រសៀលនេះ! ក្រុមគោព្រៃកម្ពុជា ប៉ះ ឆាយនីស តៃប៉ិ នៅពហុកីឡដ្ឋានជាតិអូឡាំពិក

រសៀលនេះ! ក្រុមគោព្រៃកម្ពុជា ប៉ះ ឆាយនីស តៃប៉ិ នៅពហុកីឡដ្ឋានជាតិអូឡាំពិក

នៅល្ងាចថ្ងៃសុក្រ ទី១១ ខែតុលា ឆ្នាំ២០២៤ វេលាម៉ោង ៧យប់នេះ ក្រុមជម្រើសជាតិកម្ពុជា ក្រោមការដឹកនាំរបស់លោក លោក Koji Gyotoku នឹងបើកពហុកីឡដ្ឋានជាតិ(អូឡាំពិក) ទទួលស្វាគមន៍ក្រុមជម្រើសជាតិឆាយនីស តៃប៉ិ ក្នុងជំនួបមិត្តភាពអន្តរជាតិ។

ការប្រកួតនៅល្ងាចនេះ គឺជាការដឹកនាំក្រុមជម្រើសជាតិឈុតធំលើកដំបូងរបស់ លោក Koji Gyotoku ក្នុងនាមជាអ្នកចាត់ការទូទៅ បន្ទាប់ពីទទួលបានការតែងតាំងពីសហព័ន្ធកីឡាបាល់ទាត់កម្ពុជា កាលពីខែមុន ជំនួសលោក Felix Dalmas។

មែនទែនទៅ និយាយពីប្រវត្តិជួបគ្នា រវាងកម្ពុជា និងឆាយនីសតៃប៉ិ គិតត្រឹមឆ្នាំ ២០១៤ គេសង្កេតឃើញថា ក្រុមគោព្រៃកម្ពុជា ហាក់ធ្វើបានល្អជាង ពោលគឺ ៣លើកចុងក្រោយ កម្ពុជា ឈ្នះ២ និងស្មើ១។ សម្រាប់ស្ថិតិស៊ុតបញ្ជូលទីវិញ ក្រុមទាំងពីរ មិនដែលស៊ុតគ្នាលើសពី ២គ្រាប់ឡើយ។

ទោះបីជាយ៉ាងណាក៏ដោយ ប្រវត្តិសាស្រ្តអាចនឹងច្រំដែល ហើយក៏អាចនឹងផ្លាស់ប្ដូរ ដ្បិតមួយរយៈពេលចុងក្រោយនេះ កម្ពុជា ហាក់ធ្វើមិនបានល្អនោះទេ ស្របពេលដែល ឆាយនីសតៃប៉ិ មកលើកនេះ មិនមែនដូចពេលមុននោះទេ ពោលគឺមានកីឡាករចូលសញ្ជាតិចំនួន ៥រូបផងដែរ មានដូចជា៖ កីឡាករ 𝗔𝗻𝗴𝗲 𝗞𝗼𝘂𝗮𝗺é, 𝗝𝗮𝘀𝗼𝗻 𝗛𝘀𝘂, 𝗠𝗶𝗴𝘂𝗲𝗹 𝗦𝗮𝗻𝗱𝗯𝗲𝗿𝗴, 𝗘𝗺𝗶𝗹𝗶𝗼 𝗘𝘀𝘁𝗲𝘃𝗲𝘇 និងកីឡាករ 𝗗𝗲𝗿𝗿𝗲𝗸 𝗖𝗵𝗮𝗻។

ចំណែកកម្ពុជាយើងវិញ លោក Koji Gyotoku បានកោះហៅកីឡាករចំនួន២៦នាក់ ក្នុងនោះ មានកីឡាករកូនកាត់ និងចូលសញ្ជាតិមួយចំនួនផងដែរ ដូចជា កាន់ ម៉ូ, មីហ្សូណូ, ឡេង ណូរ៉ា, យូដៃ អូកាវ៉ា, ថេឡរ នីកូឡាស់ និងលីម អារុណ រ៉េយមិន។

គួរបញ្ជាក់ថា បន្ទាប់ពីការប្រកួតជាមួយ ឆាយនីស តៃប៉ិ ក្រុមជម្រើសជាតិកម្ពុជា នឹងត្រូវធ្វើដំណើរទៅសួរសុខទុក្ខក្រុមហុងកុង នៅថ្ងៃទី១៥ ខែតុលា ឆ្នាំ២០២៤ នាកីឡដ្ឋាន Hong Kong Stadium៕