និតិវិធីស្នើសុំអគ្គិសនីដោយអនុគ្រោះ ដែលកសិករអាចប្រើបានដើម្បីកាត់បន្ថយថ្លៃដើម
និតិវិធីស្នើសុំអគ្គិសនីដោយអនុគ្រោះ ដែលកសិករអាចប្រើបានដើម្បីកាត់បន្ថយថ្លៃដើម
ដោយសារតែថ្លៃដើមផលិតខ្ពស់ ចង់ឬមិនចង់ទិន្នផលដែលប្រមូលបានគឺត្រូវលក់ក្នុងតម្លៃមួយដែលកសិករអាចទទួលបានប្រាក់ចំណេញ ដូច្នេះដំណោះស្រាយសម្រាប់រឿងនេះគឺ ការកាត់បន្ថយថ្លៃដើមដោយផ្តើមចេញពីការចំណាយទៅលើថាមពលអគ្គិសនី។
ជាគោលនយោបាយឈ្នះៗ ក្រសួងកសិកម្មបានដាក់ឱ្យប្រើប្រាស់នូវភ្លើងអគ្គិសនីដោយឈរលើគោលការណ៍អនុគ្រោះ។ តាមរយៈគោលការណ៍នេះ កសិករអាចចំណេញបានជិតពាក់កណ្ដាលនៃថ្លៃ អគ្គិសនីទូទៅ ពោលគឺពីថ្លៃដើម ៧៣០រៀលក្នុងមួយគីឡូវ៉ាត់ម៉ោង មកនៅត្រឹម ៤៨០រៀលក្នុងមួយ គីឡូវ៉ាត់ម៉ោង។ ប៉ុន្តែជាការចំណេញទាំងភាគីរដ្ឋ និងកសិករ គោលការណ៍នេះត្រូវបានអនុវត្តនៅពេលយប់ប៉ុណ្ណោះ គឺចាប់ពីម៉ោង ៩យប់ ដល់ម៉ោង ៧ព្រឹក ជាម៉ោងដែលការប្រើប្រាស់អគ្គិសនីទូទាំងប្រទេសមានការ ថយចុះ។
យ៉ាងណាមិញ កន្លងទៅការអនុវត្តគម្រោងជាក់ស្ដែងស្ថិតក្នុងកម្រិតតិចតួចនៅឡើយ ដោយភាគច្រើននៃកសិករជួបប្រទះនឹងបញ្ហាលើនិតិវិធីស្នើសុំ។ ដើម្បីសម្រួលដល់គោលការណ៍សំខាន់ៗ ព្រមទាំងនិតិវិធីដើម្បីស្នើសុំប្រើប្រាស់អគ្គីសនីដោយអនុគ្រោះនេះ ក្រសួងកសិកម្មថ្មីៗនេះបានចេញសេចក្ដីណែនាំមួយ ដែលមានខ្លឹមសារដូចជា៖
សម្រាប់ទីតាំងដែលប្រើប្រាស់ជាសហគមន៍ ត្រូវចាត់បុគ្គលមួយរូបតំណាងសហគមន៍ ហើយបុគ្គលនោះ ត្រូវដាក់ពាក្យស្នើសុំប្រើប្រាស់អគ្គិសនី/ស្នើសុំប្ដូរប្រភេទអ្នកប្រើប្រាស់ ទៅអ្នកផ្គត់ផ្គង់អគ្គិសនីនៅតំបន់នោះ(អគ្គិសនីកម្ពុជា/អ្នកផ្គត់ផ្គង់នៅតំបន់នោះ) តាមរយៈអាជ្ញាធរឃុំ/សង្កាត់។
ចំពោះទីតាំងដែលប្រើប្រាស់ជារូបវន្តបុគ្គល ឬនីតិបុគ្គល អ្នកស្នើសុំ ត្រូវដាក់ពាក្យស្នើសុំប្រើប្រាស់អគ្គិសនី ស្នើសុំប្ដូរប្រភេទអ្នកប្រើប្រាស់ ទៅអ្នកផ្គត់ផ្គង់អគ្គិសនីនៅតំបន់នោះ (អគ្គិសនីកម្ពុជា ឬអ្នកផ្គត់ផ្គង់ឯកជន)
ដោយឡែក ក្នុងករណីទីតាំងស្នើរសុំនោះ ស្ថិតនៅក្នុងតំបន់របស់អ្នកផ្គត់ផ្គង់ឯកជន អ្នកផ្គត់ផ្គង់ឯកជនត្រូវស្នើរសុំបន្តទៅមូលនិធិអគ្គិសនីភាវូបនីយកម្មជនបទ( ម.អ.ជ) របស់អគ្គិសនីកម្ពុជា ដើម្បីសុំការឯកភាព។
គួរបញ្ជាក់ថា ប្រភេទកសិកម្មដែលអាចមានលទ្ធភាពស្នើសុំប្រើប្រាស់គោលការណ៍អនុគ្រោះនេះ រួមមាន ការដាំដុះ និងចិញ្ចឹមសត្វ៖ កៅស៊ូ ម្រេច ចេក អំពៅ និងស្វាយ ស្រូវ ពោត សណ្តែក ស្ងរ បន្លែនិងផ្លែឈើ ផ្សិត ការចិញ្ចឹមគោ ក្របី ជ្រូក មាន់ និង ទា និងការចិញ្ចឹមសត្វក្នុងទឹកដូចជា ត្រី កង្កែប អន្ទង់ ក្រពើ និងបង្កង។
ការធ្វើសកម្មភាពបម្រើឱ្យសកម្មភាព ដូចជា ៖ បូមទឹក ការសម្ងួត ការបង្កក និងការផលិតជីកសិកម្មជាដើម។ ជាចុងក្រោយគឺការធ្វើសកម្មភាពកែច្នៃផលិតផលចេញពីសកម្មភាពដូចជា ៖ ម៉ាស៊ីនកិនស្រូវ រោងចក្រកែច្នៃជាគ្រឿងកំប៉ុង រោងចក្រច្នៃម្ហូបអាហារ/ភេសជ្ជៈ រោងចក្រផលិតចំណីសត្វ៕
