លោក Trump នឹងប្រកាសយកពន្ធ ២៥ % ពីការនាំចូលដែក និង អាលុយមីញ៉ូមចូលអាមេរិក
លោក Trump នឹងប្រកាសយកពន្ធ ២៥ % ពីការនាំចូលដែក និង អាលុយមីញ៉ូមចូលអាមេរិក
អាមេរិក៖ លោក ប្រធានាធិបតី សហរដ្ឋអាមេរិក Donald Trump បាននិយាយថា លោកនឹងប្រកាសយកពន្ធនាំចូល មកក្នុងសហរដ្ឋអាមេរិក ចំនួន ២៥% លើដែក និងអាលុយមីញ៉ូមទាំងអស់ដែលនេះ ជាវិធានការមួយដែលនឹងមានផលប៉ះពាល់ខ្លាំងបំផុតនៅក្នុងប្រទេសកាណាដា។ នេះ បើតាមការចុះផ្សាយរបស់សារព័ត៌មាន BBC។
ប្រភពដដែលបន្តថា លោក Trump ក៏បាននិយាយផងដែរថាលោក នឹងចេញសេចក្តីប្រកាសផ្លូវការមួយនៅពេលក្រោយក្នុងសប្តាហ៍នេះ អំពីការដំឡើងពន្ធទៅវិញទៅមកលើប្រទេសទាំងអស់ ដែលពន្ធនាំចូលពីសហរដ្ឋអាមេរិក ប៉ុន្តែលោកមិនបានបញ្ជាក់ថា ប្រទេសណានឹងត្រូវកំណត់គោលដៅ ឬប្រសិនបើមានការលើកលែងណាមួយនោះទេ។
«ប្រសិនបើពួកគេគិតប្រាក់ពីយើង យើងនឹងគិតប្រាក់ពីពួកគេវិញ» ។ នេះ បើតាមលោក Trump បាននិយាយទៅកាន់ អ្នកយកព័ត៌មានអំពីផែនការរបស់លោកនៅពេលធ្វើដំណើរពីរមណីយដ្ឋាន Mar-a-Lago របស់លោកក្នុងរដ្ឋ Florida ទៅកាន់ Super Bowl ក្នុងទីក្រុង New Orleans កាលពីថ្ងៃអាទិត្យ។
បើតាម BBC ប្រទេសកាណាដា និងម៉ិកស៊ិក គឺជាដៃគូពាណិជ្ជកម្មដែកថែបដ៏ធំបំផុតរបស់សហរដ្ឋអាមេរិក ហើយប្រទេសកាណាដាគឺជាអ្នកផ្គត់ផ្គង់លោហៈអាលុយមីញ៉ូមដ៏ធំបំផុតដល់សហរដ្ឋអាមេរិក។
ក្នុងអំឡុងពេលអាណត្តិដំបូងរបស់លោក Trump បានដាក់ពន្ធ ២៥% លើការនាំចូលដែកថែប និង ១០ % លើការនាំចូលអាលុយមីញ៉ូមពីប្រទេសកាណាដា ម៉ិកស៊ិក និងសហភាពអឺរ៉ុប។ ប៉ុន្តែសហរដ្ឋអាមេរិកបានឈានដល់កិច្ចព្រមព្រៀង មួយឆ្នាំក្រោយមកជាមួយកាណាដា និងម៉ិកស៊ិក ដើម្បីបញ្ចប់ពន្ធគយទាំងនោះ ទោះបីជាពន្ធនាំចូលរបស់សហភាពអឺរ៉ុបនៅតែមានរហូតដល់ឆ្នាំ ២០២១ ក៏ដោយ។
