ឆ្នាំ២០២៤ កម្ពុជាទទួលបានភ្ញៀវទេសចរអន្តរជាតិ ៦.៧លាននាក់
ឆ្នាំ២០២៤ កម្ពុជាទទួលបានភ្ញៀវទេសចរអន្តរជាតិ ៦.៧លាននាក់
ភ្នំពេញ៖ មន្ត្រីជាន់ខ្ពស់ក្រសួងទេសចរណ៍ បានឱ្យដឹងថា ក្នុងឆ្នាំ២០២៤ កន្លងទៅ កម្ពុជាទទួលបានភ្ញៀវទេសចរអន្តរជាតិ ៦.៧លាននាក់ កើនឡើង ២២,៩ភាគរយ ធៀបនឹងឆ្នាំ២០២៣ ខណៈភ្ញៀវទេសចរជាតិមាន ២២,៥២លាននាក់ កើនឡើង ២០,១ភាគរយ ធៀបនឹងឆ្នាំ២០២៣ ដូចគ្នា។
លោក ប៉ាក់ សុខុម រដ្ឋលេខាធិការក្រសួងទេសចរណ៍ នៅថ្ងៃទី០៨ ខែឧសភានេះ បានឱ្យដឹងទៀតថា សម្រាប់ឆ្នាំ២០២៤ ដដែល ការលក់បណ្ណចូលទស្សនាតំបន់រមណីយដ្ឋានអង្គរមានចំនួន ១ ០២៣ ៦៨៨បណ្ណ កើនឡើង ២៨,២៧ភាគរយទទួលបានចំណូលសរុប ៤៧ ៨២៦ ៩៨១ដុល្លា កើនឡើង ២៨,៥៧ភាគរយធៀបនឹងឆ្នាំ២០២៣។
លោកបន្ថែមថា ដោយឡែកជើងហោះហើរអន្តរជាតិចូលមកកាន់ប្រទេសកម្ពុជាមានចំនួនសរុប ២៥ ១៧៥ជើង ដោយជើងហោះហើរចូលមកកាន់អាកាសយានដ្ឋានអន្តរជាតិសៀមរាបអង្គរ ទទួលបានចំនួន ៦ ៣២៨ជើង។
ជាមួយគ្នានេះ លោក ប៉ាក់ សុខុម បញ្ជាក់ថា ដើម្បីរួមចំណែកអភិវឌ្ឍវិស័យទេសចរណ៍ប្រកបដោយនិរន្តរភាព ភាពធន់ និងបរិយាបន្ន សូមស្នើឱ្យគ្រប់ភាគីពាក់ព័ន្ធទាំងថ្នាក់ជាតិ និងថ្នាក់ក្រោមជាតិ រួមគ្នាលើកកម្ពស់ការផ្សព្វផ្សាយទេសចរណ៍ ឱ្យបានកាន់តែទូលំទូលាយថែមទៀត ស្របតាមពាក្យស្លោក “ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍” ដែលដាក់ចេញដោយ សម្តេចតេជោ ហ៊ុន សែន និង “ទេសចរណ៍រីកលូតលាស់ក្នុងសន្តិភាព” ដែលដាក់ចេញដោយ សម្តេចធិបតី ហ៊ុន ម៉ាណែត នាយករដ្ឋមន្ត្រី និង “បុគ្គលម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់” ដែលដាក់ចេញដោយក្រសួងទេសចរណ៍៕
