យុវជនចំនួន ១,៦៦២នាក់ ទទួលបានការបណ្តុះបណ្តាលបដិសណ្ឋារកិច្ច ក្នុងរយៈពេល៩ខែ ឆ្នាំ២០២៣

យុវជនចំនួន ១,៦៦២នាក់ ទទួលបានការបណ្តុះបណ្តាលបដិសណ្ឋារកិច្ច ក្នុងរយៈពេល៩ខែ ឆ្នាំ២០២៣

ភ្នំពេញ៖ យុវជនចំនួន ១,៦៦២នាក់ ដោយក្នុងនោះ មានស្ត្រី ១,០៣៤នាក់ ទទួលបានការបណ្តុះបណ្តាលបដិសណ្ឋារកិច្ច ក្នុងរយៈពេល៩ខែ ឆ្នាំ២០២៣ តាមរយៈគណៈកម្មការគ្រប់គ្រងគម្រោង ហូកា(HoKa) នៃក្រសួងទេសចរណ៍។

របាយការណ៍ស្តីពីវឌ្ឍនភាពការងាររបស់លេខាធិការដ្ឋាន នៃគណៈកម្មការគ្រប់គ្រងគម្រោង ហូកា ក្នុងកិច្ចប្រជុំប្រចាំត្រីមាសទី៣ ថ្ងៃទី០២ ខែវិច្ឆិកា ឆ្នាំ២០២៣ នៅរមណីយដ្ឋាន ភូមិខ្មែររីស៊ត ខេត្តរតនគិរី បានឱ្យដឹងថា កម្មវិធីបណ្តុះបណ្តាលបដិសណ្ឋារកិច្ចកម្ពុជា ផ្តល់នូវចំណេះ ជំនាញពិត ដល់យុវជនក្នុងខេត្តគោលដៅគម្រោងចំនួន ១០ខេត្តទូទាំងប្រទេស ក្រោមកិច្ចសហការជាមួយអង្គកា Swisscontact Cambodia។

របាយការណ៍នេះបន្តថា គណៈកម្មការគ្រប់គ្រងគម្រោង ហូកា និងមន្ទីរទេសចរណ៍ខេត្តគោលដៅទាំង១០ ក្រោមកិច្ចសហការយ៉ាងល្អប្រសើរជាមួយកម្មវិធីអភិវឌ្ឍន៍ជំនាញ វិស័យឯកជន សមាគមឧស្សាហកម្មទេសចរណ៍ សាលាបណ្តុះបណ្តាលវិជ្ជាជីវៈទេសចរណ៍ និងដៃគូពាក់ព័ន្ធ តែងតែជួបប្រជុំជាប្រចាំ និងរួមគ្នាដោះស្រាយនូវបញ្ហាប្រឈមនានា ដើម្បីធានាបានការបណ្តុះបណ្តាលប្រកបដោយគុណភាព និងប្រសិទ្ធភាព សំដៅលើកកម្ពស់គុណភាពសេវាកម្មទេសចរណ៍ និងអភិវឌ្ឍអាជីពការងាររបស់យុវជនងាយរងគ្រោះឱ្យកាន់តែប្រសើរ។

កាលពីពេលថ្មីៗកន្លងទៅនេះ កម្មវិធីហូកា នៃគម្រោងអភិវឌ្ឍន៍ជំនាញ-Hoka of the Skill Development Programme (គ.គ.ហ.) នៃក្រសួងទេសចរណ៍បានរៀបចំដោយជោគជ័យ ទិវាជំនាញ ហូកា ឆ្នាំ២០២៣ ក្រោមប្រធានបទ “ជំនាញវិជ្ជាជីវៈទេសចរណ៍ ជាអាយុជីវិតរបស់អ្នក។ ទិវានេះពិតជាមានសារសំខាន់ ដើម្បីបង្ហាញពីគំនិតផ្តួចផ្តើម និងសមិទ្ធផលសម្រេចបាននៃការអនុវត្តកម្មវិធីបណ្តុះបណ្តាលបដិសណ្ឋារកិច្ចកម្ពុជា របស់ គ.គ.ហ.។

តាមរយៈទិវាជំនាញ ហូកា ដៃគូពាក់ព័ន្ធនានា រួមមានវិស័យសាធារណៈ វិស័យឯកជន សាលាបណ្តុះបណ្តាលវិជ្ជាជីវៈទេសចរណ៍ និងអ្នកជំនាញទេសចរណ៍បានចូលរួមចែករំលែកចែករំលែកបទពិសោធន៍ជោគជ័យ និងបានផ្តល់ធាតុចូលសំខាន់ៗ ដើម្បីពង្រឹងទាំងបរិមាណ និងគុណភាពអ្នកជំនាញក្នុងវិស័យទេសចរណ៍។

ព្រឹត្តិការណ៍នេះ ក៏នឹងមានការបង្ហាញជំនាញបដិសណ្ឋារកិច្ច ដោយមន្ទីរទេសចរណ៍ខេត្តគោលដៅគម្រោងលើជំនាញរៀបចំបន្ទប់ រៀបចំតុអាហារ បត់កន្សែង លាយស្រា ឆុងការហ្វេ និងសេវាកម្មស្រាទំពាំងបាយជូរ សំដៅលើកម្ពស់ការយល់ដឹងលើជំនាញនីមួយៗ។ កម្មវិធីបណ្តុះបណ្តាល ហូកា ត្រូវបានអនុវត្តក្រោមកិច្ចសហការរវាងក្រសួងទេសចរណ៍ និងកម្មវិធីអភិវឌ្ឍន៍ជំនាញ ដែលជាគម្រោងរបស់ទីភ្នាក់ងារស្វីស សម្រាប់ការអភិវឌ្ឍ និងកិច្ចសហប្រតិបត្តិការក្នុងខេត្តគោលដៅចំនួនដប់៕