ខេត្តតាកែវ ប្រកាសមុនគេ រៀបចំផ្សាយបន្តផ្ទាល់ការប្រកួតវគ្គផ្ដាច់ព្រ័ត្របាល់ទាត់ជម្រើសជាតិនារីកម្ពុជា នៅសួនច្បារមាត់បឹងតាកែវ

ខេត្តតាកែវ ប្រកាសមុនគេ រៀបចំផ្សាយបន្តផ្ទាល់ការប្រកួតវគ្គផ្ដាច់ព្រ័ត្របាល់ទាត់ជម្រើសជាតិនារីកម្ពុជា នៅសួនច្បារមាត់បឹងតាកែវ

ដើម្បីចូលរួមគាំទ្រដល់ក្រុមកីឡាបាល់ទាត់ជម្រើសជាតិនារីកម្ពុជា ក្នុងការប្រកួតវគ្គផ្តាច់ព្រាត់ AFF WOMEN’S CUP 2024 ប្រកួតជាមួយនឹងក្រុមបាត់ទាត់ជម្រើសជាតិនារីឥណ្ឌូនេស៊ី នៅថ្ងៃទី ០៥ ខែធ្នូ ឆ្នាំ២០២៤ វេលាម៉ោង៧ :៣០ នាទីយប់ រដ្ឋបាលខេត្តតាកែវ នឹងរៀបចំឱ្យមានការផ្សាយបន្តផ្ទាល់ នៅបរិវេណសួនច្បារមាត់បឹងតាកែវ។ ដូច្នេះសូមគោរពអញ្ជើញបងប្អូនចូលរួមទស្សនា និងគាំទ្រឲ្យបានច្រើនកុះករ។

ក្រុមជម្រើសជាតិនារីកម្ពុជា ក្រោមការដឹកនាំរបស់គ្រូបង្វឹក លោក ឃួន ឡាបូរ៉ាវី បានឡើងទៅកាន់វគ្គផ្តាច់ព្រ័ត្រជាលើកដំបូង ក្នុងប្រវត្តិសាស្រ្តបាល់ទាត់នារីកម្ពុជា នៃពានរង្វាន់ AFF Women’s Cup 2024 ក្រោយឈ្នះ ក្រុមទីម័រខាងកើត នៅវគ្គពាក់កណ្ដាលផ្ដាច់ព្រ័ត្រ ក្នុងលទ្ធផល ៣-០។

ក្នុងការប្រកួតវគ្គផ្តាច់ព្រាត់ AFF WOMEN’S CUP នេះ ក្រុមបាល់ទាត់នារីជម្រើសជាតិកម្ពុជា បានប្រកួតស្មើជាមួយក្រុមខ្លាំងឥណ្ឌូនេស៊ី ក្នុងលទ្ធផល ០ទល់នឹង០ ហើយបន្ទាប់យកឈ្នះ ម៉ាឡេស៊ី ក្នុងលទ្ធផល ២-០ មុនពេលលត់ ក្រុមទីម័រខាងកើត ក្នុងលទ្ធផល ៣-០ នៅវគ្គពាក់កណ្ដាលផ្ដាច់ព្រ័ត្រ។

ទាំងក្រុមបាល់ទាត់នារីកម្ពុជា និងក្រុមបាល់ទាត់នារីឥណ្ឌូណេស៊ី ស៊ុតតែជាក្រុមខ្លាំងការពារដូចគ្នា ពោលគឺក្រុមទាំងពីរមិនទាន់របូតគ្រាប់បាល់សូម្បីតែមួយគ្រាប់។ យ៉ាងណា កម្ពុជា ហាក់ធ្វើបានល្អជាងដោយស៊ុតបានចំនួន ៥គ្រាប់ ខណៈ ឥណ្ឌូណេស៊ី ស៊ុតបានចំនួន៤គ្រាប់។

ក្រឡែកទៅមើលស្ថិតិកាលជួបគ្នាក្នុងវគ្គសន្សុំពិន្ទុក្នុងពូល ដែលស្មើគ្នា ០-០ គេសង្កេតឃើញថា កម្ពុជា ក៏នៅតែធ្វើបានល្អជាង ឥណ្ឌូណេស៊ី ដដែល ពោលគឺកម្ពុជា ស៊ុតបាន ៩ជើង ត្រូវគោលដៅ ១ជើង ខណៈ ឥណ្ឌូណេស៊ី ស៊ុតបាន ៧ជើង ត្រូវគោលដៅ ១ជើងដូចគ្នា ប៉ុន្តែសម្រាប់ឱកាសគ្រោះថ្នាក់កម្ពុជា មានរហូតដល់ ៥១ដង ស្របពេលដែល ឥណ្ឌូណេស៊ី មានតែ ៣២ដងប៉ុណ្ណោះ ហើយសូម្បីតែបាល់ជ្រុងក៏កម្ពុជា លើស ឥណ្ឌូណេស៊ី ចំនួន ២ដង។

សម្រាប់ពានរង្វាន់ AFF Women’s Cup 2024 ប្រព្រឹត្តទៅចាប់ពីថ្ងៃទី២៣ ខែវិច្ឆិកា ដល់ថ្ងៃទី០៥ ខែធ្នូ ឆ្នាំ២០២៤ នៅប្រទេសឡាវ។ សម្រាប់ក្រុមជម្រើសជាតិនារីកម្ពុជាវិញ ធ្លាប់បានចូលរួមចំនួន ៣លើក នៅឆ្នាំ២០១៨ ២០១៩ និង២០២២ តែមិនដែលឆ្លងផុតវគ្គចែកពូលឡើយ។

គួរបញ្ជាក់ថា ពានរង្វាន់ជើងឯកផ្នែកនារី ប្រចាំតំបន់អាស៊ាន ASEAN Women’s Cup 2024នេះ មានក្រុមចូលរួមចំនួន៦ បែងចែកជា ២ពូល ដែលពូល A មាន៖ ទីម័រខាងកើត សិង្ហបុរី និងឡាវ ចំណែក ពូល B មាន៖ ឥណ្ឌូណេស៊ី កម្ពុជា និងម៉ាឡេស៊ី។ ដោយក្នុង១ពូល គេយក ២ក្រុម លេខ១ និងលេខ២ ឡើងទៅវគ្គពាក់កណ្ដាលផ្តាច់ព្រ័ត្រ៕