ដឹងទេថា តើលោក Oleg Starynskyi និយាយអ្វីខ្លះ ក្រោយបង្កើតប្រវត្តិសាស្រ្តថ្មី យកឈ្នះក្លិបមកពីអូស្ត្រាលី Macarthur FC

ដឹងទេថា តើលោក Oleg Starynskyi និយាយអ្វីខ្លះ ក្រោយបង្កើតប្រវត្តិសាស្រ្តថ្មី យកឈ្នះក្លិបមកពីអូស្ត្រាលី Macarthur FC

កាលពីយប់មិញនេះ លោក Oleg Starynskyi បានសាងប្រវត្តិសាស្រ្តថ្មីមួយទៀត សម្រាប់បាល់ទាត់កម្ពុជា ក្រោយដឹកនាំក្លិបបាល់ទាត់ភ្នំពេញក្រោន យកឈ្នះក្រុមខ្លាំងរបស់អូស្រ្តាលី Macarthur FC ក្នុងលទ្ធផល ៣-០ នៃការប្រកួតវគ្គជម្រុះពូល F ពានរង្វាន់ AFC Cup 2023/24។

ក្រោយចប់ការប្រកួត លោក Oleg Starynskyi បានលើកឡើងយ៉ាងដូច្នេះថា៖«វាគឺជាការឈានទៅមុខដ៏សំខាន់ សម្រាប់បាល់ទាត់កម្ពុជា ដែលឱ្យយើងយល់ថា យើងអាចប្រជែង និងលេងជាមួយពួកគេបាន។ ខ្ញុំសង្ឃឹមថា ជ័យជម្នះនេះ នឹងធ្វើឱ្យយើងមានភាពជឿជាក់ដើម្បីទទួលបានសមិទ្ធផលបន្ថែមទៀតនាពេលខាងមុខ»។

លោកបានបន្តថា៖« យើងលេងបាល់ទាត់តាមរបៀបរបស់យើងជាមួយនឹងជំនឿចិត្ត។ ការការពារ និងការវាយបកមិនមែនជាអ្វីដែលយើងចូលចិត្តនោះទេ ដូច្នេះខ្ញុំពិតជាសរសើរកីឡាករទាំងអស់ ដែលបានខំប្រឹងក្នុងការធ្វើការងារដ៏អស្ចារ្យនេះ។ យើងបានលេងដោយភាពជឿជាក់ ខ្ញុំបានប្រាប់កីឡាករថា ត្រូវបន្តដាក់សម្ពាធទៅកាន់ Macarthur ព្រោះនេះគឺជាការប្រកួតក្នុងដីរបស់យើង ពួកគេក៏មានសម្ពាធ ហើយយើងក៏កំពុងតែគ្រប់គ្រងការប្រកួតផងដែរ។

លោកបានបន្តទៀតថា៖ «ខ្ញុំធ្លាប់និយាយកាលពីមុនហើយ យើងលេងដោយទំនុកចិត្ត តាមស្ទាយរបស់យើងដើម្បីបង្កើតឱកាស។ ខ្ញុំដឹងថាបើសិនជាយើងលេងចង់តែការពារវាយបកការប្រកួតទំនងមិនកើតឡើងដូចនេះទេ។ ខ្ញុំកោតសរសើរដល់កីឡាករសម្រាប់ការប្រឹងប្រែងដោយធ្វើវាបានយើងអស្ចារ្យ។ ជាពិសេសនោះគឺបេះដូងកីឡាករ ទោះបីជាជួបក្រុមមកពីអឺរ៉ុប ក៏នៅតែលេងដោយទំនុកចិត្ត»។

លោកបានសង្គត់ធ្ងន់ថា៖«ការប្រកួតជាមួយ Macarthur នៅអូស្រ្តាលី វាពិតជាការប្រកួតដែលពិបាកខ្លាំងសម្រាប់យើង ហើយនេះ គឺជាការសាកល្បងដ៏ពិតប្រាកដមួយ។ យើងនឹងបន្តលេងដោយភាពជឿជាក់គ្រប់ការប្រកួតប្រជែងទាំងអស់»៕