អង្គការពាក់ព័ន្ធសហការគ្នាបង្កើតកម្មវិធីកសិកម្ម ដើម្បីលើកស្ទួយជីវភាពកសិករខ្នាតតូចនៅខេត្តមណ្ឌលគិរី

អង្គការពាក់ព័ន្ធសហការគ្នាបង្កើតកម្មវិធីកសិកម្ម ដើម្បីលើកស្ទួយជីវភាពកសិករខ្នាតតូចនៅខេត្តមណ្ឌលគិរី

(មណ្ឌលគិរី)៖ ប្រជាកសិករ ដែលធ្វើកសិកម្មខ្នាតតូចចំនួន ១២០០នាក់ ដែលរស់នៅក្នុងស្រុកោះញែក ខេត្ត មណ្ឌលគិរីទទួលបានការគាំទ្រ តាមរយៈគម្រោងថ្មីមួយដែលមានទឹកប្រាក់ជិត៣លានដុល្លារអាមេរិក។ គម្រោងថ្មីនេះកើតចេញពីការសហការគ្នារវាង កម្មវិធីស្បៀងអាហារពិភពលោក របស់អង្គការសហប្រជាជាតិ (WFP) សហការជាមួយសាជីវកម្ម​សហគមន៍កសិកម្មកម្ពុជា (CACC)។

ជារួម គម្រោងនេះទទួលបានមូលនិធិពីកម្មវិធីកសិកម្ម និងសន្តិសុខស្បៀងសកល (WFP) ចំនួន ១.៧៩​លានដុល្លារ និងពីសាជីវកម្ម​សហគមន៍កសិកម្មកម្ពុជា (CACC) ចំនួន១.១លានដុល្លារ ក្នុងគោល​បំណង​លើកកម្ពស់ភាពធន់ និងជីវភាពរបស់កសិករ ខ្នាតតូចតាមរយៈ​កសិកម្មសរីរាង្គ និងលទ្ធភាពចូលទៅកាន់ទីផ្សារ។

ពាក់ព័ន្ធនឹងចំណុចនេះ នាយកប្រតិបត្តិ CACC លោក កាន់ គន្ធី បានមានប្រសាសន៍ឲ្យដឹងថា CACC នឹងបង្កើតខ្សែច្រវ៉ាក់តម្លៃអាហារសរីរាង្គមួយ ដែលប្រកបដោយបរិយាប័ន្ន និងលើកទឹកចិត្តកសិករខ្នាតតូច រួមទាំងស្ត្រីនិងជនជាតិដើមភាគតិច ឲ្យប្តូរមកអនុវត្ដកសិកម្មសរីរាង្គដោយប្រើតែជី និងថ្នាំកម្ចាត់សត្វល្អិតធម្មជាតិ និងការអនុវត្តដទៃទៀត ដែលឆ្លើយតបនឹងការប្រែប្រួលអាកាសធាតុ។

លោកបានបន្តថា «អាហារសរីរាង្គមានទីផ្សារល្អ និងមានស្ថិរភាពជាងតម្លៃទំនិញដែលផលិតទៅតាមទម្លាប់​ហើយវាមានឱកាសចំណេញខ្ពស់ និងមានស្ថិរភាពចំណូលផងដែរ»។

លោកកត់សម្គាល់ថា កសិករខ្នាតតូចក្នុង​ខេត្តមណ្ឌល​គិរី ច្រើនដាំដុះតែស្រូវ ហើយភាគច្រើនធ្វើ​កសិកម្មវិ​ល​ជុំបែបប្រពៃណី ដែលងាយរងគ្រោះដោយសារអាកាសធាតុ និងវិបត្តិផ្សេងៗ។
លោក គន្ធី បានបន្ថែមថា «គោលដៅរបស់យើង គឺដើម្បីបង្កើនប្រាក់ចំណូលរបស់កសិករ ដែលចូលរួម​ឲ្យបានរហូតដល់២០ភាគរយ ធៀបនឹងប្រាក់ចំណេញរបស់កសិកម្មធម្មតា»។

លោកក៏បានបញ្ជាក់ដែរថា CACC នឹងជួយសម្របសម្រួលទំនាក់ទំនងទីផ្សារហើយកសិករនឹងអាចប្រើប្រាស់​ចំណូលរបស់ខ្លួនក្នុងការទប់ទល់ជាមួយនឹង វិបត្តិផ្សេងៗដែលអាចកើតមាននាពេលអនាគត។

ទន្ទឹមនឹងនេះ​ លោកស្រី គ្លែរ កូណាន់ អ្នកតំណាងរបស់ WFP ប្រចាំនៅកម្ពុជា បានឲ្យដឹងថា គម្រោងនេះ​ត្រូវបាន​គ្រោងរៀបចំឡើងក្នុងបរិបទកូវីដ-១៩ ដើម្បីកសាងភាពជាដៃគូរវាង វិស័យសាធារណៈ វិស័យឯកជន និងអ្នកផលិត។

លោកស្រី កូណាន់ បានបន្តថា «កំណើនប្រាក់ចំណូលនឹងដើរតួយ៉ាងសំខាន់ក្នុងការសម្រួលឲ្យ​ក្រុមគ្រួសារ​របស់កសិករខ្នាតតូចអាចទទួលបានអាហារូបត្ថម្ភកាន់តែល្អប្រសើរ ហើយនៅពេលដែលពួកគេ​អាចមានលទ្ធភាព​ទទួល​បានអាហារសុខភាពចម្រុះ ពួកគេក៏អាចទប់ទល់នឹងបញ្ហាសុខភាពផ្សេងៗដែលបណ្ដាលមកពីការ​ មិនបានទទួលអាហារូបត្ថម្ភគ្រប់គ្រាន់»។

លោកស្រីក៏បានបង្ហាញការសម្គាល់ផងដែរថា ជីវភាព និងអាហារូបត្ថម្ភមានសារៈសំខាន់ណាស់ ដោយសារតំ​បន់គោលដៅនេះ មានកម្រិតនៃភាពក្រីក្រ និងមានកង្វះខាតអាហារូបត្ថម្ភខ្ពស់៕