លោក Thaksin ក្លាយជាប្រធានផ្នែកសម្អាតលូរបស់ពន្ធនាគារថៃ

លោក Thaksin ក្លាយជាប្រធានផ្នែកសម្អាតលូរបស់ពន្ធនាគារថៃ

បាងកក៖ អតីតនាយករដ្ឋមន្ត្រីថៃ លោកស្រី Paetongtarn Shinawatra បានលាតត្រដាងកាលពីថ្ងៃព្រហស្បតិ៍ថា ពន្ធនាគារ Klong Prem បានរកការងារមួយដែលសមរម្យសម្រាប់ឪពុករបស់លោកស្រី គឺជាប្រធានផ្នែកសម្អាតលូរបស់ពន្ធនាគារ។ នេះ បើតាមកាសែត The Nation Thailand ចុះផ្សាយនៅថ្ងៃទី ២៥ ខែកញ្ញា ឆ្នាំ ២០២៥ ។

.លោកស្រី Paetongtarn ដែលជាកូនស្រី របស់លោក Thaksin Shinawatra បានលាតត្រដាងឱ្យដឹងបែបនេះ ក្នុងពេលលោកស្រីធ្វើដំណើរចេញពីពន្ធនាគារ បន្ទាប់ពីសួរសុខទុក្ខឪពុករបស់លោកស្រី គឺ លោក Thaksin Shinawatra អតីតនាយករដ្ឋមន្ត្រីរួចរាល់។

តុលាការកំពូលរបស់ប្រទេសថៃបានបញ្ជាឱ្យអតីតនាយករដ្ឋមន្ត្រីដ៏មានឥទ្ធិពល និងមហាសេដ្ឋី គឺ លោក Thaksin Shinawatra ជាប់ពន្ធនាគាររយៈពេលមួយឆ្នាំកាលពីដើមខែនេះ ដែលជាព្រឹត្តិការណ៍ដ៏គួរឱ្យភ្ញាក់ផ្អើលមួយសម្រាប់ជម្លោះនយោបាយនៅក្នុងប្រទេសថៃ។

លោក Thaksin Shinawatra មានអាយុ៧៦ឆ្នាំ ជាឥស្សរជនខ្ពស់ ដែល បានបម្រើការជានាយករដ្ឋមន្ត្រីចាប់ពីឆ្នាំ ២០០១ រហូតដល់គាត់ត្រូវបានបណ្តេញចេញពីរដ្ឋប្រហារយោធាក្នុងឆ្នាំ ២០០៦។

លោកបានវិលត្រឡប់មកប្រទេសថៃវិញនៅឆ្នាំ ២០២៣ បន្ទាប់ពីនិរទេសខ្លួនឯង ១៥ ឆ្នាំ ហើយត្រូវបានកាត់ទោសឱ្យជាប់ពន្ធនាគាររយៈពេល ៨ ឆ្នាំពីបទទំនាស់ផលប្រយោជន៍ ការរំលោភបំពានអំណាច និងអំពើពុករលួយអំឡុងពេលកាន់អំណាច។

ព្រះមហាក្សត្រថៃ Maha Vajiralongkorn បន្ទាប់មកបានកាត់បន្ថយការកាត់ទោសលោកថាក់ស៊ីន មកត្រឹមមួយឆ្នាំ មុនពេលដែលគាត់ត្រូវបានដោះលែងឱ្យនៅក្រៅឃុំរយៈពេលប្រាំមួយខែក្រោយមកក្នុងខែកុម្ភៈ ឆ្នាំ ២០២៤៕
.