មើលឃើញពីកង្វះខាតផ្គត់ផ្គង់នៅក្រុងភ្នំពេញ យុវជនម្នាក់ចិញ្ចឹមក្ដាមថ្ម រកចំណូលបានមិនគួរឲ្យជឿ
មើលឃើញពីកង្វះខាតផ្គត់ផ្គង់នៅក្រុងភ្នំពេញ យុវជនម្នាក់ចិញ្ចឹមក្ដាមថ្ម រកចំណូលបានមិនគួរឲ្យជឿ
ជាទូទៅការផ្គត់ផ្គង់គ្រឿងសមុទ្រដូចជា ក្ដាម មឹក បង្គារជាដើម ច្រើនតែមានប្រភពចេញពីខេត្តដែលនៅជាប់សមុទ្រ ដោយសារតែការដឹកជញ្ជូន ត្រូវចំណាយពេលរាប់ម៉ោង ម្លោះហើយគ្រឿងសមុទ្រទាំងនោះត្រូវបានគេរៀបចំដាក់កេះ ក្លាសេទឹកកកឲ្យត្រជាក់ ដែលការធ្វើបែបនេះ តិចឬច្រើននឹងត្រូវប៉ះពាល់ដល់គុណភាពសាច់ និងភាពស្រស់របស់វា។
ដោយមើលឃើញនូវចន្លោះប្រហោងនេះ យុវជនមួយរូបក៏មានគំនិតចង់ចិញ្ចឹមសត្វសមុទ្រដើម្បីផ្គត់ផ្គង់នៅក្នុងក្រុងតែម្ដង ហើយយុវជនរូបនោះសម្រេចជ្រើសយកចិញ្ចឹមក្ដាម ព្រោះថាក្ដាមមិនសូវជាមាន អ្នកលក់ច្រើន បើធៀបទៅនឹង មឹក និងបង្គារ។
យុវជន ឧត្តម ទិត្យា ជាអ្នករស់នៅរាជធានីភ្នំពេញស្រាប់ និងជាអ្នកដែលមិនមានជំនាញកសិកម្មអ្វីសោះ ប៉ុន្តែដោយសារចិត្តចង់ចាប់របរចិញ្ចឹមក្ដាម យុវជនរុបនេះបានខិតខំសិក្សារៀនសូត្រអំពីបច្ចេកទេសអស់រយៈពេលជាច្រើនឆ្នាំ ទម្រាំតែអាចបើកអាជីវកម្មជាលក្ខណៈគ្រួសារមួយបាន។
ការចិញ្ចឹមនេះ លោក ឧត្តម ទិត្យា មិនបានដាក់ក្នុងស្រះនោះទេ ពោលគឺចិញ្ចឹមនៅក្នុងប្រអប់ជ័រ ដែលដាក់ត្រួតលើគ្នា ហើយរៀបចំប្រព័ន្ធទឹកឲ្យមានអុកស៊ីសែនគ្រប់គ្រាន់សម្រាប់ការរស់នៅ របស់ក្ដាមថ្ម។
ដោយជោគជ័យក្នុងដំណាក់កាលដំបូង យុវជនរូបនេះក៏ចាប់ផ្ដើមពង្រីកការចិញ្ចឹមរបស់ខ្លួន ដែលមកដល់ពេលនេះគឺមានចំនួន ១ពាន់ប្រអប់ឯណោះ។ ប៉ុន្តែយ៉ាងណា លោកបានឲ្យដឹងថា ខ្លួនមិនបានបង្កាត់ពូជដោយខ្លួនឯងនោះទេ និយាយរួមគឺយកពូជមកពីនាយសមុទ្រ មកចិញ្ចឹមបន្ត នៅក្នុងប្រអប់ ហើយលក់ចេញទៅឲ្យភ្ញៀវដោយអាចរក្សាភាពស្រស់បាន។
លោក ឧត្តម ទិត្យា៖ « ទោះបីជាខ្ញុំមិនបានបង្កាត់ពូជនៅទីនេះផ្ទាល់ តែគុណភាព និងរសជាតិក្ដាម គឺមិនចាញ់ក្ដាមដែលលើកចេញពីទឹកសមុទ្រនោះទេ ព្រោះនៅទីនេះយើងបានមើលថែដិតដល់ ហើយអាចផ្គត់ផ្គង់បានភ្លាមៗ ដោយមិនបាច់ត្រូវការចាំយូរ។»
សម្រាប់ក្ដាមថ្មដែលយើងចិញ្ចឹមនៅភ្នំពេញនេះ យើងមិនមែនចិញ្ចឹម និងបង្កាត់ពូជថ្មីទេ យើងគ្រាន់តែយកក្ដាមនៅសមុទ្រខ្មែរ ដូចជាពីខេត្តព្រះសីហនុ និងជាពិសេសខេត្តកោះកុង ពោលគឺយើងយកក្ដាមណាដែលស្ទើរសាច់ ឬក៏ពេញសាច់ហើយ យើងមកដាក់ក្នុងប្រអប់ដូចជាកន្លែងស្តុកទៅវិញទេ វាមិនមែនជាកន្លែងចិញ្ចឹមរាប់ខែទើបបានផលនោះទេ បន្ទាប់មកបានយើងយកទៅលក់បន្តវិញ
លោកបានបន្តថា៖ «សម្រាប់បច្ចុប្បន្ននេះ ខ្ញុំកំពុងពិនិត្យទីផ្សារបណ្តើរៗផង និងមានម៉ូយស្រាប់ផង ដែលពួកគាត់ភាគច្រើនជាភោជនីយដ្ឋាន អ្នកលក់គ្រឿងសមុទ្រ និងពិសេសអតិថិជនដែលគាត់មកទិញផ្ទាល់តែម្ដង ដូចនៅភ្នំពេញយើងគាត់រកភ្លាមៗគឺរកមិនបានទេ»។
ដោយមានអតិថិជនពីភោជនីយដ្ឋាន ការលក់របស់លោកក៏ធ្វើឡើងដោយទៀតទាត់ផងដែរ ហើយបើនិយាយពីចំណូលវិញ លោកអាចលក់បានដល់ខ្ទង់ពាន់ដុល្លារក្នុងមួយថ្ងៃក៏មាន។
តម្លៃដែលលោកលក់គឺមានចាប់ពី ៤ម៉ឺន៥ពាន់រៀលឡើងទៅ ហើយខាងភោជនីយដ្ឋានអាចកម្មង់ពី ១០០គីឡូ ទៅដល់ ៣០០គីឡូឯណោះ៕
