David de Gea សង្គ្រោះបាល់ប៉េណាល់ទី ២គ្រាប់ ជួយ Fiorentina យកឈ្នះ AC Milan

David de Gea សង្គ្រោះបាល់ប៉េណាល់ទី ២គ្រាប់ ជួយ Fiorentina យកឈ្នះ AC Milan

(បាល់ទាត់)៖ អតីតអ្នកចាំទីរបស់ក្រុមបិសាចក្រហម Manchester United កីឡាករ David de Gea ធ្វើឲ្យមានការភ្ញាក់ផ្អើលយ៉ាងខ្លាំង ដោយសង្គ្រោះបាល់ប៉េណាល់ទីចំនួន២គ្រាប់ ដែលជួយឲ្យក្រុម Fiorentina ផ្តួលក្រុម AC Milan ក្នុងលទ្ធផល ២-១ ក្នុងទីក្រុង Florence កាលពីយប់ថ្ងៃអាទិត្យ។

ការប្រកួតយប់មិញនេះ កីឡាករ Maignan របស់ AC Milan ជាអ្នកសង្រ្គោះបាល់ប៉េណាល់ទី បានមុន ពីការស៊ុតរបស់កីឡាករ Fiorentina Moise Kean នៅនាទី២២ មុនពេលដែល Yacine Adli ស៊ុតគ្រាប់បាល់នាំមុខឲ្យក្រុម Fiorentina ១-០។ លុះចុងម៉ោងទៅហើយ AC Milan ទទួលបានបាល់ប៉េណាល់ទី ហើយកីឡាករ Theo Hernandez ជាអ្នករ៉ាប់រង ប៉ុន្តែត្រូវបានសង្រ្គោះដោយ David de Gea ហើយចប់តង់ទី១ Fiorentina ១-០ AC Milan។

ចូលដល់វគ្គទី២ នៅនាទី៥៦ AC Milan ទទួលបានបាល់ប៉េណាល់ទី១គ្រាប់ទៀត លើកនេះ Tammy Abraham ជាអ្នកស៊ុតវិញម្ដង ហើយ David de Gea នៅតែសង្រ្គោះបានដដែល។ រហូតដល់នាទី៦០ ទើប AC Milan អាចស៊ុតបញ្ជូលទីបាន ពីសំណាក់កីឡាករ Christian Pulisic តែទោះបីជាយ៉ាងណា Albert Gudmundsson បាស៊ុតគ្រាប់បាល់ជ័យជំនះឲ្យFiorentina នៅនាទី៧៣។ ចប់ការប្រកួត៩០នាទី Fiorentina ២-១ AC Milan ហើយ David de Gea ជាវីរៈបុរសជួយសង្រ្គោះក្រុម។

ការសង្រ្គោះបាល់យប់មិញនេះ De Gea បានបង្កើតប្រវត្តិសាស្ត្រថ្មីសម្រាប់ខ្លួនឯង ដោយបានក្លាយជាអ្នកចាំទីដំបូងគេ ដែលអាចសង្គ្រោះបាល់ប៉េណាល់ទី២លើកក្នុងមួយប្រកួត ក្នុងការប្រកួត Serie A ចាប់តាំងពី Federico Marchetti ធ្លាប់ធ្វើបាន កាលពីខែឧសភា ឆ្នាំ ២០១៦។
វាគឺជាការផ្លាស់ប្តូរគួរឱ្យកត់សម្គាល់មួយ ដោយនៅ Manchester United កីឡាករអេស្ប៉ាញរូបនេះ បានសង្គ្រោះបាល់ប៉េណាល់ទី បានតែ ៧ដងប៉ុណ្ណោះ ក្នុងរយៈពេល ១២ឆ្នាំ ប៉ុន្តែអ្នកគាំទ្របិសាចក្រហមមួយចំនួន កំពុងមានអារម្មណ៍អាឡោះអាល័យចំពោះកីឡាករដែលមិនត្រូវបានផ្តល់ឱកាសក្នុងការបន្តកិច្ចសន្យារបស់គាត់នៅ Old Trafford ក្រោមការដឹកនាំរបស់លោក Ten Hug។

គួរបញ្ជាក់ថា បច្ចុប្បន្ន Fiorentina កំពុងស្ថិតក្នុងចំណាត់ថ្នាក់ទី១១ ក្នុងក្របខ័ណ្ឌ Serie A មាន ១០ពិន្ទុ ដោយចាញ់ក្រុម Napoli ដែលកំពុងឈរកំពូលតារាង ចំនួន ៦ពិន្ទុប៉ុណ្ណោះ៕