ភាពសំខាន់នៃការបញ្ចូលភាពច្នៃប្រឌិត ទៅលើអាជីវកម្មក្នុងសង្គមឌីជីថល
ភាពសំខាន់នៃការបញ្ចូលភាពច្នៃប្រឌិត ទៅលើអាជីវកម្មក្នុងសង្គមឌីជីថល
នៅក្នុងសហគ្រាសធុនតូច និងមធ្យម ម្ចាស់អាជីវកម្មគួរមានរួមបញ្ចូលនូវការច្នៃប្រឌិត ឬការបង្កើតអ្វីដែលថ្មី ដែលអាចជាផលិតផល សេវាកម្ម ឬមធ្យោបាយអាជីវកម្មណាមួយដែលមិនធ្លាប់មានពីមុនមកនៅក្នុងសង្គម។
ការកែច្នៃផលិតផលចាស់ៗឱ្យទៅជាផលិតផលថ្មី និងការធ្វើឱ្យផលិតផលដែលមានស្រាប់ មានភាពប្រសើរជាងមុនសុទ្ធតែអាចចាត់ទុកជានវានុវត្តន៍ ហើយនវានុវត្តន៍អាចធ្វើទៅបានក្នុងទម្រង់ជាច្រើនដូចជា៖ នវានុវត្តន៍ សេវាកម្ម នវានុត្តន៍ហិរញ្ញវត្ថុ នវានុវត្តន៍ទីផ្សារឌីជីថល ក៏ដូចជានវានុវត្តន៍ផលិតផលជាដើម។
យ៉ាងណាមិញ ដើម្បីដើរឱ្យស្របជាមួយនឹងបរិបថសង្គមបច្ចុប្បន្ននេះ ម្ចាស់អាជីវកម្មនីមួយៗគួរតែ ចាប់ផ្ដើមដាក់បញ្ចូលនូវភាពច្នៃប្រឌិតទៅក្នុងអាជីវកម្មដើម្បី៖
បង្កើនភាពប្រកួតប្រជែង ក្នុងទីផ្សារមួយដែលមានលក់ផលិតផលស្រដៀងៗគ្នា តម្លៃហាក់មានភាពប្រកៀកប្រកិត ស្របពេលដែលគុណភាពនៃផលិតផលក៏មានភាពប្រដំប្រសងគ្នានោះ។ ម្យ៉ាងទៀត គំនិតច្នៃប្រឌិតទៅលើផលិតផល ពិតជាអាចធ្វើឱ្យអាជីវកម្មមួយមានប្រៀបជាងអាជីវកម្មមួយទៀត។
ឧទាហរណ៍ អាជីវកម្មចំនួន១០ជ្រើសរើសលក់តែផ្លែក្រូចមួយមុខ តែមានអាជីវកម្ម១ក្នុងចំណោមអាជីវកម្មទាំងនោះលក់ទាំងផ្លែក្រូចនិងទឹកក្រូចស្រស់ទៀត ម្លោះហើយអាជីវកម្មតែមួយនោះនឹងទទួលបានការចាប់អារម្មណ៍ពីអតិថិជនច្រើនជាង ដោយសារភាពប្លែក និងមានជម្រើសថ្មីមួយទៀត។
ភាពច្នៃប្រឌិតក៏នឹងបង្កើនប្រសិទ្ធភាពការងារ តាមរយៈការកែច្នៃជាឧបករណ៍ថ្មីៗដើម្បីសម្រួលដល់ប្រតិបត្តិការអាជីវកម្មអោយលឿន និងមានប្រសិទ្ធភាពជាងមុន។ ឧទាហរណ៍ ការកែច្នៃឱ្យមានឧបករណ៍ និងប្រព័ន្ធសុហ្វហ្វែរ (Software System) ផ្សេងៗដែលពន្លឿនដំណើរការអាជីវកម្ម។
សំខាន់បំផុត ម្ចាស់អាជីវកម្មក៏អាចបង្កើនប្រាក់ចំណូលផងដែរ។ បង្កើនចំណូលព្រោះ នៅពេលដែលផលិតផលអាចបានបំពេញតម្រូវការថ្មីៗដល់អតិថិជនបាន ហើយចេះផ្តល់ភាពទុកចិត្ត និងភាពស្និទស្នាលដល់អតិថិជនថែមទៀត នោះនឹងធ្វើឱ្យចំណូលអាជីវកម្មកើនជាលំដាប់។
ឧទាហរណ៍ មានកម្មវិធីកម្មង់ម្ហូបអនឡាញ ២ ដែលមានមុខទំនិញស្ទើរតែដូចគ្នា ប៉ុន្តែកម្មវិធីមួយមានភាពរលូន ងាយស្រួលមើល និងងាយក្នុងការកម្មង់ជាង ធ្វើឱ្យអតិថិជនពេញចិត្តជាង ហើយក៏បង្កើនចំណូលជាមួយគ្នាផងដែរ។
សារៈសំខាន់មួយទៀតនៃការបញ្ចូលភាពច្នៃប្រឌិតទៅក្នុងអាជីវកម្មគឺការ សម្របខ្លួនបានកាន់តែល្អ ជាងមុន។ ក្នុងនាមជាម្ចាស់អាជីវកម្ម ដើម្បីឱ្យអាជីវកម្មមួយមានដំណើរការដោយនិរន្តភាព គឺតម្រូវឱ្យមានការសម្របខ្លួន និងចេះបត់បែនតាមបរិបទ ទៅតាមភាពពេញនិយមរបស់សង្គម។ ឧទាហរណ៍ ក្នុងសម័យឌីជីថលនេះ ការផលិតទូរស័ព្ទស៊េរីមុនលែងជាតម្រូវការ និងភាពពេញនិយមទៀតហើយ ដោយមនុស្សសម័យនេះត្រូវការទូរសព្ទទំនើបៗ មានកាមេរ៉ា និងអាចប្រើប្រាស់អ៉ិនធឺណែតបានជាដើម៕
