ការប្រកួតលីគកំពូលកម្ពុជា ជុំទី២ បានបញ្ចប់ ខណៈព្រះខ័នរាជស្វាយរៀង ឈរកំពូលតារាង
ការប្រកួតលីគកំពូលកម្ពុជា ជុំទី២ បានបញ្ចប់ ខណៈព្រះខ័នរាជស្វាយរៀង ឈរកំពូលតារាង
ការប្រកួតជើងឯកលីគកំពូលកម្ពុជា ឬខេមបូឌានព្រីមៀរលីគ (CPL) បានបញ្ចប់ជុំទី២ហើយ ដោយក្នុងនោះ គេបានរកឃើញក្រុមទាំង៦ ឡើងទៅលេងជុំទី៣ ខណៈក្រុមការពារដំណែងជើងឯក ព្រះខ័នរាជស្វាយរៀង កំពុងឈរកំពូលតារាងបណ្ដោះអាសន្ន។
សម្រាប់ក្រុមទាំង៦ ដែលឡើងទៅលេងនៅជុំទី៣ មានដូចជា ព្រះខ័នរាជស្វាយរៀង ភ្នំពេញក្រោន, វិសាខា, អង្គរថាយហ្គឺរ, ណាហ្គាវើលដ៍ និងបឹងកេត ខណៈក្រុមដែលនៅក្រៅតំបន់ Top 6 មានដូចជា អាយអេសអាយ ដង្កោរសែនជ័យ, ឡាហ្វ ខេត្តព្រះសីហនុ, គីរីវង្សសុខសែនជ័យ, សមាគមបាល់ទាត់ក្រសួងមហាផ្ទៃ និងក្រុម Tiffy Army FC។
ខាងក្រោមនេះ ជាលទ្ធផលការប្រកួតបញ្ចប់ជុំទី២៖
-ព្រះខ័នរាជស្វាយរៀង ៥-០ សមាគមបាល់ទាត់ក្រសួងមហាផ្ទៃ
– បឹងកេត ០-២ វិសាខា
– អាយអេសអាយ ដង្កោរសែនជ័យ ១-២ ភ្នំពេញក្រោន
– Tiffy Army FC០-២ ណាហ្គាវើលដ៍
-អង្គរថាយហ្គឺរ ២-០ ឡាហ្វ ខេត្តព្រះសីហនុ។
គិតត្រឹមសប្ដាហ៍ទី២២ នេះ ក្រុមព្រះខ័នរាជស្វាយរៀង ក្នុងនាមជាម្ចាស់ការពារដំណែងជើងឯក បានបន្តភាពខ្លាំងរបស់ខ្លួន ដោយឈរកំពូលតារាងបណ្ដោះអាសន្ន មាន ៥២ពិន្ទុ ខណៈភ្នំពេញក្រោន ឈរលេខ២ មាន ៥១ពិន្ទុ រីឯ វិសាខា ឈរលេខ៣ មាន ៤៤ពិន្ទុ។
គួរឱ្យដឹងផងដែរថា ការប្រកួតក្នុងដំណាក់កាលទី២ តំបន់ TOP6 (ក្រុមកំពូលតារាងទាំង៦) និង BOTTOM 5 (ក្រុមចំណាត់ខាងក្រោមទាំង៥) នឹងចាប់ផ្ដើមប្រកួតបន្ដនៅសប្ដាហ៍ទី២៣ ថ្ងៃទី២២ និង ២៣ ខែកុម្ភៈ ឆ្នាំ២០២៥ ខាងមុខនេះ៕
