លោក ហ្សេលេនស្គី ព្រមានថា ការដកខ្លួនពី Donbas ដើម្បីទទួលការធានាសន្តិសុខពីអាមេរិក អាចប៉ះពាល់ដល់ការការពារអ៊ុយក្រែន

លោក ហ្សេលេនស្គី ព្រមានថា ការដកខ្លួនពី Donbas ដើម្បីទទួលការធានាសន្តិសុខពីអាមេរិក អាចប៉ះពាល់ដល់ការការពារអ៊ុយក្រែន

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelensky) បាននិយាយថា សហរដ្ឋអាមេរិកកំពុងពិចារណាផ្ដល់ការធានាសន្តិសុខក្រោយសង្គ្រាមដល់អ៊ុយក្រែន ប៉ុន្តែភ្ជាប់ជាមួយលក្ខខណ្ឌឱ្យទីក្រុងកៀវដកខ្លួនចេញពីតំបន់ ដុនបាស់ (Donbas) ដែលបច្ចុប្បន្នស្ថិតក្រោមការគ្រប់គ្រងរបស់រុស្ស៊ី ខណៈទីក្រុងវ៉ាស៊ីនតោនកំពុងជំរុញឱ្យមានការបញ្ចប់សង្គ្រាមឱ្យបានឆាប់រហ័ស។

នៅក្នុងបទសម្ភាសន៍ជាមួយទីភ្នាក់ងារសារព័ត៌មាន Reuters លោក ហ្សេលេនស្គី បានព្រមានថា លក្ខខណ្ឌបែបនេះអាចធ្វើឱ្យសមត្ថភាពការពាររបស់អ៊ុយក្រែនចុះខ្សោយ និងអាចជំរុញឱ្យទីក្រុងមូស្គូកាន់តែមានឥទ្ធិពល ខណៈភាពមិនច្បាស់លាស់នៅតែបន្តជុំវិញការគាំទ្ររបស់សហរដ្ឋអាមេរិកនៅពេលអនាគត ទោះបីមានជំនួយយោធាបន្តបន្ទាប់ក៏ដោយ។

លោកបានបញ្ជាក់ថា សហរដ្ឋអាមេរិកកំពុងពិភាក្សាអំពីការធានាសន្តិសុខក្នុងក្របខណ្ឌកិច្ចព្រមព្រៀងសន្តិភាព ប៉ុន្តែមានលក្ខខណ្ឌឱ្យអ៊ុយក្រែនប្រគល់ការគ្រប់គ្រងតំបន់ដុនបាស់ភាគខាងកើតឱ្យរុស្ស៊ី។

លោក ហ្សេលេនស្គី ក៏បានលើកឡើងថា ខណៈសហរដ្ឋអាមេរិកកំពុងផ្តោតលើភាពតានតឹងជាមួយអ៊ីរ៉ង់ ប្រធានាធិបតី ដូណាល់ ត្រាំ កំពុងដាក់សម្ពាធលើអ៊ុយក្រែន ដើម្បីបញ្ចប់សង្គ្រាមដែលបានបន្តអស់រយៈពេលជាង ៤ ឆ្នាំ ចាប់តាំងពីរុស្ស៊ីបានបើកការឈ្លានពានទ្រង់ទ្រាយធំលើអ៊ុយក្រែនក្នុងឆ្នាំ ២០២២។

លោកបាននិយាយថា បញ្ហានៅតំបន់មជ្ឈិមបូព៌ាកំពុងមានឥទ្ធិពលយ៉ាងខ្លាំងលើការសម្រេចចិត្តរបស់លោក ត្រាំ ហើយតាមការយល់ឃើញរបស់លោក ប្រធានាធិបតីអាមេរិកកំពុងជ្រើសយុទ្ធសាស្ត្រដាក់សម្ពាធបន្ថែមលើអ៊ុយក្រែន ដើម្បីជំរុញឱ្យមានកិច្ចព្រមព្រៀងសន្តិភាពឆាប់រហ័ស។

សង្គ្រាមនេះបានបណ្តាលឱ្យមនុស្សរាប់សែននាក់ស្លាប់ និងបំផ្លាញផ្នែកធំៗនៃអ៊ុយក្រែន ក្លាយជាជម្លោះដែលបង្ហូរឈាមខ្លាំងបំផុតនៅអឺរ៉ុប ចាប់តាំងពីសង្គ្រាមលោកលើកទី២។

មេដឹកនាំអ៊ុយក្រែនបានបញ្ជាក់ជាបន្តបន្ទាប់ថា ការធានាសន្តិសុខដ៏រឹងមាំពីដៃគូអន្តរជាតិ គឺជាកត្តាចាំបាច់ ដើម្បីធានាថា រុស្ស៊ីនឹងមិនបើកការវាយប្រហារឡើងវិញ បន្ទាប់ពីកិច្ចព្រមព្រៀងសន្តិភាពណាមួយត្រូវបានសម្រេច។

យោងតាមលោក ហ្សេលេនស្គី សំណួរសំខាន់ពីរដែលនៅមិនទាន់ដោះស្រាយបាន គឺ៖
ទីមួយ តើនរណានឹងជួយផ្តល់មូលនិធិសម្រាប់ការទិញអាវុធរបស់អ៊ុយក្រែន ដើម្បីរក្សាសមត្ថភាពរារាំងផ្នែកយោធា។
ទីពីរ តើសម្ព័ន្ធមិត្តនឹងឆ្លើយតបយ៉ាងដូចម្តេច ប្រសិនបើរុស្ស៊ីបើកការឈ្លានពានម្ដងទៀតនៅពេលអនាគត។

