សោកស្ដាយផង! ក្រុមជម្រើសជាតិនារីកម្ពុជា ទទួលបានជើងឯករង ក្នុងពានរង្វាន់ AFF Women’s Cup 2024

សោកស្ដាយផង! ក្រុមជម្រើសជាតិនារីកម្ពុជា ទទួលបានជើងឯករង ក្នុងពានរង្វាន់ AFF Women’s Cup 2024

ក្រុមជម្រើសជាតិនារីកម្ពុជា ក្រោមការដឹកនាំរបស់គ្រូបង្វឹក លោក ឃួន ឡាបូរ៉ាវី ទទួលបានជើងឯករង ក្នុងពានរង្វាន់ AFF Women’s Cup 2024 ក្រោយទទួលបរាជ័យនៅវគ្គផ្ដាច់ព្រ័ត្រទល់នឹងក្រុម ឥណ្ឌូនេស៊ី ក្នុងលទ្ធផល កម្ពុជា ១-៣ ឥណ្ឌូនេស៊ី នាកីឡដ្ឋាន New Laos National Stadium នៅរាត្រីថ្ងៃទី៥ ធ្នូ ២០២៤។

នៅដើមតង់ទី១ ឥណ្ឌូណេស៊ី បើកការនាំមុខកម្ពុជា ១គ្រាប់មុន យ៉ាងណាដល់នាទីទី៣១ កីឡាការិនី ហុក សៅឌី របស់កម្ពុជា តាមស្មើ ១-១ វិញ។ ៣នាទី ក្រោយមក ឥណ្ឌូណេស៊ី រកបាន ១គ្រាប់ទៀត នាំមុនកម្ពុជា ជាថ្មី។ ចប់តង់ទី១ ឥណ្ឌូណេស៊ី ២-១ កម្ពុជា។ លុះចូលដល់តង់២ ឥណ្ឌូណេស៊ី បានបន្ថែម ១គ្រាប់ទៀត ចប់ការប្រកួត ឥណ្ឌូណេស៊ី យកឈ្នះកម្ពុជា ៣-១ គ្រង់ជើងឯកនៃពានរង្វាន់ AFF Women’s Cup 2024។

សម្រាប់ចំណាត់ថ្នាក់លេខ៣ បានទៅលើក្រុមជម្រើសជាតិនារីសិង្ហបុរី បន្ទាប់ពីបានយកឈ្នះ ទីម័រ ខាងកើត ក្នុងលទ្ធផល ១-០ នាកីឡដ្ឋាន New Laos National Stadium ។ ដូច្នេះ ឥណ្ឌូណេស៊ី កម្ពុជា និងសិង្ហបុរី កក់កៅអីទៅកាន់ AFF Women’s Cup 2025។

ទោះបីជាទទួលបានត្រឹមជើងឯករង តែកីឡាការិនី ពឿន គន្ធា របស់កម្ពុជា បានឈ្នះ ស្បែកជើងមាស ក្នុងនាមជាអ្នករកបានគ្រាប់បាល់ច្រើនជាងគេ ដែលរកបាន៣គ្រាប់។

ទោះបីជាក្រុមជម្រើសជាតិនារីកម្ពុជា បានត្រឹមជើងឯករង ក៏ពួកយើងសូមកោតសរសើរនូវសមិទ្ធផល ដែលកីឡាការិនីយើងបានខិតខំប្រឹងប្រែងរហូតឈានមកដល់ “វគ្គផ្ដាច់ព្រ័ត្រ” ជាដំបូងក្នុងប្រវត្តិសាស្រ្តបាល់ទាត់នារីកម្ពុជា។ ហើយពួកយើង ក៏សូមថ្លែងអំណរគុណដល់បងប្អូនទាំងអស់គ្នា ដែលបានចូលរួមគាំទ្រក្រុមជម្រើសជាតិនារីកម្ពុជាផងដែរ ពួកយើងសង្ឃឹមថាក្រុមជម្រើសជាតិនារីកម្ពុជា នឹងនាំជោគជ័យជាបន្តបន្ទាប់ ក្នុងពានរង្វាន់ក្រោយៗ ខាងមុខ។

សម្រាប់ពានរង្វាន់ AFF Women’s Cup 2024 ប្រព្រឹត្តទៅចាប់ពីថ្ងៃទី២៣ ខែវិច្ឆិកា ដល់ថ្ងៃទី០៥ ខែធ្នូ ឆ្នាំ២០២៤ នៅប្រទេសឡាវ។ សម្រាប់ក្រុមជម្រើសជាតិនារីកម្ពុជាវិញ ធ្លាប់បានចូលរួមចំនួន ៣លើក នៅឆ្នាំ២០១៨ ២០១៩ និង២០២២ តែមិនដែលឆ្លងផុតវគ្គចែកពូលឡើយ។

គួរបញ្ជាក់ថា ពានរង្វាន់ជើងឯកផ្នែកនារី ប្រចាំតំបន់អាស៊ាន ASEAN Women’s Cup 2024នេះ មានក្រុមចូលរួមចំនួន៦ បែងចែកជា ២ពូល ដែលពូល A មាន៖ ទីម័រខាងកើត សិង្ហបុរី និងឡាវ ចំណែក ពូល B មាន៖ ឥណ្ឌូណេស៊ី កម្ពុជា និងម៉ាឡេស៊ី។ ដោយក្នុង១ពូល គេយក ២ក្រុម លេខ១ និងលេខ២ ឡើងទៅវគ្គពាក់កណ្ដាលផ្តាច់ព្រ័ត្រ៕