ក្រសួងបរិស្ថានព្រមាន ! ច្បាប់ មិនលើកលែងចំពោះបទល្មើសធនធានធម្មជាតិឡើយ

ក្រសួងបរិស្ថានព្រមាន ! ច្បាប់ មិនលើកលែងចំពោះបទល្មើសធនធានធម្មជាតិឡើយ

ភ្នំពេញ : ក្រសួងបរិស្ថានបានលើកឡើងថា ពេលនេះ នឹងមិនលើកលែងទៀតទេចំពោះបទល្មើសកាប់រុករានដីព្រៃធ្វើជាដីកម្មសិទ្ធិ ការបរបាញ់សត្វព្រៃ និងបំផ្លាញធនធានធម្មជាតិ ពីសំណាក់ជនខិលខូច ឆ្លៀតឱកាសនិយម ឬក្រុមអ្នកមានលុយ និងមានអំណាច។

ក្រសួងបរិស្ថានបានដាក់ចេញនូវវិធានការនេះស្របនឹងយុទ្ធសាស្រ្តបញ្ចុកោណ ដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព របស់រាជរដ្ឋាភិបាល អាណត្តិទី៧ នៃរដ្ឋសភា ដែលបានកំណត់ដោយយោងលើបេសកកម្មចម្បង ក្នុងការឆ្ពោះទៅចក្ខុវិស័យឆ្នាំ២០៥០ តាមរយៈកសាងភាពធន់រឹងមាំនៃវិស័យទាំង៥ ក្នុងនោះ មានភាពធន់ក្នុងវិស័យបរិស្ថាន និងក្នុងការឆ្លើយតបនឹងការប្រែប្រួលអកាសធាតុ។

ការលើកឡើងពីការអនុវត្តច្បាប់លើកនេះ មិនមានប្រសិទ្ធភាព គឺជាការយល់ច្រឡំរបស់អ្នកវិភាគមួយចំនួន។ ក្រសួងបរិស្ថាន ដែលជាសេនាធិការឲ្យរាជរដ្ឋាភិបាលក្នុងការគ្រប់គ្រងវិស័យបរិស្ថាន និងធនធានធម្មជាតិ មានកាតព្វកិច្ចចាំបាច់ ដើម្បីការពារសណ្ដាប់ធ្នាប់ ការពារទាំងធនធានធម្មជាតិ ព្រៃឈើ។ ជាមួយគ្នានេះក្រសួង ក៏បានស្នើឲ្យក្រុមអ្នកការពារសិទ្ធិមនុស្ស ឬអ្នកអះអាងថាខ្លួនអ្នស្រឡាញ់ព្រៃ តែមិនបានដល់តំបន់ព្រៃផងនោះ សូមមើលព្រៃទាំងមូលជាសំខាន់ កុំមើលតែឈើមួយដើមៗ។

សូមបញ្ជាក់បន្ថែមថា ឆ្លើយតបនឹងវិធានការអនុវត្តច្បាប់ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានដាក់បទបញ្ជាយ៉ាងម៉ឺងម៉ាត់ទៅដល់មន្រ្តីឧទ្យានុរក្ស ដែលជាឆ្មាំការពារធនធានធម្មជាតិ ត្រូវសហការជាមួយអាជ្ញាធរមូលដ្ឋានគ្រប់លំដាប់ថ្នាក់ និងជាមួយប្រជាសហគមន៍ ចុះល្បាត ទប់ស្កាត់បទល្មើសទាំងនោះ ឲ្យមានប្រសិទ្ធភាព កុំឱ្យបញ្ហាបទល្មើសកើតមានដដែលជាដដែល។

ឯកឧត្តមរដ្ឋមន្រ្តីក្រសួងបរិស្ថាន ស្នើឲ្យអ្នកពាក់ព័ន្ធនឹងបទល្មើសទាំងអស់ រួមទាំងការផ្សាយព័ត៌មានមិនពិត និងញុះញ្ងង់ឲ្យប្រព្រឹត្តបទល្មើសធនធានធម្មជាតិ ត្រូវបញ្ឈប់សកម្មភាពជាបន្ទាន់។ អ្នកប៉ះពាល់ដីព្រៃ គឺត្រូវអនុវត្តទោសតាមច្បាប់។ សូមកុំមានការពាក់ព័ន្ធនឹងការប្រព្រឹត្តបទល្មើសនេះឲ្យសោះ ព្រោះច្បាប់មិនមានការយោគយល់នោះឡើយ។ «រាជរដ្ឋាភិបាលកម្ពុជា មិនលើកលែងក្រុមមនុស្សខិលខូចដែលបំផ្លាញធនធានធម្មជាតិ បំផ្លាញសម្បត្តិជាតិ រំលោភយកដីព្រៃនោះឡើយ»៕