អបអរសាទរ! ក្រុមជម្រើសជាតិនារីកម្ពុជា ឡើងទៅកាន់វគ្គពាក់កណ្ដាលផ្ដាច់ព្រ័ត្រ AFF Women’s Cup ជាលើកដំបូងក្នុងប្រវត្តិសាស្រ្ត

ដោយ៖ Chhan Sreyka | 4 ម៉ោងមុន កីឡា

ទីបំផុត! ក្រុមជម្រើសជាតិនារីកម្ពុជា ក្រោមការដឹកនាំរបស់គ្រូបង្វឹក លោក ឃួន ឡាបូរ៉ាវី បានកក់កៅអីវគ្គពាក់កណ្តាលផ្តាច់ព្រ័ត្រ ក្នុងពានរង្វាន់ AFF Women’s Cup 2024 ជាលើកដំបូង ក្នុងប្រវត្តិសាស្រ្តបាល់ទាត់នារីកម្ពុជា ក្រោយឈ្នះ ក្រុមនារីម៉ាឡេស៊ី ក្នុងលទ្ធផល ២-០ កាលពីថ្ងៃទី២៩ ខែវិច្ឆិកា ម្សិលមិញនេះ។

ប្រកួតដែលធ្វើឡើងនៅឯកីឡដ្ឋាន New Laos National Stadium កាលពីម្សិលមិញនេះ ក្រុមបាល់ទាត់នារីជម្រើសជាតិកម្ពុជា បានបំបាក់ ម៉ាឡេស៊ី ក្នុងលទ្ធផល ២ទល់នឹង០ រកបានដោយកីឡាការិនី ពឿន គន្ធា និងកីឡាការិនី ឈិត សាភឿន។ ក្រោយឆ្លងកាតការប្រកួតចំនួន២ប្រកួត កម្ពុជា ឈរកំពូលតារាងពូល B មាន ៤ពិន្ទុ ស្មើគ្នាជាមួយក្រុមលេខ២ ឥណ្ឌូណេស៊ី ខណៈម៉ាឡេស៊ី អាលអាវត្រឹមវគ្គនេះ។

លទ្ធផលការប្រកួតទាំង២ប្រកួតរបស់ ៖
-ថ្ងៃទី២៣ ខែវិច្ឆិកា ឆ្នាំ២០២៤ ឥណ្ឌូណេស៊ី ០-០ កម្ពុជា
-ថ្ងៃទី២៩ ខែវិច្ឆិកា ឆ្នាំ២០២៤ កម្ពុជា ២-០ ម៉ាឡេស៊ី។

ក្នុងវគ្គពាក់កណ្ដាលផ្ដាច់ព្រ័ត្រ ក្រុមនារីកម្ពុជា ត្រូវជួបទីម័រខាងកើត ចំណែក ឥណ្ឌូណេស៊ី ប៉ះ សិង្ហបុរី ខណៈការប្រកួតធ្វើឡើងនៅថ្ងៃទី០២ ខែធ្នូ ឆ្នាំ២០២៤។

សម្រាប់ពានរង្វាន់ AFF Women’s Cup 2024 ប្រព្រឹត្តទៅចាប់ពីថ្ងៃទី២៣ ខែវិច្ឆិកា ដល់ថ្ងៃទី០៥ ខែធ្នូ ឆ្នាំ២០២៤ នៅប្រទេសឡាវ។ សម្រាប់ក្រុមជម្រើសជាតិនារីកម្ពុជាវិញ ធ្លាប់បានចូលរួមចំនួន ៣លើក នៅឆ្នាំ២០១៨ ២០១៩ និង២០២២ តែមិនដែលឆ្លងផុតវគ្គចែកពូលឡើយ។

គួរបញ្ជាក់ថា ពានរង្វាន់ជើងឯកផ្នែកនារី ប្រចាំតំបន់អាស៊ាន ASEAN Women’s Cup 2024នេះ មានក្រុមចូលរួមចំនួន៦ បែងចែកជា ២ពូល ដែលពូល A មាន៖ ទីម័រខាងកើត សិង្ហបុរី និងឡាវ ចំណែក ពូល B មាន៖ ឥណ្ឌូណេស៊ី កម្ពុជា និងម៉ាឡេស៊ី។ ដោយក្នុង១ពូល គេយក ២ក្រុម លេខ១ និងលេខ២ ឡើងទៅវគ្គពាក់កណ្ដាលផ្តាច់ព្រ័ត្រ៕