លោក Trump សន្ទានតាមទូរស័ព្ទជាមួយលោក Putin ដើម្បីចរចាបញ្ចប់សង្គ្រាមនៅអ៊ុយក្រែន
លោក Trump សន្ទានតាមទូរស័ព្ទជាមួយលោក Putin ដើម្បីចរចាបញ្ចប់សង្គ្រាមនៅអ៊ុយក្រែន
អាមេរិក៖ ប្រធានាធិបតីអាមេរិក លោក Donald Trumpបាននិយាយថា លោកបានសន្ទនាតាមទូរស័ព្ទ ដែលមានរយៈពេលវែង និងមានផលិតភាពខ្ពស់ ជាមួយលោក Vladimir Putin ប្រធានាធិបតីនៃប្រទេសរុស្ស៊ី កាលពីថ្ងៃពុធ ដែលក្នុងនោះ លោក Putin បានយល់ព្រមចាប់ផ្តើមការចរចាដើម្បីបញ្ចប់សង្រ្គាមនៅអ៊ុយក្រែន។
នៅក្នុងការបង្ហោះសារលើបណ្តាញសង្គម Truth Social លោក Trump បាននិយាយថា លោក និងប្រធានាធិបតីរុស្ស៊ីបាន «យល់ព្រមឱ្យក្រុមរៀងៗខ្លួនចាប់ផ្តើមការចរចាជាបន្ទាន់» ។ ចំណែក ក្រោយមក ប្រធានាធិបតីអ៊ុយក្រែន លោក Volodymyr Zelensky បាននិយាយថា លោកបាននិយាយជាមួយលោក Trump អំពី «សន្តិភាពយូរអង្វែង និងគួរឱ្យទុកចិត្ត» សម្រាប់ប្រទេសអ៊ុយក្រែន ។
ការបន្ទន់ចិត្តរបស់មេដឹកនាំនៃប្រទេសពីរសម្រាប់ការចចារសន្តិភាព បានកើតមានឡើង បន្ទាប់ពីលោក Trump និងរដ្ឋមន្ត្រីការពារជាតិរបស់លោកបាននិយាយថា ប្រទេសអ៊ុយក្រែនចូលរួមជាមួយអង្គការណាតូ នឹងក្លាយជាការខកចិត្តដ៏ជូរចត់សម្រាប់ទីក្រុង Kyiv ។
ជុំវិញបញ្ហានេះ លោកZelensky បាននិយាយថាលោកនឹងជួបពិភាក្សាជាមួយអនុប្រធានាធិបតីសហរដ្ឋអាមេរិក លោក JD Vance និងរដ្ឋមន្ត្រីការបរទេស លោក Marco Rubio ក្នុងអំឡុងពេលកិច្ចប្រជុំកំពូលការពារជាតិស្តីពីអ៊ុយក្រែននៅទីក្រុង Munich នៅថ្ងៃសុក្រស្អែកនេះ ។
លោក Trump បានសរសេរនៅលើប្រព័ន្ធផ្សព្វផ្សាយសង្គមថា «វាដល់ពេលហើយដើម្បីបញ្ឈប់សង្រ្គាមដ៏អាក្រក់មួយនេះ ដែលធ្វើឱ្យមានការស្លាប់ និងការបំផ្លិចបំផ្លាញយ៉ាងធំធេង ។ សូមព្រះជាម្ចាស់ប្រទានពរដល់ប្រជាជននៃប្រទេសរុស្ស៊ី និងអ៊ុយក្រែន!»។
ទោះជាយ៉ាងណា លោក Trump មិនបានកំណត់កាលបរិច្ឆេទសម្រាប់ជំនួបទល់មុខជាមួយលោកពូទីននោះទេ ប៉ុន្តែក្រោយមកលោក Trump បានប្រាប់អ្នកសារព័ត៌មាននៅសេតវិមានថា លោក និង លោក Putin នឹងជួបនៅប្រទេសអារ៉ាប៊ីសាអូឌីត»។ លោកបានសរសេរលើបណ្តាញសង្គមថាភាគីទាំងពីរក៏បានអញ្ជើញគ្នាទៅវិញទៅមក ឱ្យមកកាន់ប្រទេសរៀងៗខ្លួនដែរ។
ទាក់ទិននឹងបញ្ហានេះ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា លោក Putin បានគាំទ្រគំនិតរបស់លោក Trump ដែលថាពេលវេលាបានមកដល់ដើម្បីធ្វើការជាមួយគ្នា។
លោក Peskov បាននិយាយថា ការហៅទូរស័ព្ទរវាងលោកពូទីន និងលោក Trump មានរយៈពេលជិតមួយម៉ោងកន្លះ ក្នុងអំឡុងពេលដែលប្រធានាធិបតីរុស្ស៊ីបានបន្តការអញ្ជើញទៅកាន់ទីក្រុងមូស្គូ។
ជុំវិញបញ្ហានេះដែរ នៅថ្ងៃពុធដដែលនោះ ប្រទេសអឺរ៉ុបចំនួនប្រាំពីរ រួមទាំងចក្រភពអង់គ្លេស បារាំង និងអាល្លឺម៉ង់បានទទូចថាពួកគេនឹងជាផ្នែកមួយនៃការចរចានាពេលអនាគតណាមួយស្តីពីជោគវាសនារបស់អ៊ុយក្រែន។
សេចក្តីថ្លែងការណ៍រួមដែលបានចេញផ្សាយបន្ទាប់ពីកិច្ចប្រជុំរដ្ឋមន្ត្រីការបរទេសនៅទីក្រុងប៉ារីសថា «គោលបំណងរួមរបស់យើងគួរតែដាក់អ៊ុយក្រែនឱ្យស្ថិតក្នុងជំហររឹងមាំ» ។ «អ៊ុយក្រែន និងអឺរ៉ុបត្រូវតែជាផ្នែកមួយនៃការចរចាណាមួយ» ។
ជាមួយគ្នានោះ ប្រទេសទាំងនោះបានអំពាវនាវឱ្យមានការធានាសន្តិសុខរឹងមាំសម្រាប់អ៊ុយក្រែន ហើយបាននិយាយថា ពួកគេកំពុងទន្ទឹងរង់ចាំពិភាក្សាអំពីផ្លូវឆ្ពោះទៅមុខជាមួយសម្ព័ន្ធមិត្តអាមេរិក៕
https://www.bbc.com/news/articles/c04n622gzx7o
