លោក ស៊ី និងលោក ពូទីន សរសើរទំនាក់ទំនងទ្វេភាគី ខណៈបញ្ហាថាមពលស្ថិតក្នុងការផ្តោតសំខាន់

លោក ស៊ី និងលោក ពូទីន សរសើរទំនាក់ទំនងទ្វេភាគី ខណៈបញ្ហាថាមពលស្ថិតក្នុងការផ្តោតសំខាន់

ប៉េកាំង, ថ្ងៃទី២០ ខែឧសភា (Reuters) — មេដឹកនាំចិន និងរុស្ស៊ី បានសាទរចំពោះការរីកចម្រើននៃទំនាក់ទំនងយុទ្ធសាស្ត្ររវាងប្រទេសទាំងពីរ ខណៈពួកគេបានជួបពិភាក្សាគ្នានៅទីក្រុងប៉េកាំងនៅថ្ងៃពុធនេះ សម្រាប់កិច្ចប្រជុំកំពូលមួយ ដែលគេរំពឹងថា ទីក្រុងម៉ូស្គូនឹងជំរុញឱ្យមានកិច្ចសហប្រតិបត្តិការផ្នែកថាមពលកាន់តែរឹងមាំ។

ប្រធានាធិបតីចិន លោក ស៊ី ជីនពីង បានទទួលស្វាគមន៍ប្រធានាធិបតីរុស្ស៊ី លោក វ្ល៉ាឌីមៀ ពូទីន ដោយមានកងឆ្មាំកិត្តិយស និងពិធីបាញ់កាំភ្លើងកិត្តិយស នៅវិមានប្រជាជន ខណៈកុមារបានគ្រវីទង់ជាតិចិន និងរុស្ស៊ី។ ក្រៅពីកិច្ចពិភាក្សាផ្លូវការ មេដឹកនាំទាំងពីរក៏ត្រូវបានគេរំពឹងថា នឹងបញ្ចប់ថ្ងៃជាមួយជំនួបស្និទ្ធស្នាលពិសារតែរួមគ្នា។

ស្របពេលដំណើរទស្សនកិច្ចរបស់ប្រធានាធិបតីអាមេរិក លោក ដូណាល់ ត្រាំ ទៅកាន់ទីក្រុងប៉េកាំង កាលពីពេលថ្មីៗនេះ ទាំងរូបភាពនយោបាយ និងលទ្ធផលនៃកិច្ចប្រជុំកំពូលរវាងមេដឹកនាំចិន និងរុស្ស៊ី ត្រូវបានគេតាមដាន និងប្រៀបធៀបយ៉ាងដិតដល់។

យោងតាមទីភ្នាក់ងារព័ត៌មានរដ្ឋចិន ស៊ីនហួ លោក ស៊ី បាននិយាយថា ប្រទេសទាំងពីរគួរតែផ្តោតលើយុទ្ធសាស្ត្ររយៈពេលវែង និងជំរុញការកសាងប្រព័ន្ធអភិបាលកិច្ចសកល ដែលមានភាពយុត្តិធម៌ និងសមហេតុផលជាងមុន។

លោក ស៊ី បានថ្លែងក្នុងពិធីបើកកិច្ចប្រជុំជាមួយលោក ពូទីន ថា៖ «មូលហេតុដែលទំនាក់ទំនងរវាងចិន និងរុស្ស៊ី អាចឈានដល់កម្រិតបច្ចុប្បន្ន គឺដោយសារយើងបានបន្តពង្រឹងទំនុកចិត្តនយោបាយទៅវិញទៅមក និងកិច្ចសហប្រតិបត្តិការយុទ្ធសាស្ត្រ»។

ចំណែកលោក ពូទីន បាននិយាយថា ទំនាក់ទំនងរវាងប្រទេសទាំងពីរ កំពុងជួយធានាស្ថិរភាពពិភពលោក ហើយបានសង្កត់ធ្ងន់ថា រុស្ស៊ីនៅតែជាអ្នកផ្គត់ផ្គង់ថាមពលដ៏គួរឱ្យទុកចិត្តមួយ ទោះបីមានភាពចលាចលនៅមជ្ឈិមបូព៌ាក៏ដោយ។

