លោក Trump និង លោក Erdogan ពិភាក្សាការបញ្ចប់សង្រ្គាម រុស្ស៊ីនៅអ៊ុយក្រែន និងសង្រ្គាមអ៊ីស្រាអែលនៅហ្គាហ្សា
លោក Trump និង លោក Erdogan ពិភាក្សាការបញ្ចប់សង្រ្គាម រុស្ស៊ីនៅអ៊ុយក្រែន និងសង្រ្គាមអ៊ីស្រាអែលនៅហ្គាហ្សា
អាមេរិក៖ ប្រធានាធិបតីសហរដ្ឋអាមេរិក លោក Donald Trump បាននិយាយថា លោកបានសន្ទនាតាមទូរស័ព្ទ ជាមួយសមភាគីទួរគីលោក Recep Tayyip Erdogan ដោយបានពិភាក្សាពីវិធីក្នុងការបញ្ចប់សង្រ្គាមរបស់ប្រទេសរុស្ស៊ីនៅអ៊ុយក្រែន ស៊ីរី និងសង្រ្គាមអ៊ីស្រាអែលនៅលើតំបន់ហ្គាហ្សា។
ក្នុងអំឡុងការហៅទូរស័ព្ទកាលពីថ្ងៃចន្ទ លោក Trump បាននិយាយថា លោក Erdogan បានអញ្ជើញលោកឱ្យទៅទស្សនកិច្ចនៅប្រទេស Turkiye ។ ជាមួយគ្នានេះ លោកក៏បានអញ្ជើញមេដឹកនាំទួរគីឱ្យទៅទស្សនកិច្ចនៅទីក្រុងវ៉ាស៊ីនតោនឌីស៊ីវិផងដែរ។ ទោះជាយ៉ាងណា ការអញ្ជើញគ្នាទៅវិញទៅមកនេះ មិនទាន់បានកំណត់កាលរិច្ឆេទច្បាស់លាស់នៅឡើយទេ ។
តាមការចុះផ្សាយរបស់ទូរទស្សន៍ Aljazeera ឱ្យដឹងថា លោក Erdogan បានអញ្ជើញលោក Trump សម្រាប់ដំណើរទស្សនកិច្ចមួយនៅក្នុងប្រទេស Turkiye ពិតប្រាកដមែន។
លោក Trump បានពណ៌នាទំនាក់ទំនងរបស់លោកជាមួយលោក Erdogan ថាល្អប្រសើរក្នុងអំឡុងពេលកាន់តំណែងដំបូងនៅសេតវិមាន។ លោក បាននិយាយថា ប្រទេសទាំងពីរនឹងសហការគ្នាលើការបញ្ចប់សង្គ្រាមនៅអ៊ុយក្រែន។
ជាសមាជិកអង្គការណាតូ ប្រទេសTurkiye បានព្យាយាមរក្សាទំនាក់ទំនងល្អជាមួយប្រទេសជិតខាងទាំងពីររបស់ខ្លួន ចាប់តាំងពីការឈ្លានពានរបស់រុស្ស៊ីមកលើអ៊ុយក្រែន និងបានធ្វើជាម្ចាស់ផ្ទះការពិភាក្សាពីរដងក្នុងគោលបំណងបញ្ចប់សង្រ្គាម។
ជាមួយគ្នានេះ លោក Erdogan ក៏បានលើកឡើងពីតម្រូវការបន្ទាន់សម្រាប់បទឈប់បាញ់នៅក្នុងតំបន់ Gaza ដោយព្រមានថាវិបត្តិមនុស្សធម៌របស់ខ្លួនបានឈានដល់ “កម្រិតធ្ងន់ធ្ងរ” ។ លើសពីនេះទៀត ប្រធានាធិបតីទួរគីក៏បានសង្កត់ធ្ងន់ផងដែរអំពីសារៈសំខាន់នៃ «ការផ្តល់ជំនួយមនុស្សធម៌ដោយគ្មានការរំខាន និងការបញ្ចប់ជាបន្ទាន់ចំពោះស្ថានភាពសោកនាដកម្មនេះ»។
ចំពោះ ប្រទេសជិតខាងស៊ីរី លោក Erdogan បានបញ្ជាក់ជាថ្មីនូវការប្តេជ្ញាចិត្តរបស់ Turkiye ក្នុងការរក្សាបូរណភាពទឹកដីរបស់ខ្លួន និងស្ដារស្ថិរភាពយូរអង្វែង។
កិច្ចខិតខំប្រឹងប្រែងរបស់សហរដ្ឋអាមេរិកក្នុងការបន្ធូរបន្ថយទណ្ឌកម្មលើប្រទេសស៊ីរី និងរដ្ឋាភិបាលថ្មីរបស់ខ្លួននឹងជួយជំរុញដំណើរការនោះទៅមុខ និងរួមចំណែកដល់សន្តិភាពក្នុងតំបន់។
ទាក់ទងនឹងទំនាក់ទំនងទ្វេភាគី លោក Erdogan បាននិយាយថា ទីក្រុងអង់ការ៉ានៅតែប្តេជ្ញាពង្រឹងកិច្ចសហប្រតិបត្តិការជាមួយទីក្រុងវ៉ាស៊ីនតោន ជាពិសេសក្នុងវិស័យការពារជាតិ។
ជាមួយគ្នានេះ លោក Trump គ្រោងនឹងធ្វើទស្សនកិច្ចនៅអារ៉ាប៊ីសាអូឌីត កាតា និងអារ៉ាប់រួមនៅសប្តាហ៍ក្រោយ៕
https://www.aljazeera.com/news/2025/5/5/erdogan-trump-phone-call-ukraine-russia-war-gaza-syria-us-turkiye-ties