Real Madrid ត្រៀមជះលុយជាង ២០០លានអឺរ៉ូ ឆក់យក Mbappe ពី PSG

Real Madrid ត្រៀមជះលុយជាង ២០០លានអឺរ៉ូ ឆក់យក Mbappe ពី PSG

ក្លិបយក្សបារាំង Paris Saint-Germain(PSG) កំពុងប្រឈមមុខនឹងលទ្ធភាពចែកផ្លូវជាមួយខ្សែប្រយុទ្ធឆ្នើម Kylian Mbappe នៅរដូវក្តៅនេះ បន្ទាប់ពីតារាឆ្នើមសញ្ជាតិបារាំងរូបនេះ បដិសេធមិនបន្តតកុងត្រាថ្មី ខណៈបច្ចុប្បន្ននៅសល់កុងត្រាតែមួយឆ្នាំទៀតប៉ុណ្ណោះជាមួយក្រុមជើងឯក Ligue 1។

ប្រឈមមុខនឹងការរំពឹងទុកនៃការបាត់បង់ Mbappe នោះ PSG មិនឲ្យខាតនោះទេ ដោយបានត្រៀមខ្លួនជាស្រេចក្នុងការលក់ខ្សែប្រយុទ្ធដែលកើតក្នុងឆ្នាំ ១៩៩៨រូបនេះ ប្រសិនបើទទួលបានសំណើរសមរម្យណាមួយពីក្លិបផ្សេង ដែលចង់បានកីឡាកររបស់ខ្លួន។

យោងតាមកាសែតដែលតែងតែរាយការណ៍អំពី Real Madrid លោក Tomas Gonzalez-Martin បានអះអាងថា ពេលនេះ PSG ចង់លក់ Mbappe ក្នុងតម្លៃ ២៥០ លានអឺរ៉ូ បូករួមជាមួយប្រាក់បន្ថែមផ្សេងៗទៀតចំនួន ៥០លានអឺរ៉ូ ខណៈ Real Madrid ព្រមផ្ដល់ឲ្យត្រឹម ២០០ លានអឺរ៉ូ បូករួមជាមួយប្រាក់បន្ថែមផ្សេងៗទៀតចំនួន ២០លានអឺរ៉ូ ប៉ុណ្ណោះ។

មិនតែប៉ុណ្ណោះ លោក Gonzalez-Martin បានអះអាងថា ម្តាយ និងភ្នាក់ងាររបស់ Mbappe បាននិយាយគ្នាជាមួយ Real Madrid ក្នុងប៉ុន្មានខែថ្មីៗនេះ ហើយបច្ចុប្បន្ន កំពុងពិភាក្សាជាមួយក្លិប ដើម្បីបិទកិច្ចព្រមព្រៀងឱ្យបានឆាប់តាមដែលអាចធ្វើទៅបាន។

គួរបញ្ជាក់ថា បច្ចុប្បន្ន Real ត្រូវការខ្សែប្រយុទ្ធមុតស្រួចម្នាក់ ដើម្បីបំពេញ Role ដែលទំនេរ បន្ទាប់ពីការចាកចេញរបស់ Karim Benzema ទៅកាន់ទឹកដីអារ៉ាប់។ ដូច្នេះហើយ ពួកគេកំពុងបង្ហាញការតាំងចិត្ត ក្នុងការនាំយក Mbappe មកកាន់ Bernabeu៕