាមេរិក ហើយក្លាយជាប្រភពជម្លោះរវាងទីក្រុងវ៉ាស៊ីនតោន និងទីក្រុងឡាហាវ៉ាអស់រយៈពេលជាច្រើនឆ្នាំ។

ប្រធានាធិបតីគុយបា លោក Miguel Díaz-Canel បានពណ៌នាការចោទប្រកាន់នេះថា «ជាល្បិចនយោបាយ ដែលគ្មានមូលដ្ឋានផ្លូវច្បាប់»។

ចាប់តាំងពីការចាប់ខ្លួនអតីតប្រធានាធិបតីវេណេស៊ុយអេឡា លោក Nicolás Maduro កាលពីខែមករា លោក Trump បាននិយាយដោយបើកចំហថា ប្រទេសគុយបា «ជិតដួលរលំ»។

ការចោទប្រកាន់របស់សហព័ន្ធអាមេរិកប្រឆាំងលោក Maduro ត្រូវបានរដ្ឋបាល Trump ប្រើជាហេតុផលសម្រាប់ប្រតិបត្តិការវាយឆ្មក់នៅទីក្រុងការ៉ាកាស់ ដើម្បីចាប់ខ្លួនលោក និងភរិយារបស់លោក គឺលោកស្រី Cilia Flores។ បច្ចុប្បន្ន អ្នកទាំងពីរកំពុងប្រឈមការកាត់ទោសនៅទីក្រុងញូវយ៉ក ពាក់ព័ន្ធនឹងបទចោទរួមមានការជួញដូរគ្រឿងញៀន។

រដ្ឋមន្ត្រីការបរទេសអាមេរិក លោក Marco Rubio បានបដិសេធមិនធ្វើអត្ថាធិប្បាយថា តើរដ្ឋបាលអាមេរិកមានផែនការនាំលោក កាស្ត្រូ មកកាត់ទោសនៅសហរដ្ឋអាមេរិកឬយ៉ាងណា។

លោកបានប្រាប់អ្នកសារព័ត៌មាននៅរដ្ឋផ្លរីដាកាលពីថ្ងៃព្រហស្បតិ៍ថា អតីតមេដឹកនាំគុយបារូបនេះ «បានទទួលស្គាល់ និងអួតដោយបើកចំហ» ថា លោកបានបញ្ជាឱ្យបាញ់ទម្លាក់យន្តហោះទាំងនោះ។

នៅពេលត្រូវបានសួរអំពីលទ្ធភាពដែលសហរដ្ឋអាមេរិកអាចប្រើកម្លាំងដើម្បីផ្លាស់ប្តូររបបដឹកនាំនៅគុយបា លោក Rubio បាននិយាយថា រដ្ឋបាលលោក Trump ចង់បានដំណោះស្រាយតាមការចរចា ប៉ុន្តែលោកបានបន្ថែមថា៖«លោកប្រធានាធិបតីមានជម្រើសក្នុងការធ្វើបែបនោះ ប្រសិនបើមានការគំរាមកំហែងដល់សន្តិសុខជាតិរបស់សហរដ្ឋអាមេរិក ហើយលោកបានបង្ហាញរួចហើយថា លោកមានឆន្ទៈធ្វើបែបនោះ នៅពេលដែលលោកមើលឃើញការគំរាមកំហែង»។

កាលពីថ្ងៃពុធ លោក Rubio ក៏បានចេញសារជាភាសាអេស្ប៉ាញទៅកាន់ប្រជាជនគុយបា ដោយពិពណ៌នាវិធានការរបស់រដ្ឋបាល Trump ថា ជា «ការបើកផ្លូវថ្មីមួយ» ដើម្បីជំនួសរបប kleptocratic ដោយសេរីភាពដែលជនជាតិគុយបា-អាមេរិកកំពុងទទួលបាន។

មន្ត្រីគុយបា បានពិភាក្សាជាមួយសហរដ្ឋអាមេរិកអស់រយៈពេលជាច្រើនខែ ដើម្បីស្វែងរកដំណោះស្រាយចំពោះភាពខុសគ្នារវាងប្រទេសទាំងពីរ ខណៈការដឹកជញ្ជូនប្រេងតែមួយពីរុស្ស៊ី ដែលត្រូវបានអនុញ្ញាតឱ្យទៅដល់គុយបា បានអស់កាលពីដើមខែនេះ។

ទោះជាយ៉ាងណា សេតវិមាននៅតែបន្តបង្កើនសម្ពាធលើទីក្រុងឡាហាវ៉ា។

កាលពីដើមខែនេះ លោក Trump បានចុះហត្ថលេខាលើបទបញ្ជាប្រតិបត្តិ ដាក់ទណ្ឌកម្មលើមន្ត្រីក្នុងវិស័យថាមពល ការពារជាតិ ហិរញ្ញវត្ថុ និងសន្តិសុខរបស់គុយបា ព្រមទាំងបុគ្គលដែលសហរដ្ឋអាមេរិកចោទថា បានរំលោភសិទ្ធិមនុស្ស ឬលួចទ្រព្យសម្បត្តិសាធារណៈ។

ការហោះហើរស៊ើបការណ៍របស់សហរដ្ឋអាមេរិកនៅជិតគុយបា ក៏ត្រូវបានរាយការណ៍ថា បានកើនឡើងផងដែរ ខណៈនាយក CIA បានអំពាវនាវឱ្យគុយបា «លែងក្លាយជាជម្រកសុវត្ថិភាពសម្រាប់សត្រូវ» អំឡុងដំណើរទស្សនកិច្ចទៅកាន់តំបន់នោះកាលពីសប្តាហ៍មុន។

គុយបា រហូតមកដល់ពេលថ្មីៗនេះ បានអាចទប់ទល់នឹងទណ្ឌកម្មធ្ងន់ធ្ងររបស់លោកខាងលិច ដោយសារជំនួយពីសម្ព័ន្ធមិត្តក្នុងតំបន់ ដូចជារដ្ឋាភិបាលលោក Maduro នៅវេណេស៊ុយអេឡា ដែលត្រូវបានគេជឿថា បានផ្គត់ផ្គង់ប្រេងប្រមាណ ៣៥,០០០ បារ៉ែលក្នុងមួយថ្ងៃ មុនពេលលោកត្រូវបានចាប់ខ្លួន៕