ប្រធានាធិបតីអាមេរិកលោក Joe Biden៖ ខ្ញុំមិនប្រាកដថា តើសហរដ្ឋអាមេរិកនឹងហាមប្រាម TikTok ឬអត់នោះទេ?
ប្រធានាធិបតីអាមេរិកលោក Joe Biden៖ ខ្ញុំមិនប្រាកដថា តើសហរដ្ឋអាមេរិកនឹងហាមប្រាម TikTok ឬអត់នោះទេ?
បរទេស៖ ប្រធានាធិបតីសហរដ្ឋអាមេរិក លោក Joe Biden បាននិយាយនៅថ្ងៃចន្ទនេះថា លោកមិនប្រាកដថា តើរដ្ឋាភិបាលក្រុងវ៉ាស៊ីនតោននឹងហាមឃាត់ការប្រើប្រាស់កម្មវិធីវីដេអូខ្លី TikTok ដែលគ្រប់គ្រងដោយចិន ឬយ៉ាងណានោះទេ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី០៧ ខែកុម្ភ: ឆ្នាំ២០២៣។
លោក Biden បាននិយាយដោយឆ្លើយតបនឹងសំណួររបស់អ្នកសារព័ត៌មានអំពី TikTok ថា «ខ្ញុំមិនប្រាកដទេ។ ខ្ញុំដឹងថា ខ្ញុំមិនមានវានៅលើទូរស័ព្ទរបស់ខ្ញុំទេ»។
នៅប៉ុន្មានថ្ងៃមុននេះ លោក Michael Bennet សមាជិកព្រឹទ្ធសភាមកពីរដ្ឋ Colorado Democratic បានហៅ TikTok ថាជា «ការគំរាមកំហែងដែលមិនអាចទទួលយកបានចំពោះសន្តិសុខជាតិរបស់សហរដ្ឋអាមេរិក» ព្រមទាំងបានជំរុញឱ្យមានការហាមឃាត់ការប្រើកម្មវិធី TikTok ជាផ្លូវការ។
លោក Michael Bennet ក៏បានអំពាវនាវឱ្យ Apple និង Google ដកកម្មវិធី TikTok ចេញពី Store របស់ពួកគេ ជុំវិញការព្រួយបារម្ភអំពីសន្តិសុខជាតិផងដែរ ខណ:ដែលរដ្ឋធំៗជាច្រើនរបស់សហរដ្ឋអាមេរិកចូលរួមយុទ្ធនាការហាមឃាត់ការប្រើប្រាស់កម្មវិធី TikTok នៅលើទូរស័ព្ទ និងឧបករណ៍ផ្សេងៗទៀតរបស់មន្ត្រីរដ្ឋាភិបាល។
ពាក់ព័ន្ធនឹងបញ្ហាសន្តិសុខជាតិនេះ ខាងក្រុមហ៊ុន ByteDance ដែលជាមេធំរបស់ TikTok ធ្លាប់បានអះអាងថា ទិន្នន័យរបស់អ្នកប្រើប្រាស់អាមេរិកគឺរក្សាទុកនៅអាមេរិក និងមិនមានការចូលប្រើប្រាស់ដោយរដ្ឋាភិបាលចិននោះទេ ប៉ុន្តែក្រោយមកស្រាប់តែ TikTok បានសារភាពថា ទិន្នន័យរបស់ពួកគេអាចត្រូវបានចូលប្រើដោយបុគ្គលិកដែលមានមូលដ្ឋាននៅក្នុងប្រទេសចិន៕
