លោក Putin ចេញមុខចង់ជួយស្ដារស្ថិរភាពនៅមជ្ឈិមបូព៌ា

លោក Putin ចេញមុខចង់ជួយស្ដារស្ថិរភាពនៅមជ្ឈិមបូព៌ា

MOSCOW, ថ្ងៃទី២ ខែមីនា ឆ្នាំ២០២៣ (Reuters) ៖ ប្រធានាធិបតីរុស្ស៊ី លោក Vladimir Putin បានធ្វើការហៅទូរស័ព្ទជាបន្តបន្ទាប់ទៅកាន់មេដឹកនាំប្រទេសក្នុងតំបន់ឈូងសមុទ្រអារ៉ាប់ចំនួនបួន កាលពីថ្ងៃចន្ទ ដោយស្នើឱ្យប្រើប្រាស់ទំនាក់ទំនងរបស់ទីក្រុងមូស្គូជាមួយ Iran ដើម្បីជួយស្ដារភាពស្ងប់ស្ងាត់នៅតំបន់មជ្ឈិមបូព៌ា បន្ទាប់ពីការវាយប្រហារតាមផ្លូវអាកាសរបស់សហរដ្ឋអាមេរិក និងអ៊ីស្រាអែល ដែលរុស្ស៊ីបានថ្កោលទោស។

យោងតាមវិមានក្រឹមឡាំង លោកពូទីនបានពិភាក្សាជាមួយមេដឹកនាំនៃ United Arab Emirates, Bahrain, Saudi Arabia និង Qatar ដោយរិះគន់ការវាយប្រហារលើអ៊ីរ៉ង់ថា ជាសកម្មភាពដែលអាចធ្វើឱ្យស្ថានការណ៍កាន់តែតានតឹង។

វិមានក្រឹមឡាំងបានបញ្ជាក់ថា រុស្ស៊ីនៅតែរក្សាទំនាក់ទំនងជាប្រចាំជាមួយថ្នាក់ដឹកនាំអ៊ីរ៉ង់ ហើយចាត់ទុកភាពជាដៃគូយុទ្ធសាស្ត្រជាមួយទីក្រុងតេអេរ៉ង់ថា ជាចំណុចសំខាន់ក្នុងការរក្សាឥទ្ធិពលរបស់ខ្លួននៅមជ្ឈិមបូព៌ា។ ឥទ្ធិពលរបស់រុស្ស៊ីក្នុងតំបន់នេះត្រូវបានគេមើលថាបានថយចុះ បន្ទាប់ពីសម្ព័ន្ធមិត្តស៊ីរីរបស់ខ្លួន គឺប្រធានាធិបតី Bashar al-Assad ត្រូវបានផ្តួលរំលំ កាលពីប្រមាណ១៥ខែមុន។

ទោះបីរុស្ស៊ីអាចទទួលផលប្រយោជន៍ពីការកើនឡើងនៃតម្លៃប្រេង និងការផ្លាស់ប្តូរការផ្តោតអារម្មណ៍របស់ទីក្រុងវ៉ាស៊ីនតោនចេញពីអ៊ុយក្រែនក៏ដោយ ក៏ការកើនឡើងនៃជម្លោះតាមផ្លូវអាកាសនៅមជ្ឈិមបូព៌ា មិនសមស្របនឹងគោលបំណងរបស់ទីក្រុងមូស្គូដែលចង់ឃើញរបបពិភពលោកពហុភាគី ដោយមិនឲ្យប្រទេសតែមួយមានឥទ្ធិពលលើសគេឡើយ។

បណ្ដាប្រទេសអារ៉ាប់នៅតំបន់ឈូងសមុទ្រ ដែលជាសម្ព័ន្ធមិត្តជិតស្និទ្ធរបស់សហរដ្ឋអាមេរិក បានរងការវាយប្រហារដោយយន្តហោះដ្រូន និងមីស៊ីល បន្ទាប់ពីការវាយប្រហារលើអ៊ីរ៉ង់កាលពីថ្ងៃសៅរ៍។ ស្ថានការណ៍នេះបានបង្កើនការព្រួយបារម្ភអំពីហានិភ័យនៃការពង្រីកជម្លោះក្នុងតំបន់។

