អង់គ្លេស ឈ្នះ ហ្វាំងឡង់ ខណៈ អាល្លឺម៉ង់ ស្មើ ហូឡង់ ក្នុងការប្រកួត Nation League

អង់គ្លេស ឈ្នះ ហ្វាំងឡង់ ខណៈ អាល្លឺម៉ង់ ស្មើ ហូឡង់ ក្នុងការប្រកួត Nation League

ក្រុមតោកំណាចអង់គ្លេស ក្រោមការដឹកនាំរបស់គ្រូបង្វឹកបណ្តោះអាសន្ន លោក Lee Carsley បានយកឈ្នះ ហ្វាំងឡង់ ២ ទល់នឹង ០ ខណៈក្រុមជម្រើសជាតិអាល្លឺម៉ង់ បានត្រឹមស្មើជាមួយម្ចាស់ផ្ទះ ហូឡង់ ក្នុងលទ្ធផល ២ ទល់នឹង ២ ក្នុងការប្រកួតពានរង្វាន់ UEFA Nation League កាលពីយប់មិញ។

ការប្រកួតដែលធ្វើឡើងនៅកីឡដ្ឋាន Wembley ដែលអាចផ្ទុកអ្នកទស្សនាបាន៩ម៉ឺននាក់ ក្រុមម្ចាស់ផ្ទះអង់គ្លេស បានយកឈ្នះ ក្រុមជម្រើសជាតិហ្វាំងឡង់ យ៉ាងងាយស្រួលក្នុងលទ្ធផល ២-០។ ២គ្រាប់ទាំង២គ្រាប់របស់អង់គ្លេស រកបានដោយខ្សែប្រយុទ្ធ Harry Kane។ ក្នុងការប្រកួតយប់មិញនេះ គេសង្កេតឃើញថា អង់គ្លេស បានបង្ហាញទម្រង់លេងដ៏ល្អមិនធ្លាប់មានក្នុងរយៈពេលប៉ុន្មានឆ្នាំចុងក្រោយនេះ ដោយកីឡាករទាំងអស់លេងយល់ចិត្តគ្នាខ្លាំងមែនទែន។

មែនទែនទៅ នេះជ័យជម្នះ ជាលើកទីពីររបស់ពួកគេ ក្រោមការដឹកនាំរបស់អ្នកចាត់ការបណ្ដោះអាសន្ន លោក Lee Carsley បន្ទាប់ពីជ័យជម្នះក្រៅដីលើ អៀរឡង់ កាលពីថ្ងៃសៅរ៍ និងធ្វើឱ្យពួកគេឈរនៅលើកំពូលតារាងជាមួយក្រិច ខណៈពេលដែលការជជែកវែកញែកអំពីលោក Carsley អាចក្លាយជាអ្នកចាត់ការពេញសិទ្ធ បន្ទាប់ពីការលាលែងពីតំណែងរបស់លោក Gareth Southgate។

ចំណែកការប្រកួតដែលធ្វើឡើងនៅទីក្រុងអាំស្ទែដាំ ប្រទេសហូឡង់ រវាងម្ចាស់ផ្ទះហូឡង់ និងអាល្លឺម៉ង់ បានត្រឹមស្មើគ្នា ក្នុងលទ្ធផល ២-២។ ២គ្រាប់របស់ហូឡង់ រកបានដោយកីឡាករ Reijnders និង Dumfries ខណៈ ២គ្រាប់របស់អាល្លឺម៉ង់ រកបានដោយកីឡាករ Kimmich និង Deniz Undav។

តាមរយៈជ័យជំនះ ក្រុមជម្រើសជាតិអាល្លឺម៉ង់ ឈរកំពូលតារាង League A Group 3 មាន ៤ពិន្ទុ ស្មើគ្នាជាមួយ ហូឡង់ ខណៈហុងគ្រី និងបូស្នៀ ឈរបាតតារាងមាន១ពិន្ទុ ដូចគ្នា៕