លោក Donald Trump បានលើកឡើងថា តម្លៃប្រេងខ្ពស់គឺជាសញ្ញាវិជ្ជមាន បន្ទាប់ពីលោកធ្លាប់អួតអំពីតម្លៃប្រេងសាំងទាបកាលពីខែមុន។

ដោយ៖ Chhan Sreyka | 2 ម៉ោងមុន ព័ត៌មានអន្តរជាតិ

វ៉ាស៊ីនតោន៖ ចាប់តាំងពីការកើតមានជម្លោះជាមួយ Iran ដែលបណ្តាលឱ្យតម្លៃប្រេង និងប្រេងសាំងកើនឡើង ប្រធានាធិបតី Donald Trump បានផ្លាស់ប្តូរទស្សនៈពីការផ្តោតលើការរក្សាតម្លៃថាមពលឱ្យទាប មកពិចារណាថា តម្លៃប្រេងខ្ពស់អាចមានអត្ថប្រយោជន៍សម្រាប់សេដ្ឋកិច្ចសហរដ្ឋអាមេរិក។

ទស្សនៈនេះកើតឡើង ខណៈក្រុមការងាររបស់លោកកំពុងព្យាយាមរៀបចំផែនការច្បាស់លាស់ ដើម្បីបើកការធ្វើចរាចរណ៍នៅ Strait of Hormuz ដែលជាច្រកសមុទ្រសំខាន់សម្រាប់ការដឹកជញ្ជូនប្រេង និងឧស្ម័នធម្មជាតិ ទៅកាន់ទីផ្សារពិភពលោក។

លោក Trump បានសរសេរនៅលើបណ្តាញសង្គមរបស់លោកកាលពីថ្ងៃព្រហស្បតិ៍ថា៖
“សហរដ្ឋអាមេរិកគឺជាអ្នកផលិតប្រេងធំបំផុតនៅលើពិភពលោក ដូច្នេះនៅពេលតម្លៃប្រេងឡើងថ្លៃ យើងក៏រកប្រាក់ចំណូលបានច្រើនផងដែរ។”

ប៉ុន្តែ តែប៉ុន្មានសប្ដាហ៍មុន នៅក្នុងសុន្ទរកថា State of the Union លោកបានអួតថា តម្លៃប្រេងសាំងនៅសហរដ្ឋអាមេរិកមានត្រឹម ២,៣០ ដុល្លារ ក្នុងមួយហ្គាឡុង ប៉ុណ្ណោះ។ បច្ចុប្បន្ន តម្លៃមធ្យមជាតិបានកើនឡើងដល់ប្រហែល ៣,៦០ ដុល្លារ ក្នុងមួយហ្គាឡុង បើយោងតាម AAA។

ការផ្លាស់ប្តូរទស្សនៈនេះបង្ហាញពីភាពស្មុគស្មាញនៃផលប្រយោជន៍នយោបាយក្នុងស្រុក និងការបង្ហាញឥទ្ធិពលយោធារបស់សហរដ្ឋអាមេរិកលើឆាកអន្តរជាតិ។ វាកើតឡើងក្នុងពេលដែលគណបក្សរបស់លោកកំពុងប្រឈមមុខនឹងការបោះឆ្នោតពាក់កណ្តាលអាណត្តិខែវិច្ឆិកាខាងមុខ។

លោក Trump ក៏បានអះអាងថា តម្លៃប្រេងសាំងខ្ពស់ជាកត្តាមួយដែលជួយឱ្យលោកឈ្នះអ្នកកាន់តំណែងមុន គឺ Joe Biden។ ទោះជាយ៉ាងណា លោកបានប្រាប់អ្នកសារព័ត៌មានថា លោកមិនព្រួយបារម្ភចំពោះការកើនឡើងនៃថ្លៃថាមពល ដែលអាចប៉ះពាល់ដល់អ្នកបោះឆ្នោតនៅឆ្នាំនេះឡើយ។

កាលពីថ្ងៃព្រហស្បតិ៍ ធនាគារវិនិយោគ Goldman Sachs បានព្រមានថា តម្លៃប្រេងខ្ពស់អាចបណ្តាលឱ្យអតិផរណាកើនឡើង កំណើនសេដ្ឋកិច្ចយឺត និងអត្រាគ្មានការងារធ្វើកើនឡើងនៅចុងឆ្នាំ។

ក្នុងពេលតែមួយ តម្លៃប្រេងឆៅនៅទីផ្សារពិភពលោកក៏បានកើនឡើងយ៉ាងខ្លាំង ដោយសារការរំខានក្នុងការដឹកជញ្ជូនតាម Strait of Hormuz។ កាលពីថ្ងៃព្រហស្បតិ៍ តម្លៃប្រេងឆៅពិភពលោកបានឡើងដល់ប្រហែល ១០០ ដុល្លារ ក្នុងមួយបារ៉ែល។

អ្នកវិភាគពី Oxford Economics បានបញ្ជាក់ថា ការឡើងចុះនៃតម្លៃប្រេងក្នុងប៉ុន្មានថ្ងៃចុងក្រោយនេះគួរឱ្យកត់សម្គាល់ ហើយភាពអស្ថិរភាពនឹងនៅតែបន្ត ដោយសារមិនទាន់មានភាពច្បាស់លាស់ថា តើជម្លោះនឹងថយចុះនៅពេលណា និងពេលណាចរាចរណ៍នាវានៅច្រកសមុទ្រ Hormuz នឹងវិលត្រឡប់ទៅធម្មតាវិញ។

រដ្ឋបាលសេតវិមានក៏កំពុងពិចារណាវិធានការជាច្រើន ដើម្បីបន្ថយសម្ពាធតម្លៃថាមពល រួមទាំងការបញ្ចេញប្រេងពីទុនបម្រុងយុទ្ធសាស្ត្រ និងការសម្រួលច្បាប់ដឹកជញ្ជូនមួយចំនួន។

ទោះយ៉ាងណា អ្នកសេដ្ឋកិច្ច Joe Brusuelas ពីក្រុមហ៊ុនប្រឹក្សា RSM បាននិយាយថា វិធានការទាំងនេះអាចជួយបន្ថយសម្ពាធតម្លៃបានតែបណ្តោះអាសន្នប៉ុណ្ណោះ។

ក្នុងការសម្ភាសន៍ជាមួយទូរទស្សន៍ CNBC រដ្ឋមន្ត្រីថាមពល Chris Wright បានទទួលស្គាល់ថា ជម្លោះនេះកំពុងបង្កឱ្យមាន “ការរំខានដ៏សំខាន់” ចំពោះទីផ្សារថាមពលក្នុងរយៈពេលខ្លី។

លោកបានបន្ថែមថា កងទ័ពអាមេរិកនៅពេលនេះកំពុងផ្តោតលើការកាត់បន្ថយសមត្ថភាពយោធារបស់ Iran ហើយមិនទាន់អាចកំណត់ពេលវេលាច្បាស់លាស់ថា ពេលណានាវាដឹកប្រេងអាចធ្វើដំណើរឆ្លងកាត់ Strait of Hormuz បានដោយសុវត្ថិភាពវិញឡើយ៕

តម្លៃប្រេងឡើងថ្លៃ