ប្រធានាធិបតីតៃវ៉ាន់និយាយថា «រីករាយ» ក្នុងការពិភាក្សាជាមួយលោក Trump
ប្រធានាធិបតីតៃវ៉ាន់និយាយថា «រីករាយ» ក្នុងការពិភាក្សាជាមួយលោក Trump
វ៉ាស៊ីនតោន៖ ប្រធានាធិបតីតៃវ៉ាន់ លោក Lai Ching-te បាននិយាយកាលពីថ្ងៃព្រហស្បតិ៍ថា លោកនឹង «រីករាយ» ក្នុងការពិភាក្សាជាមួយប្រធានាធិបតីអាមេរិក លោក Donald Trump ដែលជាការសន្ទនាមួយអាចបំបែកពិធីសារការទូតអស់រយៈពេលជាង ៤ ទសវត្សរ៍ និងអាចបង្កការខឹងសម្បារពីប្រទេសចិន។
លោក Trump បានប្រាប់អ្នកសារព័ត៌មានកាលពីថ្ងៃពុធថា លោកនឹងនិយាយជាមួយលោក Lai ខណៈសេតវិមានកំពុងថ្លឹងថ្លែងការលក់អាវុធទៅឱ្យកោះប្រជាធិបតេយ្យមួយនេះ។
នេះជាលើកទី២ហើយ ចាប់តាំងពីកិច្ចប្រជុំកំពូលនៅទីក្រុងប៉េកាំងកាលពីសប្តាហ៍មុន ដែលលោក Trump បាននិយាយថា លោកនឹងទូរស័ព្ទទៅកាន់មេដឹកនាំតៃវ៉ាន់។
ការប្រាស្រ័យទាក់ទងបែបនេះ នឹងក្លាយជាលើកដំបូង ចាប់តាំងពីសហរដ្ឋអាមេរិកបានប្តូរទំនាក់ទំនងការទូតពីទីក្រុងតៃប៉ិទៅទីក្រុងប៉េកាំង នៅឆ្នាំ១៩៧៩ ដែលប្រធានាធិបតីកំពុងកាន់តំណែងរបស់តៃវ៉ាន់ និងសហរដ្ឋអាមេរិក និយាយដោយផ្ទាល់ជាមួយគ្នា។
ក្រសួងការបរទេសតៃវ៉ាន់បាននិយាយនៅក្នុងសេចក្តីថ្លែងការណ៍មួយថា លោក Lai បានបញ្ជាក់ថា តៃវ៉ាន់ «ប្តេជ្ញារក្សាស្ថានភាពស្ថិរភាពនៅច្រកសមុទ្រតៃវ៉ាន់» ហើយថា «ចិនគឺជាអ្នកបំផ្លាញសន្តិភាព និងស្ថិរភាព»។
សេចក្តីថ្លែងការណ៍ដដែលបានបញ្ជាក់ថា លោក Lai នឹង «រីករាយក្នុងការពិភាក្សាបញ្ហាទាំងនេះជាមួយប្រធានាធិបតី Trump»។
លោក Trump បាននិយាយថា៖ «ខ្ញុំនឹងនិយាយជាមួយគាត់។ ខ្ញុំនិយាយជាមួយមនុស្សគ្រប់គ្នា» ដោយបន្ថែមថា លោកមានជំនួបដ៏ល្អមួយជាមួយប្រធានាធិបតីចិន លោក Xi Jinping អំឡុងដំណើរទស្សនកិច្ចផ្លូវរដ្ឋទៅកាន់ទីក្រុងប៉េកាំងកាលពីសប្តាហ៍មុន។
លោក Trump បាននិយាយថា៖ «យើងនឹងធ្វើការលើបញ្ហាតៃវ៉ាន់នេះ»។
បន្ទាប់ពីបញ្ចប់ដំណើរទស្សនកិច្ចនៅទីក្រុងប៉េកាំង លោក Trump បានបង្ហើបថា ការលក់អាវុធទៅតៃវ៉ាន់អាចត្រូវបានប្រើជាឧបករណ៍ចរចាជាមួយប្រទេសចិន ដែលអះអាងថាកោះនេះជាផ្នែកមួយនៃដែនដីរបស់ខ្លួន និងបានគំរាមប្រើកម្លាំងដើម្បីដណ្តើមយកកោះនេះ។
ចាប់តាំងពីពេលនោះមក រដ្ឋាភិបាលរបស់លោក Lai បានចេញមុខការពារជំហររបស់ខ្លួន ដោយទទូចថា គោលនយោបាយរបស់សហរដ្ឋអាមេរិកចំពោះតៃវ៉ាន់មិនបានផ្លាស់ប្តូរឡើយ ហើយលោក Trump ក៏មិនបានផ្តល់ការប្តេជ្ញាណាមួយដល់ចិន ពាក់ព័ន្ធនឹងការលក់អាវុធទៅឱ្យកោះនេះដែរ។
តៃវ៉ាន់ពឹងផ្អែកយ៉ាងខ្លាំងលើការគាំទ្ររបស់សហរដ្ឋអាមេរិក ដើម្បីទប់ស្កាត់ការវាយប្រហារដែលអាចកើតមានពីចិន ហើយក៏កំពុងស្ថិតក្រោមសម្ពាធយ៉ាងខ្លាំងឱ្យបង្កើនការចំណាយ តាមរយៈការវិនិយោគនៅក្នុងក្រុមហ៊ុនអាមេរិកផងដែរ។
កាលពីឆ្នាំ២០១៦ មិនយូរប៉ុន្មានបន្ទាប់ពីជ័យជម្នះក្នុងការបោះឆ្នោតលើកដំបូងរបស់លោក Trump ប្រធានាធិបតីជាប់ឆ្នោតរូបនេះ បានទទួលទូរស័ព្ទពីប្រធានាធិបតីតៃវ៉ាន់នៅពេលនោះ គឺលោកស្រី Tsai Ing-wen ដែលបានធ្វើឱ្យទីក្រុងប៉េកាំងខឹងសម្បារ និងធ្វើឱ្យអ្នកការទូត មេដឹកនាំពិភពលោក និងអ្នកតាមដានកិច្ចការចិនមានការភ្ញាក់ផ្អើលយ៉ាងខ្លាំង៕