ក្រុមជម្រើសជាតិនារីកម្ពុជា អាចសាងប្រវត្តិសាស្រ្តថ្មី ឡើងទៅកាន់វគ្គផ្ដាច់ព្រ័ត្រ AFF Women’s Cup បានទេ ល្ងាចនេះ

ក្រុមជម្រើសជាតិនារីកម្ពុជា អាចសាងប្រវត្តិសាស្រ្តថ្មី ឡើងទៅកាន់វគ្គផ្ដាច់ព្រ័ត្រ AFF Women’s Cup បានទេ ល្ងាចនេះ

ក្រុមជម្រើសជាតិនារីកម្ពុជា ក្រោមការដឹកនាំរបស់គ្រូបង្វឹក លោក ឃួន ឡាបូរ៉ាវី ត្រូវជួបជាមួយក្រុមជម្រើសជាតិនារីទីម័រខាងកើត នៅវេលាម៉ោង ៣៖០០នាទីរសៀល ថ្ងៃ ចន្ទ ទី០២ ខែធ្នូ ឆ្នាំ២០២៤នេះ ក្នុងការប្រកួតវគ្គពាក់កណ្តាលផ្តាច់ព្រ័ត្រ នៃពានរង្វាន់ AFF Women’s Cup 2024 ដែលរៀបចំឡើងក្នុងប្រទេសឡាវ។

ថ្លែងក្នុងសន្និសីទសារព័ត៌មានមុនការប្រកួត គ្រូបង្វឹកក្រុមជម្រើសជាតិនារីកម្ពុជា លោក ឃួន ឡាបូរ៉ាវី បានលើកឡើងថា៖« ពួកយើងរីករាយណាស់ ដែលបានឡើងមកកាន់វគ្គពាក់កណ្តាលផ្តាច់ព្រ័ត្រនេះ។ យើងទាំងអស់គ្នា បានខិតខំប្រឹងប្រែងយ៉ាងខ្លាំងជាពិសេសកីឡាការិនីរបស់យើង ពួកគាត់បានបង្កើតប្រវត្តិសាស្ត្រថ្មី មួយទៀតសម្រាប់បាល់ទាត់កម្ពុជា ហើយក្រុមទាំងមូលបានដាក់គោលដៅហើយថា នឹងយកពានរង្វាន់មួយនេះ។ ពួកយើងនឹងធ្វើឱ្យបានល្អក្នុងការប្រកួតនៅថ្ងៃស្អែកនេះ ហើយយើងសង្ឃឹមថា អ្នកគាំទ្រនឹងគាំទ្រ លើកទឹកចិត្តពួកយើងបន្ថែមទៀត»។

មែនទែនទៅ នេះគឺជាការឡើងមកកាន់វគ្គពាក់កណ្តាលផ្តាច់ព្រ័ត្រ លើកដំបូងហើយរបស់ក្រុមនារីកម្ពុជា ក្នុងពានរង្វាន់មួយនេះ ខណៈការចូលរួមចំនួន ៣លើក នៅឆ្នាំ ២០១៨, ២០១៩ និង២០២២ កម្ពុជា មិនដែលឆ្លងផុតវគ្គចែកពូលឡើយ។

យ៉ាងណាមុនឡើងមកដល់វគ្គនេះ ក្រុមជម្រើសជាតិនារីកម្ពុជា ពិតជាធ្វើឲ្យអ្នកគាំទ្រមានការភ្ញាក់ផ្អើល ដោយបានប្រកួតស្មើជាមួយ ឥណ្ឌូណេស៊ី ០-០ ក្នុងប្រកួតបើកឆាក និងបានយកឈ្នះ ម៉ាឡេស៊ី ក្នុងលទ្ធផល ២-០ នៅប្រកួតទី២ ដែលធ្វើឲ្យកម្ពុជា ឡើងមកកាន់វគ្គពាក់កណ្តាលផ្តាច់ព្រ័ត្រនេះ ក្នុងនាមជាក្រុមលេខ១ ក្នុងពូល B។

ក្នុងវគ្គពាក់កណ្ដាលផ្ដាច់ព្រ័ត្រនេះ ផងដែរ ក្រុមជម្រើសជាតិនារីឥណ្ឌូណេស៊ី ដែលឡើងមកជាមួយកម្ពុជា ក្នុងនាមជាក្រុមលេខ២ ក្នុងពូល B ត្រូវប៉ះជាមួយ ក្រុមជម្រើសជាតិនារីសិង្ហបុរី នៅថ្ងៃទី០២ ខែធ្នូ ឆ្នាំ២០២៤ វេលាម៉ោង ៧៖៣០នាទីយប់ នៅកីឡដ្ឋាន New Laos National Stadium, Vientiane ។

គួរបញ្ជាក់ថា ពានរង្វាន់ជើងឯកផ្នែកនារី ប្រចាំតំបន់អាស៊ាន ASEAN Women’s Cup 2024 នេះ មានក្រុមចូលរួមចំនួន៦ បែងចែកជា ២ពូល ដែលពូល A មាន៖ ទីម័រខាងកើត សិង្ហបុរី និងឡាវ ចំណែក ពូល B មាន៖ ឥណ្ឌូណេស៊ី កម្ពុជា និងម៉ាឡេស៊ី។ ដោយក្នុង១ពូល គេយក ២ក្រុម លេខ១ និងលេខ២ ឡើងទៅវគ្គពាក់កណ្ដាលផ្តាច់ព្រ័ត្រ៕