អាល្លឺម៉ង់ និងប្រទេសមួយចំនួនទៀត បញ្ចេញប្រេងបម្រុងដើម្បីទប់ស្កាត់ការកើនឡើងតម្លៃប្រេង

អាល្លឺម៉ង់ និងប្រទេសមួយចំនួនទៀត បញ្ចេញប្រេងបម្រុងដើម្បីទប់ស្កាត់ការកើនឡើងតម្លៃប្រេង

ក្រុងប៊ែរឡាំង៖អាល្លឺម៉ង់ អូទ្រីស ជប៉ុន អេស្ប៉ាញ និងបារាំង បានបង្ហាញផែនការបញ្ចេញប្រេងបម្រុងមួយផ្នែករបស់ពួកគេ បន្ទាប់ពីទីភ្នាក់ងារថាមពលអន្តរជាតិ (IEA) បានពិភាក្សាអំពីជម្រើសនេះ ដើម្បីទប់ស្កាត់ការកើនឡើងតម្លៃប្រេង ដែលបណ្តាលមកពីសង្គ្រាមនៅអ៊ីរ៉ង់។

កិច្ចខិតខំប្រឹងប្រែងសម្របសម្រួលដើម្បីរក្សាតម្លៃប្រេង និងតម្លៃប្រេងឥន្ធនៈនៅតាមស្ថានីយ៍ចាក់ប្រេងឱ្យមានស្ថិរភាព បានចាប់ផ្តើមនៅថ្ងៃពុធ នៅប្រទេសអាល្លឺម៉ង់ និងប្រទេសផ្សេងៗ។ ការផ្លាស់ប្តូរនេះកើតឡើង ខណៈតម្លៃប្រេងកំពុងកើនឡើងយ៉ាងឆាប់រហ័ស បន្ទាប់ពីការវាយប្រហារលើអ៊ីរ៉ង់ និងភាពតានតឹងកាន់តែធ្ងន់ធ្ងរនៅតំបន់មជ្ឈិមបូព៌ា។

នាយកប្រតិបត្តិនៃទីភ្នាក់ងារថាមពលអន្តរជាតិ (IEA) លោក Fatih Birol បាននិយាយថា បញ្ហាទីផ្សារប្រេងដែលពិភពលោកកំពុងប្រឈមមុខ មានទំហំធំមិនធ្លាប់មានពីមុនមក។ លោកបានបញ្ជាក់ថា ប្រទេសសមាជិក IEA បានឆ្លើយតបជាមួយសកម្មភាពរួមដ៏ធំបំផុត ដើម្បីដោះស្រាយបញ្ហានេះ។

អាល្លឺម៉ង់ និងប្រទេសផ្សេងៗ ចូលរួមសកម្មភាពសម្របសម្រួល

រដ្ឋមន្ត្រីសេដ្ឋកិច្ចអាល្លឺម៉ង់ លោកស្រី Katherina Reiche បានប្រកាសក្នុងសន្និសីទសារព័ត៌មាននៅទីក្រុងប៊ែរឡាំងថា IEA បានស្នើឱ្យសមាជិករបស់ខ្លួន បញ្ចេញប្រេងសរុបប្រមាណ ៤០០ លានបារ៉ែល ពីទុនបម្រុងជាតិ។

លោកស្រីបានបញ្ជាក់ថា អាល្លឺម៉ង់នឹងចូលរួមក្នុងសកម្មភាពនេះ ដោយគ្រោងបញ្ចេញប្រេងប្រហែល ២,៤ លានតោន ពីទុនបម្រុងរបស់ខ្លួន។ ទោះបីបច្ចុប្បន្នមិនមានការខ្វះខាតប្រេងក្នុងប្រទេសក៏ដោយ ការបញ្ចេញប្រេងបម្រុងគឺជាវិធានការចាំបាច់ ដើម្បីជួយដោះស្រាយបញ្ហាក្នុងទីផ្សារថាមពលពិភពលោក។

ដូចគ្នានេះដែរ រដ្ឋាភិបាលអូទ្រីសបានប្រកាសថា នឹងកំណត់ការកែប្រែតម្លៃប្រេងសាំង និងប្រេងម៉ាស៊ូតនៅតាមស្ថានីយ៍ចាក់ប្រេងឱ្យបានតែម្តងក្នុងមួយថ្ងៃ ហើយក៏នឹងចូលរួមក្នុងផែនការអន្តរជាតិ ដើម្បីបញ្ចេញប្រេងបម្រុងផងដែរ។

រដ្ឋាភិបាលជប៉ុនក៏បានប្រកាសសេចក្តីថ្លែងការណ៍ស្រដៀងគ្នា ដោយបញ្ជាក់ថា ប្រទេសជប៉ុននឹងចាប់ផ្តើមបញ្ចេញប្រេងបម្រុងយុទ្ធសាស្ត្ររបស់ខ្លួន នៅដើមសប្តាហ៍ក្រោយ ដើម្បីជួយបន្ធូរបន្ថយសម្ពាធក្នុងទីផ្សារថាមពលអន្តរជាតិ។
នាយករដ្ឋមន្ត្រីជប៉ុន លោកស្រី Sanae Takaichi បាននិយាយថា ប្រទេសជប៉ុនមិនចាំបាច់រង់ចាំការសម្រេចចិត្តអន្តរជាតិទេ ប៉ុន្តែនឹងចាប់ផ្តើមសកម្មភាពជាមុន ដើម្បីជួយសម្រួលការផ្គត់ផ្គង់ និងតម្រូវការនៅក្នុងទីផ្សារថាមពល។