លោក ពូទីន ក៏បាននិយាយដែរថា ទោះបីប្រឈមនឹងកត្តាខាងក្រៅមិនអំណោយផលក៏ដោយ កិច្ចសហប្រតិបត្តិការ និងទំនាក់ទំនងសេដ្ឋកិច្ចរវាងប្រទេសទាំងពីរ នៅតែបន្តបង្ហាញសន្ទុះវិជ្ជមាន។ លោកក៏បានអញ្ជើញលោក ស៊ី ទៅបំពេញទស្សនកិច្ចនៅរុស្ស៊ីនៅឆ្នាំក្រោយផងដែរ។

«ការទូតតែ»
 
លោក ស៊ី ត្រូវបានគេស្គាល់ថា ចូលចិត្តទទួលភ្ញៀវជាមេដឹកនាំបរទេសដោយពិធីពិសារតែ ប៉ុន្តែទីតាំង និងរបៀបរៀបចំជំនួបទាំងនេះ តែងត្រូវបានមើលឃើញថា ជាសញ្ញាបង្ហាញពីកម្រិតការយកចិត្តទុកដាក់របស់មេដឹកនាំចិនចំពោះភ្ញៀវរបស់ខ្លួន។

នៅពេលលោក ស៊ី ទទួលលោក ពូទីន កាលពីខែឧសភា ឆ្នាំ២០២៤ មេដឹកនាំទាំងពីរបានដោះក្រវាត់ក ខណៈពួកគេពិសារតែ និងជជែកគ្នានៅក្រៅអគារ Zhongnanhai ដែលជាសួនច្បារបុរាណ និងជាទីតាំងការិយាល័យរបស់គណបក្សកុម្មុយនិស្តចិន និងរដ្ឋាភិបាល។

ផ្ទុយទៅវិញ ដំណើរកម្សាន្តរបស់លោក ត្រាំ នៅក្នុងសួនច្បារសម្ងាត់ និងការពិសារតែជាមួយលោក ស៊ី នៅក្នុងបរិវេណដដែល ក៏ដូចជាការទស្សនាប្រាសាទស្ថានសួគ៌ កាលពីសប្តាហ៍មុន ត្រូវបានរៀបចំឡើងក្នុងលក្ខណៈពិធីការយ៉ាងប្រណិត។

លោក Graeme Smith សមាជិកជាន់ខ្ពស់នៃសាកលវិទ្យាល័យជាតិអូស្ត្រាលី ផ្នែកកិច្ចការប៉ាស៊ីហ្វិក បាននិយាយថា៖ «ទីក្រុងប៉េកាំងពេញចិត្តខ្លាំងចំពោះរូបភាពនយោបាយទាំងនេះ។ ពួកគេចូលចិត្តក្លាយជាចំណុចកណ្ដាលនៃការចាប់អារម្មណ៍ពិភពលោក ហើយពួកគេនឹងប្រើវាសម្រាប់ទស្សនិកជនក្នុងស្រុកឱ្យបានអតិបរមា»។

ដំណើរទស្សនកិច្ចដ៏កម្រពីសំណាក់មេដឹកនាំនៃប្រទេសមហាអំណាចពីរ ដែលមានភាពតានតឹងគ្នាផ្នែកនយោបាយ យោធា និងសេដ្ឋកិច្ច ត្រូវបានប្រព័ន្ធផ្សព្វផ្សាយរដ្ឋចិន ចាត់ទុកថា ជាការទទួលស្គាល់ពីតួនាទីកើនឡើងរបស់ចិន ក្នុងសណ្តាប់ធ្នាប់ពិភពលោកដែលកាន់តែបែកចែក។

ពាណិជ្ជកម្ម និងថាមពល
 
លោក ពូទីន ដែលបានហៅលោក ស៊ី ថា «មិត្តជិតស្និទ្ធ» ខណៈលោក ស៊ី ក៏ហៅលោក ពូទីន ថា «មិត្តចាស់» បានមកដល់ចិន ស្របពេលពាណិជ្ជកម្មទ្វេភាគីកំពុងងើបឡើងវិញ បន្ទាប់ពីធ្លាក់ចុះកាលពីឆ្នាំមុន។
ទិន្នន័យបង្ហាញថា ពាណិជ្ជកម្មទ្វេភាគីបានកើនឡើង ១៦,១% ក្នុងរយៈពេល៤ខែដំបូងនៃឆ្នាំនេះ បើធៀបនឹងរយៈពេលដូចគ្នាក្នុងឆ្នាំ២០២៥ គិតជាតម្លៃ។

