Carsley ថាក្រោមការដឹកនាំរបស់ លោក Thomas Tuchel អង់គ្លេស នឹងឈ្នះ World Cup 2026

Carsley ថាក្រោមការដឹកនាំរបស់ លោក Thomas Tuchel អង់គ្លេស នឹងឈ្នះ World Cup 2026

គ្រូបង្វឹកបណ្ដោះអាសន្ន លោក Lee Carsley បាននិយាយថា អ្នកចាត់ការក្រុមអង់គ្លេស លោក Thomas Tuchel ដែលចូលមកមានកីឡាករគ្រប់តំបន់ទាំងអស់ ដែលគាត់ត្រូវការ ដើម្បីឈ្នះការប្រកួត World Cup 2026។

ការដឹកនាំចំនួន ៦ប្រកួតរបស់ Carsley ជាមួយអង់គ្លេស បានបញ្ចប់ជាមួយនឹងជ័យជម្នះ ៥-០ កាលពីថ្ងៃអាទិត្យ លើប្រទេសអៀរឡង់ ដែលបានជួយក្រុមតោកំណាច ឡើងទៅកាន់ក្របខ័ណ្ឌកំពូល Nations League ដោយស្វ័យប្រវត្តិ។

គ្រូបង្វឹកសញ្ជាតិអាឡឺម៉ង់ លោក Thomas Tuchel ដែលធ្លាប់គ្រប់គ្រង Paris St Germain, Chelsea និង Bayern Munich ត្រូវបានតែងតាំងកាលពីខែមុន ហើយនឹងចូលកាន់តំណែងនៅខែមករា។

បន្ទាប់ពីការមកដល់របស់លោក Thomas Tuchel លោក Carsley នឹងវិលមកកាន់តួនាទីជាអ្នកចាត់ការក្រុមអាយុ ក្រោម២១ឆ្នាំ។

គួររំលឹកថា អតីតអ្នកចាត់ការ Gareth Southgate បានដឹកនាំប្រទេសអង់គ្លេស ឡើងដល់វគ្គពាក់កណ្តាលផ្តាច់ព្រ័ត្រ World Cup 2018 ប៉ុន្តែ លោក Carsley គិតថា លោក Tuchel អាចដឹកនាំក្រុមលើកពាន World Cup 2026 នៅអាមេរិកខាងជើង។

មែនទែនទៅ អង់គ្លេស មិនបានឈ្នះពាន World Cup ឬពានធំណាមួយទៀតទេ ចាប់តាំងពីឆ្នាំ ១៩៦៦។ ជុំវិញបញ្ហានេះ លោក Carsley វ័យ ៥០ឆ្នាំ បានប្រាប់ប្រព័ន្ធផ្សព្វផ្សាយអង់គ្លេសថា ៖«ខ្ញុំគិតថា យើងមានសមត្ថភាពគ្រប់គ្រាន់ ក្នុងការឈ្នះពានទាំងនេះ។ យើងមានទេពកោសល្យ ដើម្បីធ្វើវា។ ពេលនេះ ខ្ញុំមានសំណាងណាស់ ដែលដឹកនាំក្រុមដែលមានកីឡាករដ៏ល្អ ទាំងទម្រង់លេង ទាំងកាយសម្បទា និងផ្លូវចិត្ត។ សរុបមក យើងមានគ្រប់គ្រឿងអស់ហើយ។ យើងគ្រាន់តែត្រូវការលេង វាតាមលំដាប់លំដោយ… នឹងរៀបយុទ្ធសាស្ត្រប៉ុណ្ណោះ»៕