កម្ពុជា – កូរ៉េ ពិភាក្សាគ្នាលើគម្រោងបង្កើតរោងចក្រកែច្នៃគ្រាប់ស្វាយចន្ទី
កម្ពុជា – កូរ៉េ ពិភាក្សាគ្នាលើគម្រោងបង្កើតរោងចក្រកែច្នៃគ្រាប់ស្វាយចន្ទី
កម្ពុជា – កូរ៉េ បានជួបពិភាក្សាគ្នាដើម្បីឈានទៅដល់ការបង្កើតរោងចក្រកែច្នៃគ្រាប់ស្វាយចន្ទីកម្ពុជាកម្រិតស្នង់ដារ ក្នុងគោលដៅធ្វើការនាំចេញទៅកាន់ទីផ្សារអន្តរជាតិស្របតាមចក្ខុវិស័យរបស់រាជរដ្ឋាភិបាល។
នាថ្ងៃទី ៣សីហា កន្លងទៅថ្មីៗនេះ ក្រសួងពាណិជ្ជកម្មតំណាងដោយ ឯកឧត្តម រាជ រ៉ា ដែលជារដ្ឋ លេខាធិការ បានជួបពិភាក្សាការងារជាមួយ ប្រតិភូវិទ្យាស្ថានអភិវឌ្ឍន៍សេដ្ឋកិច្ចជនបទកូរ៉េ និងតំណាងសមាគមធនធានកសិ-ឧស្សាហកម្មកូរ៉េនៅក្រៅប្រទេស លើគម្រោងសិក្សាលទ្ធភាពក្នុងការបង្កើតរោងចក្រកែច្នៃគ្រាប់ស្វាយចន្ទីនៅក្នុងប្រទេសកម្ពុជា។
ក្នុងឱកាសនោះ លោកបណ្ឌិត Heo Jang ដែលជាប្រធានគម្រោងបានជម្រាបអំពីបំណងក្នុងការចូលរួមលើកកម្ពស់វិស័យស្វាយចន្ទីកម្ពុជា ដោយពិនិត្យឃើញថាកន្លងមកស្វាយចន្ទីភាគច្រើនត្រូវបាននាំចេញទៅក្រៅប្រទេសដោយមិនទាន់បានកែច្នៃ ដែលនាំឱ្យបាត់បង់នូវតម្លៃបន្ថែម។
ហេតុដូចនេះ សមាគមធនធានកសិ-ឧស្សាហកម្មកូរ៉េនៅក្រៅប្រទេសរបស់កូរ៉េមានគោលបំណងក្នុងការចុះមកសិក្សានិងពិនិត្យលទ្ធភាព ក្នុងការបង្កើតរោងចក្រកែច្នៃចន្ទី តាមរយៈគម្រោងអភិវឌ្ឍន៍ផ្លូវការរបស់រដ្ឋាភិបាលកូរ៉េខាងត្បូង(ODA) ដែលអាចនឹងជួយបង្កើនតម្លៃបន្ថែមលើចន្ទីកម្ពុជាក្នុងការនាំចេញទៅទីផ្សារពិភពលោក។
ជាមួយគ្នានេះ ឯកឧត្តមរដ្ឋលេខាធិការ បានជម្រាបជាសង្ខេបអំពីខ្លឹមសារនៃគោលនយោបាយជាតិ
ស្តីពីស្វាយចន្ទី ឆ្នាំ២០២២-២០២៧ ដែលទើបទទួលបានការអនុម័តពីកិច្ចប្រជុំពេញអង្គគណៈរដ្ឋមន្រ្តី កាលពីថ្ងៃទី១៣ ខែមករា ឆ្នាំ២០២៣ និងប្រកាសផ្សព្វផ្សាយឱ្យប្រើប្រាស់ជាផ្លូវការ កាលពីថ្ងៃទី១៤ ខែមិថុនា ឆ្នាំ២០២៣កន្លងទៅនេះ។ ក្រៅពីនោះ ឯកឧត្តមក៏បានលើកឡើងពីទំនាក់ទំនងរវាងប្រទេសទាំងពីរ ជាពិសេសកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ ដែលទើបតែចូលជាធរមានកាលពីចុងឆ្នាំ២០២២ កន្លងទៅ។
ជាកិច្ចឆ្លើយតប កម្ពុជាបានស្វាគមន៍ចំពោះគំនិតផ្តួចផ្តើមដ៏មានសារៈសំខាន់នេះដែលស្របតាមការដាក់ចេញនូវគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ និងបានថ្លែងអំណរគុណចំពោះរដ្ឋាភិបាលកូរ៉េ ដែលតែងតែផ្តល់ការគាំទ្រ និងសហការជិតស្និទ្ធក្នុងពេលកន្លងមក។
បន្ថែមពីលើនេះ ឯកឧត្តមក៏បានស្នើសុំឱ្យប្រតិភូកូរ៉េ ជួយផ្សព្វផ្សាយនិងទាក់ទាញវិនិយោគិនកូរ៉េបន្ថែមមកវិនិយោគលើការកែច្នៃស្វាយចន្ទីក្នុងប្រទេសកម្ពុជា ក៏ដូចជាទិញទំនិញពីកម្ពុជាឱ្យបានកាន់តែច្រើនដោយសារប្រទេសទាំងពីរមានកិច្ចព្រមព្រៀងពាណិជ្ជកម្មសេរី(FTA)រវាងគ្នា ដែលមានមុខទំនិញជាច្រើនមានអត្រាពន្ធ០% ក្នុងនោះក៏មានគ្រាប់ស្វាយចន្ទីផងដែរ ដើម្បីបង្កើននូវទំហំពាណិជ្ជកម្មរវាងប្រទេសទាំងពីរ។
គួរបញ្ជាក់ថា កាលពីពេលកន្លងទៅសម្ដេចតេជោក៏ធ្លាប់បានលើកទឹកចិត្ត ក៏ដូចជាជំរុញដល់វិស័យឯកជនឱ្យចូលមកកែច្នៃស្វាយចន្ទីនៅកម្ពុជា បន្ថែមពីគម្រោងក្នុងការក្លាយជាអធិរាជស្វាយចន្ទី។
ជាក់ស្ដែង កាលពីខែមិថុនាកន្លងទៅនេះ ក្នុងឱកាសអនុញ្ញាតឱ្យលោកបណ្ឌិត ថានី ប៊ីន អាម៉េត អាល់ ហ្សេយូឌី (Thani bin Ahmed Al Zeyoudi) រដ្ឋមន្ត្រីពាណិជ្ជកម្មអន្តរជាតិអេមីរ៉ាតអារ៉ាប់រួមចូលជួបសម្ដែងការគួរសម សម្តេចតេជោបានស្នើឱ្យរដ្ឋមន្ត្រីពាណិជ្ជកម្មអន្តរជាតិអេមីរ៉ាតអារ៉ាប់រួម ជំរុញការវិនិយោគលើវិស័យកសិកម្មរបស់កម្ពុជា ដោយលើវិស័យស្រូវអង្ករ ការកែច្នៃស្វាយចន្ទី និងដំឡូមី ដោយសារកម្ពុជាអាចផលិតបានរាប់លានតោនក្នុង១ឆ្នាំៗ៕
