TikTok ប្រកាសបង្ហាញរបបសន្តិសុខទិន្នន័យថ្មីសម្រាប់តំបន់អឺរ៉ុបក្រោយពេលផ្ទុះឡើងនូវភាពតានតឹងកាន់តែខ្លាំង
TikTok ប្រកាសបង្ហាញរបបសន្តិសុខទិន្នន័យថ្មីសម្រាប់តំបន់អឺរ៉ុបក្រោយពេលផ្ទុះឡើងនូវភាពតានតឹងកាន់តែខ្លាំង
បរទេស: TikTok បានប្រកាសអំពីរបបសន្តិសុខទិន្នន័យថ្មីដែលមានរហស្សនាមថា “Project Clover” ចំពេលមានសម្ពាធកាន់តែខ្លាំងឡើងពីសមាជិកសភាអឺរ៉ុប និងបណ្ដាប្រទេសក្នុងតំបន់។ នេះបើយោងតាមការចេញផ្សាយដោយសារព័ត៌មាន Reuters នៅព្រឹកថ្ងៃទី ០៩ ខែមីនា ឆ្នាំ២០២៣នេះ។
សភាអឺរ៉ុប គណៈកម្មការអឺរ៉ុប និងក្រុមប្រឹក្សាសហភាពអឺរ៉ុប ថ្មីៗនេះបានហាមឃាត់ TikTok ពីទូរស័ព្ទបុគ្គលិក ដោយសារតែមានការព្រួយបារម្ភកាន់តែខ្លាំងឡើងអំពីក្រុមហ៊ុនដែលជាកម្មសិទ្ធិរបស់ក្រុមហ៊ុនចិន ByteDance ក្រោមហេតុផលថា រដ្ឋាភិបាលចិនអាចនឹងប្រមូលទិន្នន័យរបស់អ្នកប្រើប្រាស់ ឬធ្វើសកម្មភាពណាមួយ ដែលប៉ះពាល់ដល់សន្តិសុខជាតិ។
ទន្ទឹមនឹងនេះ សេតវិមានបានគាំទ្រច្បាប់ដែលផ្តល់អំណាចថ្មីដល់រដ្ឋបាលក្នុងការហាមឃាត់កម្មវិធីវីដេអូ TikTok និងក្រុមហ៊ុនបច្ចេកវិទ្យាបរទេសផ្សេងៗទៀត ប្រសិនបើពួកគេបង្កការគំរាមកំហែងសន្តិសុខជាតិ។
នៅឯសន្និសីទព័ត៌មានកាលពីថ្ងៃពុធ TikTok បាននិយាយថា ខ្លួននឹងចាប់ផ្តើមរក្សាទុកទិន្នន័យអ្នកប្រើប្រាស់អឺរ៉ុបនៅក្នុងស្រុកនៅឆ្នាំនេះ ហើយនឹងបន្តរហូតដល់ឆ្នាំ២០២៤។
ជាផ្នែកនៃការផ្លាស់ប្តូរនេះ ក្រុមហ៊ុនបានបញ្ជាក់ថា ខ្លួននឹងបើកមជ្ឈមណ្ឌលទិន្នន័យទីពីរក្នុងប្រទេសអៀរឡង់ឆាប់ៗនេះ និងមួយទៀតនៅក្នុងតំបន់ Hamar នៃប្រទេសន័រវេស។ មជ្ឈមណ្ឌលទិន្នន័យទាំងនេះនឹងត្រូវបានដំណើរការដោយភាគីទីបីដែលមិនមែនជាក្រុមហ៊ុនចិន ឬកម្មសិទ្ធិរបស់ចិន។
“យើងជាក្រុមហ៊ុនដែលគាំទ្រការអនុលោមតាមច្បាប់។ ប្រាប់យើងពីអ្វីដែលជាបញ្ហា ហើយបន្ទាប់មកយើងធ្វើការជាមួយគ្នាលើដំណោះស្រាយ។ នោះគឺជាវិធីសាស្រ្តរបស់យើងនៅក្នុងសហរដ្ឋអាមេរិក ហើយវាក៏ជាវិធីសាស្រ្តរបស់យើងនៅគ្រប់ទីកន្លែង”។ នេះជាសម្ដីរបស់លោក Theo Bertram អនុប្រធានផ្នែកទំនាក់ទំនងរដ្ឋាភិបាល និងគោលនយោបាយសាធារណៈ។
លោកបានបន្ថែមទៀតថា “វិធីសាស្រ្តរបស់យើងគឺបើកចំហយ៉ាងខ្លាំងចំពោះរដ្ឋាភិបាល និយតករ និងអ្នកជំនាញដើម្បីផ្តល់ឱ្យយើងនូវការប្រឹក្សា និងដំបូន្មានរបស់ពួកគេអំពីរបៀបដែលយើងអាចធ្វើវាឱ្យកាន់តែមានប្រសិទ្ធភាព។
ជាចុងក្រោយ ក្រុមហ៊ុន ByteDance បាននិយាយថា ខ្លួននឹងកាត់បន្ថយការផ្ទេរទិន្នន័យនៅខាងក្រៅតំបន់ និងកាត់បន្ថយការចូលប្រើរបស់បុគ្គលិកទៅកាន់ទិន្នន័យអ្នកប្រើប្រាស់ខាងក្នុង៕
