សោកស្ដាយផង! ក្រុមបាល់ទាត់ព្រះខ័នរាជស្វាយរៀង អស់ឱកាសឡើងទៅកាន់វគ្គបន្ត ពានរង្វាង់ ASEAN Club Championship

សោកស្ដាយផង! ក្រុមបាល់ទាត់ព្រះខ័នរាជស្វាយរៀង អស់ឱកាសឡើងទៅកាន់វគ្គបន្ត ពានរង្វាង់ ASEAN Club Championship

ក្រុមព្រះខ័នរាជស្វាយរៀង របស់កម្ពុជា ក្រោមការដឹកនាំរបស់លោក Pep Munoz បានអស់ឱកាសឡើងទៅកាន់វគ្គបន្តហើយ បន្ទាប់ពីបានត្រឹមស្មើគ្នាជាមួយក្រុម Dong A Thanh Hoa FC របស់វៀតណាម ក្នុងលទ្ធផល ០ ទល់នឹង ០ ក្នុងពានរង្វាន់ ASEAN Club Championship ឆ្នាំ២០២៤-២៥។

តាមរយៈលទ្ធផល ស្មើគ្នានេះ ក្រុមទាំងពីរ បានចែកគ្នាម្នាក់មួយពិន្ទុ ដែលធ្វើឲ្យក្រុម Dong A Thanh Hoa មាន ៦ពិន្ទុ ឈរនៅលេខ៤ នៅសល់មួយប្រកួតក្នុងដៃ ចាំកាត់សេចក្ដីនៅប្រកួតចុងក្រោយ ខណៈក្រុមព្រះខ័នរាជស្វាយរៀង មានត្រឹម ៤ពិន្ទុប៉ុណ្ណោះ ឈរនៅលេខ៥ ដែលធ្វើឲ្យអស់ឱកាសឡើងទៅកាន់វគ្គបន្ត។

ដូច្នេះក្រុមព្រះខ័នរាជស្វាយរៀង នឹងត្រូវប្រកួតបង្រ្គប់កិច្ចនៅប្រកួតចុងក្រោយ ជាក្រុមក្រុមបាតតារាង Shan United របស់មីយ៉ាន់ម៉ា នៅថ្ងៃទី០៥ ខែកុម្ពៈ ឆ្នាំ២០២៥ នាពហុកីឡដ្ឋានជាតិអូឡាំពិក។

បច្ចុប្បន្ន ក្រុម BG Pathum United របស់ថៃ កំពុងឈរកំពូលតារាង មាន ៨ពិន្ទុ Terengganu របស់ម៉ាឡេស៊ី ឈរលេខ២ មាន ៧ពិន្ទុ ស្មើគ្នាជាមួយ PSM Makassar របស់ឥណ្ឌូណេស៊ី, ក្រុម Dong A Thanh Hoa របស់វៀតណាម ឈរលេខ៤ មាន ៦ពិន្ទុ ខណៈស្វាយរៀង ឈរនៅលេខ៥ មាន ៤ពិន្ទុ ស្របពេលដែល Shan United របស់មីយ៉ាន់ម៉ា ឈរបាតតារាង គ្មានពិន្ទុរាប់ឡើយ។

គួរបញ្ជាក់ថា ក្នុងពានរង្វាន់ ASEAN Club Championship Shopee Cup នេះ បន្ទាប់ពីការប្រកួតសន្សំពិន្ទុក្នុងពូល គឺត្រូវយកក្រុមលេខ១ និងលេខ២ ក្នុងពូល ឡើងទៅកាន់វគ្គពាក់កណ្ដាលផ្ដាច់ព្រ័ត្រ ខណៈក្រុមលេខ៣ ដល់លេខ៦ មិនអាចឡើងទៅកាន់វគ្គបន្តបានឡើយ៕