របរចិញ្ចឹមឃ្មុំ ក្លាយជាមុខរបរដល់ប្រជាសហគមន៍មូលដ្ឋាន
របរចិញ្ចឹមឃ្មុំ ក្លាយជាមុខរបរដល់ប្រជាសហគមន៍មូលដ្ឋាន
រដ្ឋមន្ត្រីក្រសួងបរិស្ថាន ឯកឧត្តម សាយ សំអាល់ កាលពីពេលថ្មីៗនេះបានអញ្ជើញជាអធិបតីភាពក្នុងកិច្ចពិគ្រោះយោបល់លើផែនទីបង្ហាញផ្លូវ ក្នុងការរៀបចំផែនការជាតិសម្រាប់ការចិញ្ចឹមឃ្មុំប្រកបដោយនិរន្តរភាព និងការអភិរក្សឃ្មុំព្រៃនៅកម្ពុជា។ កិច្ចពិព្រោះយោបល់នេះដែរ មានការចូលរួមពីលោក សាដា អ៊ូម៉ា អាឡាម អ្នកតំណាងអង្គការយូណេស្កូប្រចាំកម្ពុជា ព្រមទាំងថ្នាក់ដឹកនាំ ក្រសួងបរិស្ថាន តំណាងស្ថាប័ន និងអង្គការដៃគូជាច្រើនរូបទៀត។
ដោយឡែក ក្នុងគោលដៅអភិរក្សធម្មជាតិ និងជីវៈចម្រុះ ក្រសួងបានបង្កើតតំបន់ការពារធម្មជាតិនៅទូទាំងប្រទេសដែលគ្របដណ្តប់លើផ្ទៃដីសរុបជាង៧លានហិកតា។ ជាមួយគ្នានេះ ក្រសួងក៏បានរៀបចំបង្កើត និងចងក្រងបណ្តាញ សហគមន៍តំបន់ការពារធម្មជាតិ ឱ្យមានរចនាសម្ព័ន្ធច្បាស់លាស់ដើម្បីជួយគាំទ្រ និងអភិវឌ្ឍសមត្ថភាពរបស់ប្រជាសហគមន៍មូលដ្ឋានឱ្យមានសមត្ថភាព និងការទទួលខុសត្រូវក្នុងការចូលរួមអភិរក្សធនធានធម្មជាតិ និងអភិវឌ្ឍសេដ្ឋកិច្ចមូលដ្ឋាន ក្លាយជាដៃគូសន្ទនាជាមួយរាជរដ្ឋាភិបាល និងរដ្ឋបាលថ្នាក់ក្រោមជាតិ ។ នេះបើតាមការលើកឡើងរបស់ឯកឧត្តមរដ្ឋមន្ត្រី។
យ៉ាងណាមិញ ការងារអភិរក្សឃ្មុំព្រៃ ការចិញ្ចឹមឃ្មុំ ការយកទឹកឃ្មុំ និងផលិតផលផ្សេងៗពីឃ្មុំ នឹងរួមចំណែកបំពេញបន្ថែមលើកិច្ចខិតខំប្រឹងប្រែងរបស់ក្រសួងបរិស្ថាន ដោយផ្តល់នូវការអភិវឌ្ឍមួយ ដ៏សមស្របដល់សហគមន៍មូលដ្ឋាន ជាពិសេសការផ្ដល់ជម្រើសមុខរបរ និងការលើកកម្ពស់ជីវភាពប្រជាសហគមន៍។ ឯកឧត្តមរដ្ឋមន្ត្រីបានគូសបញ្ជាក់ថា កិច្ចការពារធនធានធម្មជាតិ និងអភិរក្សជីវៈចម្រុះអាចទទួលបានជោគជ័យលុះត្រាតែប្រជាសហគមន៍មូលដ្ឋានមានប្រភពចំណូល ជាប្រចាំនិងមានជីវភាពធូរធារ។
ក្នុងន័យនេះ ដើម្បីធានានិរន្តរភាព ឯកឧត្តមរដ្ឋមន្ត្រីបានផ្តល់ជាអនុសាសន៍លើការងារជាអាទិភាព មួយចំនួនដូចខាងក្រោម៖ ទី១ សូមស្នើតំណាងក្រសួង ស្ថាប័ន អង្គការពាក់ព័ន្ធ ជួយគិតគូរ និងផ្លាស់ប្តួរយោបល់ឱ្យបានគ្រប់ជ្រុងជ្រោយ ដើម្បីរៀបចំកិច្ចការនេះឱ្យបានចំគោលដៅមានភាពជាក់ស្តែង និងអាចអនុវត្តបាន។ អាចប្រើយន្តការអន្តរក្រសួងដែលមានស្រាប់ដូចជាក្រុមប្រឹក្សាជាតិអភិវឌ្ឍន៍ដោយចីរភាព ដើម្បីធ្វើកិច្ចការនេះឱ្យមានប្រសិទ្ធភាព។
ទី២ គួរផ្តោតលើតម្រូវការក្នុងស្រុកជាមុន ទន្ទឹមនឹងស្វែងរកទីផ្សារក្រៅប្រទេសច្បាស់លាស់សម្រាប់ ធ្វើការនាំចេញ ទើបអាចធានានិរន្តរភាពបាន។ ទី៣ គួរផ្សព្វផ្សាយឱ្យបានទូលំទូលាយអំពីសារប្រយោជន៍របស់ឃ្មុំធម្មជាតិ ទាំងទិដ្ឋភាពសេដ្ឋកិច្ច និង សេវាកម្មអេកូឡូស៊ី។
គួរបញ្ជាក់ថា ទឹកឃ្មុំត្រូវបានប្រជាពលរដ្ឋទូទៅចាត់ ទុកត្រឹមតែជាឱសថ ប៉ុន្តែក្រសួងបរិស្ថានក៏បានជំរុញឱ្យប្រជាពលរដ្ឋប្រើប្រាស់ទឹកឃ្មុំជាអាហារបន្ថែមប្រចាំថ្ងៃ ព្រោះវាជាប្រភពប្រូតេអ៊ីន និងអាហារូបត្ថម្ភដ៏សំខាន់ សម្រាប់ការលូតលាស់នៃសារពាង្គកាយផងដែរ៕
