ស្ដេចប្រដាល់អាស៊ី Many Pacquiao នឹងប្រកួតជាមួយ Buakaw នៅដើមឆ្នាំក្រោយ

ស្ដេចប្រដាល់អាស៊ី Many Pacquiao នឹងប្រកួតជាមួយ Buakaw នៅដើមឆ្នាំក្រោយ

ប្រដាល់ ៖ ពិភពលោកនឹងបានឃើញការប្រគួតដ៏វិសេសមួយរវាងអ្នកប្រដាល់ជើងខ្លាំងពីររូបក្នុងកម្មវិធី The Match of Legends រវាងស្ដេចប្រដាល់អាស៊ី Manny Pacquiao និងស្ដេចប្រដាល់ថៃ Buakaw Banchamek នៅខែមករា ឆ្នាំក្រោយ នៅប្រទេសថៃ។

Manny Pacquiao ដែលជាម្ចាស់ខ្សែក្រវាត់ប្រដាល់ពិភពលោកជាច្រើនគ្រឿង ដែលបានព្យួរស្រោមដៃជាមួយនឹងកំណត់ត្រាឈ្នះ ៦២ ចាញ់ ៨ និងស្មើ ២ប្រកួត បន្ទាប់ពីឈ្នះជើងឯកធំៗចំនួន ១២ ក្នុងប្រភេទទម្ងន់ចំនួន ៨ នឹងជួបជាមួយអ្នកប្រដាល់ថៃ Buakaw Banchamek នេះបើតាមការបញ្ជាក់របស់ Fresh Air Festival Co, Ltd ដែលជាអ្នករៀបចំព្រឹត្តិការណ៍ក្នុងសន្និសីទសារព័ត៌មាន កាលពីពេលថ្មីៗនេះ។

ការប្រកួតរវាង Pacquiao និង Buakaw អាចជាឱកាសម្តងក្នុងមួយជីវិត សម្រាប់អ្នកគាំទ្រក្នុងប្រទេសថៃ ដើម្បីបានឃើញអត្តពលិកកីឡាប្រយុទ្ធដ៏អស្ចារ្យបំផុតចំនួនពីររូប ប្រកួតលើសង្វៀនតែមួយ។ ការប្រកួតនេះ នឹងត្រូវប្រកួតក្រោមច្បាប់ប្រដាល់អន្តរជាតិ ដែលធ្វើឲ្យការប្រកួតប្រវត្តិសាស្ត្រនេះ កាន់តែជក់ចិត្ត។

លោក Vinij Lertratanachai នាយកប្រតិបត្តិនៃក្រុមហ៊ុន Fresh Air Festival Co, Ltd បាននិយាយថា៖« យើងមានកិត្តិយសណាស់ ដែលមាន Manny Pacquiao និង Buakaw Banchamek សម្រាប់ព្រឹត្តិការណ៍ប្រវត្តិសាស្ត្រនេះ។ វាជាឱកាសម្តងក្នុងមួយជីវិត ដែលអ្នកមិនចង់ខកខាន»។

គួរបញ្ជាក់ថា Pacquiao គឺជាវីរបុរសមួយរូបក្នុងប្រទេសហ្វីលីពីន ហើយត្រូវបានគេស្គាល់ ដោយសារការខិតខំប្រឹងប្រែងឥតឈប់ឈរនៃឧត្តមភាព និងការលះបង់ឥតងាករេ ដើម្បីលើកមុខមាត់ប្រទេសជាតិ។ គាត់បានក្លាយជាជើងខ្លាំងប្រដាល់ និងជាអ្នកបំផុសគំនិតដល់អត្តពលិក និងអ្នកគាំទ្រទូទាំងពិភពលោក។ សមត្ថភាពរបស់គាត់នៅលើសង្វៀនអស់រយៈពេលជាច្រើនឆ្នាំ បានធ្វើឱ្យគាត់មានការទទួលស្គាល់ និងការគោរពជាសកល។

ចំណែក Buakaw ជាតំណាង Muay Thai និង kickboxing ក្នុងប្រទេសថៃ។ Buakaw បានធ្វើឱ្យអ្នកគាំទ្រថៃស្ញប់ស្ញែង នឹងការប្រកួតរបស់គេ។ គាត់បានឈ្នះជើងឯក និងពានរង្វាន់ជាច្រើន ហើយត្រូវបានគេចាត់ទុកថា ជាអ្នកប្រដាល់ Muay Thai ដ៏អស្ចារ្យបំផុតគ្រប់ពេល ឬស្ដេចប្រដាល់ថៃ។
សំបុត្រសម្រាប់ទស្សនាការប្រកួតដ៏អស្ចារ្យនេះ នឹងចេញលក់ក្នុងពេលឆាប់ៗនេះ៕