លោក Carlo Ancelotti ឆ្លើយតបនឹងពាក្យចចាមអារ៉ាម ដែលថា ខ្លួននឹងចាកចេញពី Real Madrid
លោក Carlo Ancelotti ឆ្លើយតបនឹងពាក្យចចាមអារ៉ាម ដែលថា ខ្លួននឹងចាកចេញពី Real Madrid
គ្រូបង្វឹកសញ្ជាតិអ៊ីតាលី លោក Carlo Ancelotti បានឃ្លាតឆ្ងាយពីការរំពឹងទុកថា លោកអាចនឹងចាកចេញពីក្លឹបអធិរាជស Real Madrid នៅរដូវក្តៅនេះ ដោយទទូចថា លោកចង់បន្តនៅក្នុងការងារនេះឱ្យបានយូរតាមដែលអាចធ្វើទៅបាន។
មែនទែនទៅ នេះជាពេលដ៏លំបាកមួយ សម្រាប់បុរសវ័យ ៦៥ឆ្នាំរូបនេះ បន្ទាប់ពីការបរាជ័យក្នុងការការពារតំណែងជើងឯក Champions League របស់ Madrid ក្រោយធ្លាក់ត្រឹមវគ្គ 1/4 ផ្តាច់ព្រ័ត្រ ក្រោមថ្វីជើងក្រុមកាំភ្លើងធំ Arsenal។ កាន់តែលំបាកទៀតនោះ Real Madrid តាមពីក្រោយគូប្រជែងដ៏ជូរចត់ ក្រុមអ្នកមានបុណ្យ Barcelona ដល់ទៅ ៤ពិន្ទុក្នុង La Liga ខណៈនៅសល់តែ ៦ប្រកួតទៀតប៉ុណ្ណោះ ការប្រកួតក្របខ័ណ្ឌកំពូលរបស់អេស្ប៉ាញនឹងបញ្ចប់។
គ្រូបង្វឹកសញ្ជាតិអ៊ីតាលី រូបនេះ បានដឹកនាំ Real Madrid ឈ្នះពាន Champions League ទី១៥ របស់ក្លិប នៅឯ Bernabeu ហើយត្រូវបានគេចាត់ទុកថា ជាអ្នកចាត់ការដ៏អស្ចារ្យបំផុតរបស់ក្លឹបជើងឯកអេស្ប៉ាញ។
ទោះបីជាយ៉ាងណាក៏ដោយ ពាក្យចចាមអារ៉ាម បានកាន់តែខ្លាំងឡើងអំពីអនាគតរបស់លោក Ancelotti បន្ទាប់ពីការធ្លាក់ចេញពីពានរង្វាន់អឺរ៉ុប ហើយវាត្រូវបានគេរាយការណ៍ថា អតីតគ្រូបង្វឹក Chelsea និង Everton ទំនងជានឹងបន្តដឹកនាំនៅចុងបញ្ចប់នៃរដូវកាលនេះ។
ប៉ុន្តែប្រឈមមុខនឹងប្រព័ន្ធផ្សព្វផ្សាយ នៅព្រឹកថ្ងៃពុធនេះ លោក Ancelotti បានប្រាប់អ្នកសារព័ត៌មានថា ៖« ខ្ញុំចូលចិត្តនៅទីនេះ [នៅ Madrid] ហើយខ្ញុំសង្ឃឹមថា វានឹងមានរយៈពេលយូរតាមដែលអាចធ្វើទៅបាន។ ទោះបីជាមានសម្ពាធច្រើន ប៉ុន្តែខ្ញុំសប្បាយចិត្តណាស់ ក្នុងការស្នាក់នៅទីនេះ។ ខ្ញុំសប្បាយចិត្តជាមួយក្លឹប ពួកគេដឹងថា នេះជារដូវកាលដ៏លំបាកមួយ។ ស្ត្រេសគឺជាឥន្ធនៈ ហើយវាមិនរំខានខ្ញុំទេ វាផ្តល់ឱ្យខ្ញុំនូវថាមពលបន្ថែមទៀត»។
គួរបញ្ជាក់ថា កិច្ចសន្យាបច្ចុប្បន្នរបស់ លោក Ancelotti ជាមួយ Madrid ឈានដល់ចុងបញ្ចប់នៃរដូវកាល 2025/26 ៕
