Messi ត្រូវបានលីគ MLS ពិន័យ ដោយសារច្របាច់ក គ្រូជំនួយគូប្រជែង

Messi ត្រូវបានលីគ MLS ពិន័យ ដោយសារច្របាច់ក គ្រូជំនួយគូប្រជែង

(បាល់ទាត់)៖ ប្រធានក្រុម Inter Miami កីឡាករ Lionel Messi ត្រូវបានគណៈកម្មាធិការរៀបចំការប្រកួត Major League Soccer (MLS) របស់សហរដ្ឋអាមេរិក ផាកពិន័យជាទឹកប្រាក់ ដោយសាររូបគេបានយកដៃច្របាច់ក ជំនួយការគ្រូបង្វឹក លោក Mehdi Ballouchy បន្ទាប់ពីការប្រកួត MLS ជាមួយក្រុម New York City ។

បន្ទាប់ពីត្រូវបានបញ្ចប់ ក្នុងលទ្ធផលស្មើ ២-២ ជាមួយក្រុម New York City ក្នុងការប្រកួតបើកឆាក MLS 2025 របស់ពួកគេ កីឡាករ Inter Miami ជាច្រើន បានប្រតិកម្មនឹងអាជ្ញាកណ្តាល លោក Alexis Da Silva និងគូប្រជែងរបស់ពួកគេ។ ពេលនោះ Messi បានចង្អុលចំទៅអាជ្ញាកណ្តាល ហើយបន្តនិយាយអ្វីមួយ រហូតដល់ទទួលបានកាតលឿង។

បន្ទាប់មក តារាឆ្នើមអាហ្សង់ទីន រូបនេះ បានបន្តប៉ះទង្គិចពាក្យសម្ដី ជាមួយជំនួយការគ្រូបង្វឹក ក្រុម New York City លោក Ballouchy ហើយ Messi បានដាក់ដៃលើកញ្ចឹងក ហើយច្របាច់ ខណៈលោក Ballouchy ហាក់មានការឈឺចាប់ ហើយសម្លឹងមើល Messi ដោយការភ្ញាក់ផ្អើល បន្ទាប់មកប្រធានក្រុម Inter Miami បានដើរចេញ។

យ៉ាងណា ថ្មីៗនេះ គណៈកម្មាធិការរៀបចំការប្រកួត Major League Soccer របស់សហរដ្ឋអាមេរិក (MLS) បានប្រកាសថា Messi ត្រូរងពិន័យជាទឹកប្រាក់ដោយសារទង្វីរបស់គេក្នុងជំនួបជាមួយ New York City ។ យ៉ាងណាមិញ MLS មិនបានបង្ហាញពីការទឹកប្រាក់ផាកពិន័យ សម្រាប់តារាឆ្នើមវ័យ ៣៧ ឆ្នាំរូបនេះទេ។

ជាមួយគ្នានេះ នៅក្នុងសេចក្តីប្រកាសរបស់ MLS ខ្សែប្រយុទ្ធ Luis Suarez ត្រូវបានពិន័យ សម្រាប់ហេតុផលដូចគ្នា នឹង Messi ប៉ុន្តែជាមួយនឹងកីឡាករផ្សេង។ ទោះបីជាយ៉ាងណា Messi និង Suarez នៅតែមានសិទ្ធិលេងក្នុងការប្រកួត MLS បន្ទាប់ជាមួយ Houston Dynamo នៅដើមខែមីនា។

គួរបញ្ជាក់ថា កុងត្រារបស់ Messi ជាមួយក្លឹប Inter Miami នឹងផុតកំណត់នៅចុងឆ្នាំនេះ ហើយក្រុមរបស់លោក David Beckham កំពុងបញ្ជុះបញ្ជូល Messi ឲ្យបន្តកិច្ចសន្យារ។ យោងតាម Sky Sport តារាឆ្នើមអាហ្សង់ទីន ចង់ត្រលប់ទៅ Barca វិញ៕