លោក ហ្សេលេនស្គី បាននិយាយថា ភាគីអាមេរិកត្រៀមផ្តល់ការធានាទាំងនេះក្នុងកម្រិតខ្ពស់ ប៉ុន្តែមានលក្ខខណ្ឌឱ្យអ៊ុយក្រែនដកខ្លួនចេញពីតំបន់ដុនបាស់។

នៅខាងភាគីរុស្ស៊ី ប្រធានាធិបតី វ្ល៉ាឌីមៀ ពូទីន បានបញ្ជាក់ជាច្រើនដងថា ការគ្រប់គ្រងតំបន់ដុនបាស់ទាំងមូល គឺជាគោលដៅសំខាន់មួយនៃសង្គ្រាម ហើយទីក្រុងមូស្គូមានបំណងសម្រេចគោលដៅនេះនៅលើសមរភូមិ ប្រសិនបើមិនអាចធ្វើបានតាមការចរចា។

ទោះយ៉ាងណា អ្នកវិភាគយោធាចង្អុលបង្ហាញថា ការរីកចម្រើនរបស់កងទ័ពរុស្ស៊ីមានល្បឿនយឺតក្នុងរយៈពេលពីរឆ្នាំចុងក្រោយ ហើយការដណ្តើមយកតំបន់ដុនបាស់ទាំងមូលអាចត្រូវការពេលវេលាយូរ និងកម្លាំងយោធាច្រើន។

លោក ហ្សេលេនស្គី បានព្រមានថា ការដកខ្លួនចេញពីតំបន់នេះ អាចប៉ះពាល់ដល់សន្តិសុខទាំងអ៊ុយក្រែន និងអឺរ៉ុប ព្រោះវាមានន័យថា អ៊ុយក្រែននឹងបោះបង់ទីតាំងការពារដ៏រឹងមាំមួយឱ្យរុស្ស៊ី។

លោកបានមានប្រសាសន៍ថា៖
“សម្រាប់យើង ផ្នែកខាងកើតនៃប្រទេសគឺជាផ្នែកមួយនៃការធានាសន្តិសុខដ៏សំខាន់។”

សេតវិមានមិនទាន់ឆ្លើយតបភ្លាមៗចំពោះសំណើសុំអត្ថាធិប្បាយលើបញ្ហានេះទេ។

លោក ហ្សេលេនស្គី ក៏បានបញ្ជាក់ថា ឯកសារធានាសន្តិសុខរវាងអ៊ុយក្រែន និងសហរដ្ឋអាមេរិក ត្រូវបានរៀបចំរួចរាល់ប្រហែល ១០០% ហើយកំពុងរង់ចាំការចុះហត្ថលេខា ប៉ុន្តែក្រោយកិច្ចពិភាក្សារវាងមន្ត្រីអាមេរិក និងអ៊ុយក្រែននៅទីក្រុង ម៉ៃអាមី កាលពីពេលថ្មីៗនេះ នៅតែមានបញ្ហាមួយចំនួនដែលត្រូវបន្តពិភាក្សា។

មេដឹកនាំអ៊ុយក្រែនក៏បានព្រមានថា រុស្ស៊ីកំពុងភ្នាល់ថា សហរដ្ឋអាមេរិកនឹងបាត់បង់ចំណាប់អារម្មណ៍លើសង្គ្រាម ប្រសិនបើកិច្ចចរចាសន្តិភាពជាប់គាំង។ ទោះយ៉ាងណា លោកបានសួរថា តើរុស្ស៊ីមានឆន្ទៈលះបង់ទាហានរាប់ម៉ឺននាក់បន្ថែមទៀត ដើម្បីដណ្តើមយកដែនដីប្រហែល ៦,០០០ គីឡូម៉ែត្រការ៉េ នៅក្នុងតំបន់ Donbas ដែលខ្លួនមិនទាន់គ្រប់គ្រងឬយ៉ាងដូចម្តេច។

លោកបានលើកឡើងថា កិច្ចប្រជុំកំពូលរវាងលោក ត្រាំ, លោក ពូទីន និងលោកផ្ទាល់ អាចជាមធ្យោបាយតែមួយ ដើម្បីដោះស្រាយបញ្ហាដីធ្លី និងការធានាសន្តិសុខដែលនៅសល់។

ក្នុងពេលជាមួយគ្នានេះ លោក ហ្សេលេនស្គី ក៏បានអរគុណរដ្ឋបាលអាមេរិក ដែលបន្តផ្គត់ផ្គង់ប្រព័ន្ធការពារមីស៊ីល Patriot ដល់អ៊ុយក្រែន ទោះបីមានតម្រូវការកើនឡើងខ្លាំងដោយសារជម្លោះផ្សេងៗក៏ដោយ។

លោកបាននិយាយថា ការផ្គត់ផ្គង់មិនត្រូវបានផ្អាកឡើយ ប៉ុន្តែបរិមាណនៅមិនទាន់គ្រប់គ្រាន់សម្រាប់តម្រូវការរបស់អ៊ុយក្រែន។