ក្រុមការងារជំរុញការវិនិយោគក្នុងខេត្តព្រះសីហនុ ចុះពិនិត្យមើលគម្រោងវិនិយោគចំនួន ២
ព្រះសីហនុ៖ លោក ហ៊ាន សាហ៊ីប ប្រធានក្រុមការងារជំរុញការវិនិយោគក្នុងខេត្តព្រះសីហនុ និងលោក ម៉ាង ស៊ីណេត អភិបាលខេត្តព្រះសីហនុ ព្រមទាំងមន្ត្រីជំនាញ នៅថ្ងៃទី ៣ ខែ មីនា ឆ្នាំ ២០២៥ បានចុះពិនិត្យគម្រោង ផឹនីនស្យ៊ូឡឺ បេ (Peninsula Bay) និង តំបន់សេដ្ឋកិច្ចពិសេសក្រុងព្រះសីហនុ ក្នុងគោលបំណងបន្តផ្តល់ការយកចិត្តទុកដាក់ខ្ពស់លើការថែទាំវិនិយោគក្នុងវិស័យទេសចរណ៍ អចលនទ្រព្យ និង ឧស្សាហកម្ម ស្របតាមកម្មវិធីពិសេសជំរុញការវិនិយោគក្នុងខេត្តព្រះសីហនុ ដែលជាគំនិតផ្តួចផ្តើមដ៏ប្រពៃរបស់ សម្តេចធិបតីនាយករដ្ឋមន្រ្តី ។
ការចុះពិនិត្យនេះ គឺជាសកម្មភាពមួយនៃភារកិច្ចស្នូលរបស់ក្រុមការងារ បន្ទាប់ពីការពិនិត្យផ្តល់ការលើកទឹកចិត្តពិសេស ជូនវិនិយោគិន និង ធុរជន ដែលស្នើសុំ និង អនុវត្តគម្រោងក្នុងឆ្នាំ ២០២៤ និង ឆ្នាំ ២០២៥ ក្នុងគោលដៅតាមដាន និង ជំរុញការអនុវត្តគម្រោង និង ស្តាប់សំណូមពរ និង បញ្ហាប្រឈមនានា ពីអ្នកអនុវត្ត និង វិនិយោគិន ។
គម្រោង Peninsula Bay របស់ក្រុមហ៊ុន PENINSULA BAY INVESTMENT CO., LTD. គឺជាគម្រោងសាងសង់សណ្ឋាគារផ្កាយ ៥ និង មជ្ឈមណ្ឌលពាណិជ្ជកម្ម ស្ថិតនៅភូមិ ៤ សង្កាត់លេខ ៤ ក្រុងព្រះសីហនុ ខេត្តព្រះសីហនុ តាមបណ្តោយទីលានសម្តេចតេជោ មានទុនវិនិយោគ ៥៧៤ លានដុល្លារអាមេរិក និង បានចាប់ផ្តើមសាងសង់ក្នុងឆ្នាំ ២០២៤ និង បញ្ចប់ការសាងសង់នៅឆ្នាំ ២០២៨ ។
ទីតាំងគម្រោងមានទំហំ ១៥៨ ៦៣៣ ម៉ែត្រការ៉េ សម្រាប់បម្រើដល់ការសាងសង់សណ្ឋាគារផ្កាយ ៥ ចំនួន ២ ៨៧០ បន្ទប់, សួនទឹកកម្សាន្ត និង សាលប្រជុំខ្នាតធំ, ផ្សារទំនើប, អគារពាណិជ្ជកម្មចំនួន ៥ កម្ពស់ ៣២ ជាន់ និង អគារស្នាក់នៅរួម ចំនួន ៤ អគារ កម្ពស់ ៣២ ជាន់ ។ គម្រោងនេះមានសកម្មភាពសាងសង់សស្រាក់សស្រាំ លឿន និង អាចបញ្ចប់តាមការគ្រោងទុក, ហើយជាមួយនេះ ក្រុមហ៊ុនកំពុងរៀបចំផែនការពង្រីកការសាងសង់ហេដ្ឋារចនាសម្ព័ន្ធនៅជុំវិញទីតាំងគម្រោងបន្ថែមទៀត ខណៈដែលម្ចាស់គម្រោងមានទំនុកចិត្តខ្ពស់លើរាជរដ្ឋាភិបាល ដែលបានផ្តល់ការគាំទ្រ និង ការសម្របសម្រួល និង ជួយដោះស្រាយបញ្ហាប្រឈមបានឆាប់រហ័ស និង មានប្រសិទ្ធភាព ជាពិសេស ការដាក់ចេញកម្មវិធីពិសេសជំរុញការវិនិយោគក្នុងខេត្តព្រះសីហនុ ។
