ស្រាច្នៃចេញពីផ្លែល្មើ ថ្វីត្បិតថាមិនទាន់មានទីផ្សារខ្ពស់ ប៉ុន្តែមានការចាប់អារម្មណ៍ច្រើនពីអតិថិជនក្នុងស្រុក
ស្រាច្នៃចេញពីផ្លែល្មើ ថ្វីត្បិតថាមិនទាន់មានទីផ្សារខ្ពស់ ប៉ុន្តែមានការចាប់អារម្មណ៍ច្រើនពីអតិថិជនក្នុងស្រុក
ល្មើ (លម៉ើ) ជាដំណាំមួួយប្រភេទដែលមានអត្ថប្រយោជន៍ខ្ពស់ចំពោះសុខភាព និងជាប្រភេទ ដំណាំដែលសម្បូរជាតិដែក និងមានជាតិសសៃច្រើនជាងផ្លែចេកផងដែរ។ ដំណាំប្រភេទនេះអាចហុចផលក្នុងរយៈពេលដល់ទៅ៧០ឆ្នាំ ។
គេច្រើនតែយកល្មើទៅធ្វើជាដំណាប់ ហើយលក់នៅផ្សារម៉ាតក្នុងស្រុក ក៏ដូជជានាំចេញទៅក្រៅ ផងដែរ ប៉ុន្តែល្មើក៏អាចកែច្នៃធ្វើជាស្រាបានដែរ។
ជាក់ស្ដែង សិប្បកម្មមួយនៅខេត្តកំពង់ធំ កំពុងតែកែច្នៃស្រាដែលធ្វើចេញពីផ្លែល្មើ។ អាជីវកម្មមួយនេះដែរ ត្រូវបានបង្កើតឡើងកាលពីឆ្នាំ ២០២២ ដែលមានឈ្មោះថា «ស្រាលម៉ើ SDF» ។
ថ្វីត្បិតតែអាជីវកម្មនេះទើបតែមានរូបរាងឡើងប៉ុន្តែក៏ទទួលបានការចាប់អារម្មណ៍ច្រើនពីសំណាក់ អតិថិជនក្នុងស្រុក ដោយសារនេះជាសមិទ្ធិផលថ្មី។
អ្នកស្រី ឆោម សោភា ដែលជាម្ចាស់សិប្បកម្មផលិតស្រាល្មើបានឱ្យដឹងថា គំនិតក្នុងការកែច្នៃស្រាល្មើនេះកើតចេញពីគំនិតចង់រក្សាទុកល្មើឱ្យបានយូរ ព្រោះថាល្មើដែលអ្នកស្រីដាំជាប្រភេទល្មើហូបស្រស់។
ហើយការចាប់ផ្តើមអាជីវកម្មកែច្នៃស្រាល្មើទៀតសោត គឺជាការត្រៀមបញ្ចៀសបញ្ហាកង្វះទីផ្សារ និងការខូចគុណភាពនៃកសិផលល្មើដែលប្រមូលបានមកពីចំការ។
អ្នកស្រី ឆោម សោភា បានបន្តឱ្យដឹងទៀតថា៖ « ផ្លែល្មើហូបស្រស់មិនអាចរក្សាទុកយូរដូចល្មើ ដំណាប់នោះទេ តែបើយើងកែច្នៃវាទៅជាស្រាទុកកាន់តែយូរវាកាន់តែឆ្ងាញ់ និងមិនចេះហួសកាលបរិច្ឆេទដូចប្រភេទស្រាមួយចំនួននោះទេ។»
ប៉ុន្តែយ៉ាងណា បច្ចុប្បន្ននេះសិប្បកម្មរបស់អ្នកស្រីកំពុងស្ថិតក្នុងដំណាក់កាលស្ទាបស្ទង់ទីផ្សារ ដោយមានសង្វាក់ផលិតកម្មតូចនៅឡើយ។ បើតាមការឱ្យដឹងពីម្ចាស់សិប្បកម្មខាងលើ ស្រាល្មើនេះមានរសជាតិចត់លាយផ្អែមតិចៗ ហើយវាល្អសម្រាប់អ្នកមានបញ្ហាលើសជាតិស្ករក៏អាចបរិភោគបានដោយសារតែស្រានេះ បានប្រើប្រាស់ទឹកឃ្មុំជំនួសស្ករសទៅវិញ។
សម្រាប់ឆ្នាំនេះអ្នកស្រីថា សិប្បកម្មរបស់ខ្លួនផលិតស្រាល្មើបានចំនួន ៣ពាន់ដប ដើម្បីបញ្ជ្រាបចូលទៅក្នុងទីផ្សារផង និងស្ទាបស្ទង់ការគាំទ្រផង។ ហើយក្នុងការផលិតចេញជាផលិតផលស្រាដែលមាន រសជាតិឆ្ញាញ់ និងអាចទទួលយកបានគឺមានរយៈពេលរហូតទៅដល់ ៣ខែឯណោះ។
អ្នកស្រីបានរៀបរាប់បន្ថែមថា៖ «ស្រាល្មើយើងលក់មួយដប ២មុឺន ៥ពាន់រៀល ដែលមានចំណុះ ៣៧៥មីលីលីត្រ និងមានកម្រិតជាតិអាល់កុល ១២ភាគរយដែលស្មើទៅនឹងស្រាទំពាំងបាយជូរដែរ ហើយឥឡូវនេះស្រាដែលបានផលិតចំនួន ៣ពាន់ដប នៅសល់តិចតួចប៉ុណ្ណោះ។»
សម្រាប់ការលក់ មិនសូវជាបានចំណូលច្រើននៅឡើយទេ ដោយភាគច្រើនអ្នកស្រីផ្ដោតលើ ការដាក់ឱ្យអតិថិជនភ្លក់នៅតាមព្រឹត្តិការណ៍តាំងពិព័តណ៍ផ្សេងៗ ដោយសារអ្នកស្រីជាសមាជិក នៅក្នុងចលនាភូមិមួួផលិតផលមួយដែរ។
បន្ទាប់ពីបានចូលរួមក្នុងកម្មវិធីផ្សេងៗដើម្បីផ្សព្វផ្សយពីផលិតផលរបស់ខ្លួន អ្នកស្រីបានឱ្យដឹងពីគម្រោងក្នុងការផលិតបន្តទៀតថាខ្លួនគ្រោងនៅផលិតប្រមាណ ៥-៦ពាន់ដបបន្ថែមទៀត។
សម្រាប់ការដាំដុះអ្នកស្រីបានឱ្យដឹងថា ដំណាំល្មើមានអាយុកាន់តែច្រើនផ្លែគឺកាន់តែច្រើន ជាពិសេសពេលវាចូលដល់វ័យ ៥ឆ្នាំ ដែលក្នុងមួយដើមអាចទទួលបានទិន្នផលប្រមាណ ១០០គីឡូក្រាមឯណោះ។ រីឯការប្រមូលផលគឺមានរយៈពេល ៣ខែ គឺចាប់ពីខែមិថុនា ដល់សីហា៕
