ដឹងតែកក្រើកហើយ! Real Madrid ប៉ះ Barca ក្នុងវគ្គផ្តាច់ព្រ័ត្រ Spanish Super Cup

ដឹងតែកក្រើកហើយ! Real Madrid ប៉ះ Barca ក្នុងវគ្គផ្តាច់ព្រ័ត្រ Spanish Super Cup

ក្រុមអធិរាជស Real Madrid នឹងត្រូវឡើងទៅជួបក្រុមអ្នកមានបុណ្យ FC Barcelona នៅវគ្គផ្ដាច់ព្រ័ត្រ Spanish Super Cup បន្ទាប់ពីយកឈ្នះ Mallorca យ៉ាងងាយស្រួល ក្នុងលទ្ធផល ៣-០ កាលពីយប់ថ្ងៃព្រហស្បតិ៍ ទី០៩ ខែមករា ឆ្នាំ២០២៥។

ការប្រកួតដែលធ្វើឡើងនៅឯកីឡដ្ឋាន King Abdullah Sports City ប្រទេសអារ៉ាប៊ីសាអូឌីត ក្រុមស្ដេចស Real Madrid បានយកឈ្នះ យ៉ាងងាយស្រួល ទៅលើក្រុម Mallorca ក្នុងលទ្ធផល ៣-០។ គ្រាប់បាល់ទាំង ៣គ្រាប់នោះ ស៊ុតបញ្ជូលទីដោយកីឡាករ Bellingham និង Rodrygo ខណៈ១គ្រាប់ទៀត ជាការធ្វើឲ្យចូលទីខ្លួនឯងពីសំណាក់កីឡាករ Valjent របស់ Mallorca។

ដូច្នេះ Real Madrid ត្រូវជួប Barcelona (Barca) នៅវគ្គផ្ដាច់ព្រ័ត្រ ដែលនេះ ក៏ជា El Clasico លើកដំបូងក្នុងឆ្នាំ ២០២៥ ផងដែរ ខណៈការប្រកួត នឹងត្រូវធ្វើឡើងនៅកីឡដ្ឋាន King Abdullah Sports City ក្នុងទីក្រុង Jeddah ប្រទេសអារ៉ាប៊ីសាអូឌីត នៅថ្ងៃទី ១២ ខែមករា ឆ្នាំ២០២៥។

គួររំលឹកថា Barca បានឈ្នះពាន Spanish Super Cup ច្រើនជាងគេ ចំនួន ១៤ ដង ស្របពេលដែល Real បានឈ្នះវាតិចជាងមួយដង ពោលគឺ ១៣ដង ប៉ុន្តែបានឈ្នះវា ៣ដង ក្នុងចំណោម ៥លើកចុងក្រោយ។

មានអ្នកគាំទ្រជាច្រើនឆ្ងល់ថា ការប្រកួត Spanish Super Cup របស់អេស្ប៉ាញ ហេតុអ្វីក៏មកលេងនៅប្រទេសអារ៉ាប៊ីសាអូឌីត? ចម្លើយ គឺដោយសារកាលពីឆ្នាំ ២០១៩ សហព័ន្ធកីឡាបាល់ទាត់អេស្ប៉ាញ (RFEF) បានចុះកិច្ចព្រមព្រៀង ៤៣លានដុល្លារ រយៈពេល ១០ឆ្នាំ ជាមួយអាជ្ញាធរកីឡាអារ៉ាប៊ីសាអូឌីត ដើម្បីពង្រីកពានរង្វាន់ Spanish Super Cup ពីពីរក្រុមទៅ ៤ក្រុម ហើយនឹងធ្វើឡើងនៅមជ្ឈិមបូព៌ា។ កាលពីរដូវកាលមុន Real បានយកឈ្នះ Barca ៤-១ នៅវគ្គផ្តាច់ព្រ័ត្រ៕