Marco Asensio ចុះហត្ថលេខាលើកិច្ចសន្យារយៈពេល ៣ឆ្នាំ ជាមួយ PSG

Marco Asensio ចុះហត្ថលេខាលើកិច្ចសន្យារយៈពេល ៣ឆ្នាំ ជាមួយ PSG

តារាឆ្នើមសញ្ជាតិអេស្ប៉ាញ កីឡាករ Marco Asensio បានចុះកិច្ចសន្យារយៈពេល ៣ឆ្នាំជាមួយក្លិបយក្សបារាំង PSG ដោយក្លាយជាកីឡាករថ្មីជាផ្លូវការទីពីររបស់ក្រុមនៅ Park of the Princes បន្ទាប់ពីការមកដល់របស់ខ្សែបម្រើ Milan Skriniar ។ បើតាមការបញ្ជាក់របស់ក្លិប PSG នោះ Asensio នឹងទទួលបានប្រាក់ខែប្រហែល ១០លានអឺរ៉ូ បូកទាំងប្រាក់រង្វាន់ផ្សេងៗទៀត។

កីឡាករជំនាញជើងឆ្វេង វ័យ ២៧ឆ្នាំរូបនេះ បាននិយាយនៅក្នុងពិធីចុះហត្ថលេខាជាមួយ PSG ថា ៖ “វាជាកិត្តិយស ដែលបានក្លាយជាផ្នែកមួយនៃក្រុមដ៏អស្ចារ្យនេះ។ ខ្ញុំទន្ទឹងរង់ចាំចូលរួមជាមួយមិត្តរួមក្រុមថ្មីរបស់ខ្ញុំ ហើយធ្វើការរួមគ្នា ដើម្បីជួយក្លឹបសម្រេចបាននូវគោលដៅដ៏អស្ចារ្យមួយចំនួន”។

Asensio ធ្លាប់បានបដិសេធសំណើបន្តកុងត្រាពី Real Madrid នៅពេលដែលគាត់សម្រេចចិត្តចាកចេញពីក្លិបអេស្ប៉ាញ ដើម្បីស្វែងរកទ្រនំថ្មី។ គាត់ទទួលបានការចាប់អារម្មណ៍យ៉ាងខ្លាំងពីក្លឹបនៅ Premier League ប៉ុន្តែទីបំផុតគេបានសម្រេចចិត្តទៅ រដ្ឋធានីប៉ារីស។

សរុបមក Asensio បានចំណាយពេល ៧ឆ្នាំ ជាមួយក្លិបអធិរាជស Real Madrid ចាប់តាំងពីចុះហត្ថលេខាពី Mallorca ក្នុងឆ្នាំ ២០១៤។ នៅ Madrid រូបគេ បានប្រមូលពានរង្វាន់ធំៗចំនួន ១៧ រួមមាន Champions League ៣ ដង La Liga ៣ ដង Club World Cup ៣, European Super Cup ៣ ពាន Spanish Super Cup ៣ និង  King’s Cup ១ ។

គួរបញ្ជាក់ថា កាលពីរដូវកាលមុន Asensio បង្ហាញខ្លួនបាន ៥០ ប្រកួតឲ្យ Real Madrid ដោយស៊ុតបញ្ចូលទី ១២ គ្រាប់ និងបញ្ជូនបាល់ឲ្យមិត្តរួមក្រុម ៨ ដង៕