ក្រុមព្រះខ័នរាជស្វាយរៀង ត្រូវធ្វើការធ្ងន់ ដោយត្រូវប្រកួតអន្តរជាតិពីរ ក្នុងខែតែមួយ

ក្រុមព្រះខ័នរាជស្វាយរៀង ត្រូវធ្វើការធ្ងន់ ដោយត្រូវប្រកួតអន្តរជាតិពីរ ក្នុងខែតែមួយ

ក្រុមព្រះខ័នរាជស្វាយរៀង របស់កម្ពុជា នឹងត្រូវប្រកួតជាមួយក្រុម Madura United របស់ឥណ្ឌូណេស៊ី ក្នុងវគ្គពាក់កណ្ដាលផ្តាច់ព្រ័ត្រ នៃពានរង្វាន់ AFC Challenge League ជើងទីំមួយ នៅថ្ងៃទី១០ ខែមេសា ឆ្នាំ២០២៥ នៅពហុកីឡដ្ឋានជាតិមរតកតេជោ វេលាម៉ោង ១៩:០០ នាទីយប់។

បន្ទាប់មក ក្រុមព្រះខ័នរាជស្វាយរៀង នឹងធ្វើដំណើរទៅកាន់ទឹកដីក្រុម Madura United វិញ នៅជើងទីពីរ នៅថ្ងៃទី១៧ ខែមេសា ឆ្នាំ២០២៥ នាកីឡដ្ឋាន Stadion Gelora Joko Samudro ប្រទេសឥណ្ឌូណេស៊ី វេលាម៉ោង ១៥:៣០ នាទី។

មុនបានឡើងមកកាន់វគ្គពាក់កណ្ដាលផ្តាច់ព្រ័ត្រនេះ ក្រុមព្រះខ័នរាជស្វាយរៀង ក្នុងនាមជាក្រុមតំណាងកម្ពុជា បានយកឈ្នះ ក្រុម Shan United របស់មីយ៉ាន់ម៉ា ក្នុងលទ្ធផលសរុបទាំងពីរជើង ៧-៤ ក្នុងវគ្គ ៨ក្រុមចុងក្រោយ។ បច្ចុប្បន្ន ក្រុមព្រះខ័នរាជស្វាយរៀង ស្ថិតនៅកំពូលតារាងរបស់ប្រកួតជម្រើសជើងឯក ខេមបូឌានព្រីមៀរលីគ CPL បណ្ដោះអាសន្ន។ បន្ទាប់ពីឆ្លងកាត់២០ប្រកួត នឹងទទួលបាន ៦១ ពិន្ទុ។

ចំណែក ក្រុមបាល់ទាត់ Madura United ក្រុមឥណ្ឌូណេស៊ី បានឡើងមកកាន់វគ្គ ៤ក្រុមចុងក្រោយនេះដោយទម្លាក់ Tainan City ដោយលទ្ធផល សរុបទាំងពីរជើង ៣-០។ បច្ចុប្បន្ន ក្រុមនេះ ស្ថិតនៅចំណាត់ថ្នាក់ទី១៥ ក្នុងតារាង LIGA ១ រដូវកាល ២០២៤-២៥។

គួររំលឹកថា ក្រុមព្រះខ័នរាជស្វាយរៀង ធ្លាប់ចាញ់ក្រុម Madura United ម្ដងរួចមកហើយ កាលពីវគ្គសន្សំពិន្ទុកន្លងទៅក្នុងពានរង្វាន់ ដដែលនេះ និងចាញ់ ១ទល់០ ម្ដងដែរក្នុងពានរង្វាន់ Shopee Cup ។ ជួបម្ដងនេះជាឱកាសសងសឹង នឹងជាឱកាសឡើងទៅ កាន់វគ្គផ្ដាច់ព្រ័ត្រ ផងដែរ។

គួរបញ្ជាក់ថា ក្លិបបាល់ទាត់ព្រះខ័នរាជស្វាយរៀង កំពុងកាន់កាប់ទឹកប្រាក់ជាង ៣០ម៉ឺនដុលា្លររួចមកហើយគិតមកទល់ពេលនេះ ពោលគឺការចូលរួមប្រកួតវគ្គចែកពូល ទទួលបាន ១០ម៉ឺនដុល្លារ, កក់កៅអីវគ្គ ៨ក្រុមចុងក្រោយ ទទួលបាន ៨ម៉ឺនដុល្លារ និងឈ្នះ ១ប្រកួត នៅវគ្គចែកពូល ទទួលបាន ២ម៉ឺនដុល្លារ។ ចំណែកក្រុមដែលឈ្នះជើងឯក នឹងទទួលបាន ១លានដុល្លារ ខណៈជើងឯករង ទទួលបាន ៥០ម៉ឺនដុល្លារ៕