ដោយឡែក, តំបន់សេដ្ឋកិច្ចពិសេសក្រុងព្រះសីហនុ ស្ថិតនៅសង្កាត់បិតត្រាំង ក្រុងកំពង់សោម ជាតំបន់ឧស្សាហកម្មចម្រុះ ដែលមានសហគ្រាសផលិតផលិតផល ដូចជា សម្ភារៈសំណង់, សម្ភារៈប្រើប្រាស់ក្នុងផ្ទះ, គ្រឿងបន្លាស់, សំបកកង់រថយន្ត, បន្ទះសូឡា, សម្ភារៈពេទ្យ, កាបូប, វ៉ាលី, សម្លៀកបំពាក់, និង ស្បែកជើង ជាដើម ។ ក្នុងឆ្នាំ ២០២៤, សហគ្រាសដែលកំពុងវិនិយោគនៅក្នុងតំបន់ មានចំនួន ១៩០ សហគ្រាស មកពីប្រទេសចិន អឺរ៉ុប អាមេរិក និង តំបន់អាស៊ីអាគ្នេយ៍, ប្រើប្រាស់កម្លាំងកម្មករ-និយោជិតជិត ៣០ ០០០ នាក់ ដែលមានប្រាក់ចំណូលប្រចាំខែ ប្រមាណ ៣០០ ដុល្លារអាមេរិក និង សម្រេចបានទំហំទឹកប្រាក់នៃការនាំចេញ-នាំចូលប្រមាណ ៣ ៦៧២ លានដុល្លារអាមេរិក គិតពីខែ មករា ដល់ខែ វិច្ឆិកា ឆ្នាំ ២០២៤ ។
ក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ មានគោលដៅប្រែក្លាយទៅជាឧទ្យានឧស្សាហកម្មអន្តរជាតិមួយ ដែលមានសហគ្រាសសរុប ៣០០ និង អាចបង្កើតការងារបានចំនួន ៨០ ០០០ ដល់ ១០០ ០០០ នាក់ ។ ទន្ទឹមនេះ, ក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ នឹងធ្វើការអភិវឌ្ឍបន្ថែម លើផ្ទៃដីដែលមិនទាន់អភិវឌ្ឍជាង ៥០០ ហិកតា លើផ្ទៃដីសរុប ១ ១១៣ ហិកតា ដូចជា ការសាងសង់ហេដ្ឋារចនាសម្ព័ន្ធ និង ប្រព័ន្ធលូ ទឹក និង អគ្គិសនី ជាដើម ដើម្បីបម្រើដល់ការទាក់ទាញវិនិយោគថ្មីៗទៀត ខណៈដែលរាជរដ្ឋាភិបាលមានគោលនយោបាយលើកទឹកចិត្តពិសេស និង ដាក់ចេញយន្តការជំរុញវិនិយោគនានា ។
នាឱកាសនោះ លោក ហ៊ាន សាហ៊ីប បានគូសបញ្ជាក់ថា ការស្វែងយល់បញ្ហាប្រឈមរបស់វិនិយោគិន គឺជាភារកិច្ចសំខាន់របស់ក្រុមការងារ ដើម្បីស្វែងរកដំណោះស្រាយ និង ការសម្របសម្រួលផ្សេងៗ រួមទាំងការពន្យល់នានា ដើម្បីជំរុញការអនុវត្តគម្រោងដោយរលូន និង បង្កើតបរិយាកាសវិនិយោគល្អប្រសើរ ។ ជាមួយនេះ, ក្រុមការងារប្តេជ្ញាចិត្តបន្តខិតខំប្រឹងប្រែងអនុវត្តកម្មវិធីពិសេសនេះ ឱ្យសម្រេចតាមគោលបំណងរាជរដ្ឋាភិបាល ដើម្បីជំរុញសម្ទុះសេដ្ឋកិច្ច, ជំរុញសកម្មភាពវិនិយោគ និង ដោះស្រាយបញ្ហាអគារគាំងនៅក្នុងខេត្ត ទន្ទឹមគ្នានឹងកិច្ចខិតខំប្រឹងប្រែងទាក់ទាញការវិនិយោគក្នុងវិស័យឧស្សាហកម្ម និង វិស័យសំខាន់ៗផ្សេងៗទៀត ។
សូមជម្រាបជូនថា ក្នុងឆ្នាំ ២០២៤ ក្រុមហ៊ុនទាំងពីរធ្លាប់ស្នើមកក្រុមការងារ ដើម្បីដោះស្រាយការលំបាក និង សំណូមពរនានា ។ ផ្អែកតាមនេះ, ក្រុមការងារបានសម្របសម្រួលជាមួយរដ្ឋបាលខេត្ត និង ក្រសួងស្ថាប័ន ដែលតែងតែផ្តល់កិច្ចសហការខ្ពស់ ហើយបានដោះស្រាយការលំបាក និង សំណូមពរមួយចំនួន និង នៅសល់មួយចំនួនទៀត ដែលក្រុមការងារនឹងបន្តពិនិត្យ ដើម្បីជំរុញ និង ចូលរួមការអភិវឌ្ឍខេត្តព្រះសីហនុ ស្របពេលដែលក្រុមការងារនឹងបន្តសម្របសម្រួលដោះស្រាយបញ្ហាប្រឈមរបស់វិនិយោគិន និង ធុរជននានានៅក្នុងទូទាំងខេត្តព្រះសីហនុ ។
ក្នុងន័យនេះ, ក្រុមការងារបន្តលើកទឹកចិត្តឱ្យធុរជន និង វិនិយោគិន ចូលរួមសហការផ្តល់ព័ត៌មាន, មតិ ឬ សំណូមពរផ្សេងៗ តាមការជាក់ស្តែង ដើម្បីក្រុមការងារស្វែងយល់ និង ស្វែងរកដំណោះស្រាយ និង ធ្វើការសម្របសម្រួល ៕