ថ្លែងមុនពេលឡើង យន្តហោះ Air Force One លោក Trump បាននិយាយកាលពីថ្ងៃចន្ទថា លោកនឹងប្រកាសពន្ធលើ “មនុស្សគ្រប់គ្នា” សម្រាប់ដែកថែប និងអាលុយមីញ៉ូម។ លោកបានបន្តថា៖ «ដែកណាដែលចូលទៅក្នុងសហរដ្ឋអាមេរិកនឹងមានពន្ធ២៥%។
ជាការឆ្លើយតបតាមការការបង្ហោះតាមលើបណ្តាញសង្គមអ៊ីនធឺណិត លោក Doug Ford ចៅហ្វាយខេត្ត Ontario បានចោទប្រកាន់លោក Trump ពី «ការផ្លាស់ប្តូរគោលដៅ និងភាពវឹកវរឥតឈប់ឈរ ដែលធ្វើឱ្យសេដ្ឋកិច្ចប្រឈមនឹងហានិភ័យ» ខណៈ ផលិតកម្មដែករបស់ប្រទេសកាណាដាភាគច្រើនប្រមូលផ្តុំនៅក្នុងខេត្ត Ontarioរបស់ប្រទេសកាណាដា ។
ការអត្ថាធិប្បាយរបស់លោក Trump ក៏បណ្តាលឱ្យស្តុកដែកថែប និងក្រុមហ៊ុនផលិតរថយន្តធំៗរបស់កូរ៉េខាងត្បូងធ្លាក់ចុះផងដែរ។ កូរ៉េខាងត្បូងជាប្រទេសនាំចេញដែកដ៏សំខាន់ទៅកាន់អាមេរិក។
ភាគហ៊ុនរបស់ក្រុមហ៊ុនដែកថែប POSCO Holdings បានធ្លាក់ចុះដល់ទៅ ៣.៦% ខណៈដែលក្រុមហ៊ុន Hyundai Steel បានធ្លាក់ចុះដល់ទៅ ២.៩%។ ភាគហ៊ុនរបស់ក្រុមហ៊ុនផលិតរថយន្ត Kia Corp ក៏ធ្លាក់ចុះ ៣.៦% ផងដែរ ក្នុងអំឡុងពេលជួញដូរពេលព្រឹកថ្ងៃទី ១០ ខែកុម្ភៈ ឆ្នាំ ២០២៥។
ចំណាត់ការរបស់លោក Trump គឺជាការកើនឡើងដ៏សំខាន់មួយទៀតនៅក្នុងគោលនយោបាយពាណិជ្ជកម្មរបស់លោក ដែលបានជំរុញឱ្យមានការសងសឹកពីប្រទេសចិនរួចហើយ។ ពន្ធគយគឺជាផ្នែកកណ្តាលនៃចក្ខុវិស័យសេដ្ឋកិច្ចរបស់លោក Trump ខណៈលោក មើលឃើញថាវាជាមធ្យោបាយនៃការរីកលូតលាស់សេដ្ឋកិច្ចសហរដ្ឋអាមេរិក ការការពារការងារ និងការបង្កើនប្រាក់ចំណូលពន្ធ។
កាលពីដើមខែនេះ លោក Trump បានគំរាមយកពន្ធនាំចូល២៥ % លើផលិតផលកាណាដា និងម៉ិកស៊ិក ប៉ុន្តែក្រោយមកបានពន្យារពេលផែនការនោះរយៈពេល ៣០ ថ្ងៃ រហូតដល់ដើមខែមីនា បន្ទាប់ពីបាននិយាយទៅកាន់មេដឹកនាំនៃប្រទេសទាំងពីរ។ លោក ក៏បានយកនូវពន្ធថ្មីរបស់សហរដ្ឋអាមេរិកចំនួន ១០% លើទំនិញចិនទាំងអស់ដែលចូលមកក្នុងសហរដ្ឋអាមេរិក។ ជាការឆ្លើយតបវិញ ទីក្រុងប៉េកាំងបានសងសឹកជាមួយនឹងការកំណត់ពន្ធផ្ទាល់របស់ខ្លួនដែលបានចូលជាធរមានកាលពីថ្ងៃចន្ទ៕