ពាណិជ្ជកម្មរវាងចិន និងរុស្ស៊ី មានទំហំ ១,៦៣ទ្រីលានយ័ន (ប្រហែល ២៤០ពាន់លានដុល្លារ) ក្នុងឆ្នាំ២០២៥ ធ្លាក់ចុះ ៦,៥% ពីកំណត់ត្រាឆ្នាំ២០២៤ និងជាការធ្លាក់ចុះលើកដំបូងក្នុងរយៈពេល៥ឆ្នាំ។

លោក ពូទីន បានទទួលស្គាល់ថា ចាំបាច់ត្រូវបញ្ច្រាសនិន្នាការធ្លាក់ចុះនេះ ដោយសារចិន គឺជាខ្សែជីវិតសេដ្ឋកិច្ចដ៏សំខាន់សម្រាប់រុស្ស៊ី ដែលកំពុងរងទណ្ឌកម្មពីលោកខាងលិច ជុំវិញសង្គ្រាមនៅអ៊ុយក្រែន។

លោក ពូទីន ត្រូវបានអមដំណើរដោយគណៈប្រតិភូកម្រិតខ្ពស់ រួមមានឧបនាយករដ្ឋមន្ត្រី រដ្ឋមន្ត្រី និងប្រធានសាជីវកម្មរដ្ឋ ព្រមទាំងធនាគារធំៗ។

វិមានក្រឹមឡាំង បានបង្ហាញ «ការរំពឹងទុកខ្ពស់» ចំពោះដំណើរទស្សនកិច្ចនេះ ដែលក្រៅពីកិច្ចពិភាក្សា នឹងរួមមានពិធីចុះហត្ថលេខា និងពិធីជប់លៀង បន្ទាប់មកមានការពិសារតែ ដែលមេដឹកនាំទាំងពីរនឹងពិភាក្សាបញ្ហាអន្តរជាតិសំខាន់ៗក្នុងបរិយាកាសក្រៅផ្លូវការ។
វិមានក្រឹមឡាំងបានឱ្យដឹងថា ឯកសារចំនួន៤០ ត្រូវបានគេរំពឹងថានឹងចុះហត្ថលេខា ខណៈសេចក្តីថ្លែងការណ៍រួមមួយកម្រាស់ ៤៧ទំព័រ ស្តីពីភាពជាដៃគូពង្រឹងរវាងប្រទេសទាំងពីរ ក៏នឹងត្រូវចេញផ្សាយផងដែរ។

អ្នកជំនាញក្នុងវិស័យថាមពល បាននិយាយថា ការចរចាអំពីគម្រោងបំពង់បង្ហូរឧស្ម័ន «Power of Siberia 2» ដែលនឹងតភ្ជាប់រុស្ស៊ីទៅភាគខាងជើងចិន ក៏ទំនងជានឹងត្រូវលើកយកមកពិភាក្សាផងដែរ។​

ភាពជាដៃគូ «គ្មានដែនកំណត់» រវាងចិន និងរុស្ស៊ី ត្រូវបានពង្រឹងកាន់តែខ្លាំងឡើង បន្ទាប់ពីលោកខាងលិចដាក់ទណ្ឌកម្មលើទីក្រុងម៉ូស្គូ ជុំវិញសង្គ្រាមនៅអ៊ុយក្រែន។

ក្រុមអ្នកវិភាគបាននិយាយថា ភាពមិនច្បាស់លាស់នៃការផ្គត់ផ្គង់ថាមពល ដែលបណ្តាលមកពីជម្លោះជុំវិញអ៊ីរ៉ង់ អាចជួយគាំទ្រការជំរុញរបស់រុស្ស៊ី សម្រាប់គម្រោងបំពង់បង្ហូរឧស្ម័ននេះ ក្នុងនាមជាប្រភពឧស្ម័នរយៈពេលវែង។ ទោះជាយ៉ាងណា ទីក្រុងប៉េកាំង ប្រហែលនៅតែចង់រក្សាយុទ្ធសាស្ត្រធ្វើពិពិធកម្មប្រភពផ្គត់ផ្គង់ថាមពលរបស់ខ្លួន៕