យោងតាមសេចក្តីថ្លែងការណ៍វិមានក្រឹមឡាំង ក្នុងការហៅទូរស័ព្ទជាមួយប្រធានាធិបតីអេមីរ៉ាតអារ៉ាប់រួម Mohamed bin Zayed Al Nahyan លោកពូទីនបានស្នើឱ្យរុស្ស៊ីដើរតួនាទីជាអន្តរការី ដោយបញ្ជូនការព្រួយបារម្ភរបស់អេមីរ៉ាតអារ៉ាប់រួមទៅកាន់ទីក្រុងតេអេរ៉ង់។ ភាគីទាំងពីរបានសង្កត់ធ្ងន់លើតម្រូវការសម្រាប់បទឈប់បាញ់ជាបន្ទាន់ និងការវិលត្រឡប់ទៅកាន់ដំណើរការនយោបាយ និងការទូត។

ក្នុងការពិភាក្សាជាមួយមេដឹកនាំប្រទេសកាតា លោក Tamim bin Hamad Al Thani ភាគីទាំងពីរបានបង្ហាញការព្រួយបារម្ភអំពីការពង្រីកជម្លោះ និងហានិភ័យនៃការចូលរួមពីប្រទេសទីបី។ ខណៈក្នុងការហៅទូរស័ព្ទជាមួយព្រះមហាក្សត្របារ៉ែន Hamad bin Isa Al Khalifa លោកពូទីនបានបញ្ជាក់ថា រុស្ស៊ីត្រៀមខ្លួនរួចជាស្រេចក្នុងការចូលរួមជួយធ្វើឲ្យស្ថានការណ៍មានស្ថិរភាព។

ក្នុងការហៅចុងក្រោយ ព្រះអង្គម្ចាស់រាជទាយាទអារ៉ាប៊ីសាអូឌីត Mohammed bin Salman បានលើកឡើងថា រុស្ស៊ីអាចដើរតួនាទីស្ថិរភាពបាន ដោយសារទំនាក់ទំនងជិតស្និទ្ធរបស់ខ្លួនជាមួយទាំងអ៊ីរ៉ង់ និងបណ្តាប្រទេសក្នុងតំបន់ឈូងសមុទ្រ។

កាលពីថ្ងៃអាទិត្យ លោកពូទីនបានថ្កោលទោសការសម្លាប់មេដឹកនាំកំពូលអ៊ីរ៉ង់ Ali Khamenei ថាជាសកម្មភាពដែលអាចបង្កការកើនឡើងជម្លោះយ៉ាងធ្ងន់ធ្ងរ។ ក្រសួងការបរទេសរុស្ស៊ីក៏បានចោទប្រកាន់សហរដ្ឋអាមេរិក និងអ៊ីស្រាអែលថា បានធ្វើឱ្យតំបន់មជ្ឈិមបូព៌ាចូលទៅក្នុងវដ្តនៃភាពតានតឹងដែលពិបាកគ្រប់គ្រង។

ទន្ទឹមនឹងនេះ ទីក្រុងមូស្គូក៏បង្ហាញបំណងរក្សាការសន្ទនាជាមួយរដ្ឋបាលរបស់ប្រធានាធិបតី Donald Trump ខណៈដែលទីក្រុងវ៉ាស៊ីនតោនកំពុងសម្របសម្រួលកិច្ចចរចាសន្តិភាពពាក់ព័ន្ធនឹងអ៊ុយក្រែន។ អ្នកនាំពាក្យវិមានក្រឹមឡាំង Dmitry Peskov បានថ្លែងថា រុស្ស៊ីមានផលប្រយោជន៍ផ្ទាល់ខ្លួនដែលត្រូវការការពារ ហើយចង់ឱ្យដំណើរការចរចានោះបន្តទៅមុខ៕