ភ្នំពេញក្រោន យកឈ្នះ Tampines Rovers របស់សិង្ហបុរី ឡើងវគ្គចែកពូល AFC Cup 2023

ភ្នំពេញក្រោន យកឈ្នះ Tampines Rovers របស់សិង្ហបុរី ឡើងវគ្គចែកពូល AFC Cup 2023

កាលពីយប់ថ្ងៃទី២៣ ខែសីហា ម្សិលមិញនេះ ក្រុមបាល់ទាត់ភ្នំពេញក្រោន ក្រោមការដឹកនាំដោយគ្រូបង្វឹកសញ្ជាតិអ៊ុយគ្រែន លោក Oleg Starynskyi បានទទួលជ័យជំនះ លើក្រុម Tampines Rovers FC របស់សិង្ហបុរី ក្នុងលទ្ធផល ៣-២ នៃពានរង្វាន់ AFC Cup វគ្គជម្រុះ Play Off Round ASEAN Zone នាកីឡដ្ឋាន Jalan Besar ។

ការប្រកួតដ៏ជកចិត្តយប់មិញនេះ មានគ្រាប់បាល់កើតឡើងរហូតដល់ ៥គ្រាប់ ក្នុងនោះ ក្រុមភ្ញៀវភ្នំពេញក្រោន រកបាន ៣គ្រាប់ ហើយម្ចាស់ផ្ទះរកបាន ២គ្រាប់។ ៣គ្រាប់នៅលើស្មៅសិប្បនិមិត្តរបស់ភ្នំពេញក្រោន ស៊ុតបញ្ចូលទីដោយ បរទេសទាំងអស់ ពោលគឺកីឡាករជប៉ុន Yudai Ogawa, Shintaro Shimizu និងកីឡាករកូឡុំប៊ី Andrés Nieto ខណ:២គ្រាប់របស់ Tampines Rovers ស៊ុតដោយ Boris Kopitovic ។

ជុំវិញជ័យជំនះ លោក Oleg Starynskyi គ្រូបង្វឹកភ្នំពេញក្រោនបានលើកឡើងថា៖ «ខ្ញុំផ្ញើរភាពរីករាយនេះទៅកាន់ប្រជាជនកម្ពុជា ព្រោះនេះពិតជាសំខាន់សម្រាប់អ្នកគ្រប់គ្នា ដែលយើងតំណាងឲ្យក្រុមកម្ពុជា យើងបានឈ្នះ ២ប្រកួត ហើយពេលនេះយើងបានដល់វគ្គចែកពូលហើយ ។ យើងពិតជាមានកិត្តិយសក្នុងការជំរុញបាល់ទាត់នៅកម្ពុជា ខ្ញុំគិតថាបាល់ទាត់នៅកម្ពុជាគួរតែទទួលបានភាពប្រសើរជាងនេះ ដោយគួរតែមានច្រើនជាង ១ក្រុមក្នុងវគ្គជម្រុះ ដូចដែលអ្នកបានឃើញនៅថ្ងៃនេះ យើងអាចប្រជែង និងអាចឈ្នះក្រុមធំៗនៅតំបន់អាស៊ានបាន»។

ក្នុងថ្ងៃជាមួយគ្នានេះ ក្រុមបាល់ទាត់ PSM Makassar របស់ឥណ្ឌូណេស៊ី បានលត់ក្រុម Yangon United របស់មីយ៉ាន់ម៉ា ក្នុងលទ្ធផល ៤ ទល់នឹង ០។ ដូច្នេះ ក្រុមបាល់ទាត់ភ្នំពេញក្រោន របស់កម្ពុជា និង PSM Makassar របស់ឥណ្ឌូណេស៊ី ដឹកដៃគ្នាឡើងទៅកាន់វគ្គចែកពូល ខណៈដែលមានក្រុមសរុប ៣៦ក្រុម។

គួរបញ្ជាក់ថា ពានរង្វាន់ AFC Cup 2023 បែងចែកជាតំបន់ចំនួន៥ ពៅលគឺមានអាស៊ីខាងលិច អាស៊ីខាងកើត អាស៊ីកណ្តាល អាស៊ីខាងត្បូង និងអាស៊ីអាគេ្នយ៍៕