រដ្ឋមន្ត្រីសេដ្ឋកិច្ចបារាំង លោក Roland Lescure បាននិយាយថា ការប្រកាសទាំងនេះជាផ្នែកមួយនៃយុទ្ធសាស្ត្រសម្របសម្រួលយ៉ាងតឹងរឹងរបស់ប្រទេសលោកខាងលិច។

កំណត់ការកើនតម្លៃប្រេងនៅស្ថានីយ៍ចាក់ប្រេង

លោកស្រី Reiche ក៏បានបញ្ជាក់ថា អាល្លឺម៉ង់គ្រោងអនុវត្ត “គំរូអូស្ត្រាលី” ដោយកំណត់ឱ្យស្ថានីយ៍ប្រេងឥន្ធនៈអាចបង្កើនតម្លៃបានតែម្តងក្នុងមួយថ្ងៃ។

វិធានការនេះមានគោលបំណងទប់ស្កាត់អ្វីដែលអ្នកជំនាញហៅថា “rocket and feather effect” ដែលមានន័យថា តម្លៃប្រេងឡើងលឿនដូចរ៉ុក្កែត នៅពេលតម្លៃប្រេងឆៅកើនឡើង ប៉ុន្តែធ្លាក់ចុះយឺតដូចស្លាប នៅពេលតម្លៃប្រេងឆៅធ្លាក់ចុះ។
រដ្ឋាភិបាលអាល្លឺម៉ង់មានគោលបំណងបំបែកយន្តការនេះ ដើម្បីការពារអតិថិជនពីការឡើងថ្លៃមិនសមរម្យ។ ទោះយ៉ាងណា វិធានការនេះត្រូវការការកែប្រែច្បាប់ជាមុន មុនពេលអនុវត្តជាផ្លូវការ។

ផែនការបញ្ចេញប្រេង និងស្ថានភាពតម្លៃបច្ចុប្បន្ន

យោងតាមប្រភពពី IEA ផែនការដំបូងគឺបញ្ចេញប្រេងប្រហែល ១០០ លានបារ៉ែល ជាជំហានដំបូង ក្នុងចំណោមផែនការសរុប ៤០០ លានបារ៉ែល។

ជាឧទាហរណ៍ ក្រោយការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ២០២២ ប្រទេសលោកខាងលិចបានបញ្ចេញប្រេងបម្រុងប្រមាណ ១៨៣ លានបារ៉ែល ដើម្បីបន្ធូរបន្ថយសម្ពាធទីផ្សារ។

តម្លៃប្រេងបានកើនឡើងខ្លាំង បន្ទាប់ពីការវាយប្រហារលើអ៊ីរ៉ង់ និងការប្រយុទ្ធគ្នានៅតំបន់ឈូងសមុទ្រ ដែលបានប៉ះពាល់ដល់ការដឹកជញ្ជូនប្រេងតាមច្រកសមុទ្រ Hormuz។

ទោះជាយ៉ាងណា តម្លៃប្រេងបានធ្លាក់ចុះបន្តិចពីកម្រិតខ្ពស់ជាង ១០០ ដុល្លារ ក្នុងមួយបារ៉ែល ដែលបានឈានដល់នៅដើមសប្តាហ៍។ គិតត្រឹមថ្ងៃពុធ ប្រេង Brent Crude មានតម្លៃប្រហែល ៩០ ដុល្លារ ក្នុងមួយបារ៉ែល ខណៈកាលពីខែមុនមានតម្លៃប្រហែល ៦៨ ដុល្លារ។

ច្បាប់គ្រប់គ្រងការបញ្ចេញប្រេងបម្រុង

ការគ្រប់គ្រងទុនបម្រុងប្រេងរបស់អាល្លឺម៉ង់ ត្រូវបានអនុវត្តដោយអង្គការមួយហៅថា សមាគមស្តុកប្រេង ដែលស្ថិតក្រោមការត្រួតពិនិត្យរបស់ក្រសួងសេដ្ឋកិច្ច និងថាមពល។

ច្បាប់កំណត់ថា អាល្លឺម៉ង់ត្រូវរក្សាទុនបម្រុងប្រេងស្មើនឹង ៩០ ថ្ងៃនៃការនាំចូលប្រេងសុទ្ធ ដែលមានន័យថាប្រេងគ្រប់គ្រាន់សម្រាប់ប្រើប្រាស់ប្រហែល ៣ ខែ ប្រសិនបើគ្មានការនាំចូលប្រេងពីក្រៅប្រទេស។

ការបញ្ចេញប្រេងបម្រុងត្រូវធ្វើឡើង នៅពេលមានការរំខានធ្ងន់ធ្ងរដល់ការផ្គត់ផ្គង់ប្រេងឥន្ធនៈ ហើយមិនអនុញ្ញាតឱ្យប្រើជាវិធានការសម្រាប់បន្ថយតម្លៃទីផ្សារប៉ុណ្ណោះទេ ប៉ុន្តែសម្រាប់ធានាការផ្គត់ផ្គង់ និងស្ថិរភាពថាមពល៕