អគ្គនាយកដ្ឋានអន្តោរប្រវេសកម្ពុជា និងកូរ៉េពិភាក្សាពង្រីកចំណងកិច្ចសហប្រតិបត្តិការទ្វេភាគី

អគ្គនាយកដ្ឋានអន្តោរប្រវេសកម្ពុជា និងកូរ៉េពិភាក្សាពង្រីកចំណងកិច្ចសហប្រតិបត្តិការទ្វេភាគី

ភ្នំពេញ៖ ឯកឧត្តម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ និង គណៈប្រតិភូអគ្គនាយកដ្ឋានអន្តោប្រវេសន៍ ក្រសួងយុត្តិធម៌ សាធារណរដ្ឋកូរ៉េ ដែលដឹកនាំគណៈប្រតិភូដោយ ឯកឧត្តម LEE JAE YOO អគ្គនាយក នៃអគ្គនាយកដ្ឋានអន្តោប្រវេសន៍កូរ៉េ ពិភាក្សា ផ្លាស់ប្ដូរបទពិសោធន៍និង ពង្រីកចំណងកិច្ចសហប្រតិបត្តិការទ្វេភាគីលើកទី២។

កិច្ចប្រជុំពិភាក្សានេះ ត្រូវបានរៀបចំឡើងនៅថ្ងៃទី ១៨ ខែមេសា ឆ្នាំ ២០២៤ ដើម្បីពង្រីកចំណងកិច្ចសហប្រតិបត្តិការទ្វេភាគី ដោយគណៈប្រតិភូទាំងពីរ បានធ្វើការផ្លាស់ប្តូរបទពិសោធន៍គ្នាលើការងារជំនាញអន្តោប្រវេសន៍ ជាមួយការលើកបទបង្ហាញនូវលទ្ធផលការងារដែលសម្រេចបាន និងទិសដៅអនុវត្តការងារបន្តសំដៅទប់ស្កាត់បទល្មើសអន្តោប្រវេសន៍គ្រប់ប្រភេទ។

ឯកឧត្តម LEE JAE YOO អគ្គនាយក នៃអគ្គនាយកដ្ឋានអន្តោប្រវេសន៍កូរ៉េ បានថ្លែងអំណរគុណយ៉ាងជ្រាលជ្រៅចំពោះការរៀបចំនូវកិច្ចប្រជុំទ្វេភាគីលើកទី២នេះ ដែលនឹងអនុញ្ញាតឱ្យអង្គភាពទាំងពីរ បន្តជំរុញលើកកំពស់កិច្ចសហប្រតិបត្តិការ ការផ្លាស់ប្តូរព័ត៌មានគ្នាទៅវិញទៅមកលើការងារអន្តោប្រវេសន៍ ឱ្យកាន់តែមានប្រសិទ្ធភាព។

ជាការឆ្លើយតប ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានឯកភាពចំពោះសារៈសំខាន់នៃកិច្ចសហប្រតិបត្តិការទ្វេភាគីនេះ ដែលនឹងចូលរួមសំដៅទប់ស្កាត់បទល្មើសឧក្រិដ្ឋកម្មឆ្លងដែនគ្រប់រូបភាព ជាពិសេសការបន្តយកចិត្តទុកដាក់សម្របសម្រួលជូនប្រជាជនទាំងពីរប្រទេសដែលបានធ្វើដំណើរ និងកំពុងស្នាក់អាស្រ័យប្រកបរបរ ក្នុងប្រទេសទាំងពីរ។

បន្ថែមពីលើនេះផងដែរ ឯកឧត្តម LEE JAE YOO អគ្គនាយកអន្តោប្រវេសន៍កូរ៉េ បានធ្វើការថ្លែងអំណរគុណដល់អគ្គនាយកដ្ឋានអនោ្តប្រវេសន៍កម្ពុជា ដែលបានទទួលបដិសណា្ឋរកិច្ចយ៉ាងកក់ក្តៅជូនគណៈប្រតិភូអគ្គនាយកដ្ឋានអន្តោប្រវេសន៍កូរ៉េ និងបានអរគុណចំពោះការចែករំលែកបទពិសោធន៍ការងារទៅវិញទៅមក។

ជាមួយគ្នានោះ គណៈប្រតិភូទាំងពីរ បានឯកភាពនឹងបន្តពង្រឹង និងពង្រីកកិច្ចសហប្រតិបត្តិការទ្វេភាគីនេះឱ្យកាន់តែប្រសើរឡើង៕